Aois domhain gus an mbliadhoinsi na dileand, da mhile da chéad da
fichet agus da bhliadhoin. Ceathracha la ria ndilinn tainig caogaid
Ceasoir go hEirinn, go ccaogaid ninghen, agus go ttriar bfer,
Bioth, Ladhra, agus Fiontoin a nanmanna. Adbath Ladhra i
nArd Ladhrann, agus as uadh ainmnighther. Ba heisidhe cedna marbh
Erionn. Atbath Bioth i Slebh Betha, co ro hadhnacht i cCarn
Slebhe Betha, conadh uadh

raitior in sliabh. Atbath Ceasoir i cCuil Cesra hi
cCondachtaibh, go ro hadhnacht hi cCarn Cesra. Is ó Fiontoin
tra Feart Fiontoin os Loch Deirgdeirc.

O Dilind go ro gabh Parthalon Ere 278, agus aois domhain an tan
do riacht inte, 2520.

Aois domhain an tan tainig Parthalon i nErinn, dá mile cuicc céd
agus fiche bliadhoin. Atiad na toisigh badar lais, Slainge,
Laighlinne agus Rudhruidhe, a trí meic, Dealccnat, Nerbha,
Ciocbha, agus Cerbnad a ccetheora mna.

Aois domhain, da mile cuig céd fiche a secht. Fea mac Torton, mic
Srú do ég an bliadhoinsi hi Muigh Fea, agus ro hadhnacht i
nDolroibh Moighe Fea, conadh uadha ainmnighthear an magh.

Aois domhain, da mile cuicc céd triocha. Is an mbliadhainse ro
cuiredh in ched cath i nErinn .i. Cioccal Grigencosach, mac
Guill, mic Gairbh dFomorchuibh, agus a mhathair tangator i
nErinn, ocht cced a líon, go ro cuiredh cath

etorra hi Slemhnoibh Muighe hIthe go ro mebhoidh for na Fomoruibh
ria bParthalon, go ro marbhhaid uile, conadh e cath Muighe hIthe
innsin.

Aois domhoin, dá míle cúicc ced triocha adhó. Tomaidhm Locha Con,
agus Locha Techeat isin mbliadhainsi.

Aois domhoin, da mile cuicc céad triocha atrí. Slainghe mac
Partholain d'ecc isin mbliadhainsi, agus ro hadhnacht hi ccarn
Slebhe Slangha. Tomaidhm Locha Mesc bheos isin bliadhain chedna.

Aois domhoin, da mhile cuig céd tricha a cúig. Laighlinde mac
Parthalóin deg isan mbliadhainsi. An tan ro clas a fert as ann ro
mebhaidh Loch Laighlinne i nUíbh Mac Uais, conadh uadha
ainmnighther. Tomaidhm Locha hEachtra beos.

Aois domhoin, dá míle cuig céd cethracha a cuig. Rudhruidhe mac
Parthaloin do bathadh i Loch Rudhruidhe, iar ttomaidm in locha
tairis, conadh uadha raiter Loch Rudhruighe.

Aois domhoin, dá mhíle cúig ced cethracha asé. Murtola Brena fo tír
isin mbliadhainsi, conadh é an sechtmadh loch tomaidhm ro mebaidh i
naimsir Parthaláin, agus as dosidhe as ainm Loch Cuan.

Aois domhain, da mile cuig céd caoga. Parthalon décc for Senmoigh
elta Eadair isin mbliadhoinsi. A naimsir gabhala Parthaloin Ro
slechtoit na muighesi: acht na ma ni fes caite bliadhna áiridhe in ro
slechtoid. Magh

nEitrighe, la Connochta, Magh nIthe, la Laighniu; Mag Líí, la
hUibh Mac Uais Bregh; Magh Latharna, la Dál nAruidhe.

Aois domhoin, da mile ocht cced fiche bliadhan. Naoi Mile do ecc fri
haoinsechtmain do muinter Parthaloin for shenmhaigh ealta Eadoir
.i. cúig Míle dferoibh, agus ceithre míle do mnáibh. Conadh de sin ata
Taimhleacht muintere Parthalain. Trí ced bliadhain ro caithsiot i
nErinn.

Ere fas triochat bliadhain go ttainicc Neimhidh.

Aois domhoin, da mile ocht cced caocca. Neimhidh do techt in
nErinn. Is an dara lá décc iar ttecht do Neimhidh co na
mhuintir atbath Macha ben Neimhidh. Atiad annso na cethra hairigh
batar lais, Sdarn, Iarbhainel Faidh, Fearghus Leithdert, agus
Aindind. Ceithre meic Neimhidh iadsidhe. Medu, Macha, Yba,
agus Cera, cetheora mná na naireachsin.

Aois domhoin, dá míle ocht cced caoga anaoi. Isin mbliadhoinsi ro
mebhaidh Loch nDairbrech agus Loch nAinnind hi Midhe.

Atiatt annso na Ratha ro toccbadh, na moighe ro slechtadh, agus na
locha ro tomaidhmsat ind aimsir Nemhidh, gen go bfoghthor bliadhna
sainredhacha forra. Rath Cind ech i nUibh Niallain; Rath
Ciombaoith hi Seimhne, Magh Cera,

Magh nEabha, Magh Chuile toladh, agus Magh Luirg hi
cCondachtoibh; Magh tochair i tTir Eogain; Leagmagh i
Mumhain; Magh mBrensa i Laighnibh; Magh Lughadh i nUibh
Tuirtre; Magh Seredh hi tTethba; Magh Semhne i nDal Aruidhe;
Magh Muirthemne i cConaille; agus Magh Macha lá hAirghiallaibh;
Loch Cal i nUibh Nialláin, agus Loch Muinremhoir hi Luighnibh
hi Slebh Guaire. Cath Murbuilg i nDál Riada; Cath Boghna,
agus cath Cnamrossa, for Fomoiribh. Ro bris Nemhidh iadsidhe.

Atbath Nemhidh iaromh do thamh i ccrich Liatháin i Mumhain trí
mile mar aon ris ind oilen Arda Nemhedh.

Aois domhain, trí mhile sescot asé. Toghail, tuir Conainn isin
mbliadhainsi la síol Neimhidh for Conainn mac Faobhair, agus
for Fomoribh ar chena a ndioghail gach dochraide da ttardsat forra,
amhail as follus isin croinic da ngoirther

Leabhar Gabhala, agus as suaill nach torchrator comhthuitim díbhlinibh
gen mo tád na trí deichneabhoir téarnator do chlaind Nemhidh fo
airdibh in domhain go rangator Erinn iar ttrioll ina bFeraibh
Bolcc. Sé bliadhna decc da ced ro chaith Neimhidh co na shíol ind
Erinn. Ere fás iarsin re dá ched bliadhain.

Aois domhain, trí mhile da ched sesccat ase sic. Fir Bolcc do
gabhail Eirionn a bfoirchend na bliadhna so. Slainge, Gand,
Genann, Seangann, agus Rudhruighe a ccóig toisigh. Cuig meic
Deala mic Loich iadsomh. Ro ríoghsat an cethror oile agus Fir
Bolcc ar chena Slainge uaistibh.

Aois domhain, tri míle dá céd seasccat a seacht. Slainghe mac Deala
do beith i ríghe Erionn frí aoinbhliadhna, agus a écc i foircenn na
bliadhna sin i nDionn Rígh for bru Berbha.

Aois domhoin, trí mhile da céd seasccat a hocht. Rudhruidhe mac
Deala do gabhail ríghe nErand. An chéd bhliadhain dia righe
innsin.

Aois domhain, trí míle dá céd seascat anaoi. An dara bliadhoin do
righe Rudhruidhe, agus a écc i bhfoircionn na bliadhna so.

Aois domhain, tri mile da céd sechtmoghat. An céd bhliadhain do righe
Gainn agus Geanainn os Erinn innsin.

Aois domhain, tri mile da céd sechtmoghat a trí. An cethramhadh
bliadhain do Gann agus do Geanann, agus a nécc do tamh a
bfoircend na bliadhna so hi ccrích Liathain co ffichit céd ar aon
riú.

Aois domhoin, tri mile da céd sechtmoghat a cethair. An céd
bhliadhain do righe Shengaind innsin.

Aois domhain, tri mile da ced sechtmoghat a hocht. A bfoirchend an
cúicceadh bliadhain do righe Sengainn torchoir lá Fiachaidh
Cennfionnán mac Stairn.

Aois domhain, tri mile da ced sechtmoghat anaoi. An ced bhliadhain do
righe Fiachach Cennfionnán.

Aois domain sic, tri mile da ced ochtmoghat a trí. An cúicceadh
bliadhain do righe Fiacha, agus a thuitim la Rionnal mac Geanoinn
an bliadhainsi.

Aois domhain, tri mile da ced ochtmoghat a cethair. An ced bhliadhain
do righe Rionnail mic Geanoinn for Erinn.

Aois domhain, tri mile da ced ochtmoghat anaoi. Iar bforbadh an
seiseadh bliadhain do Rionnál is an righe, torchoir la Foidhbhgen
mac Senghainn.

Aois domhain, tri mile da ced nochat. An ched bhliadhain do righe
Foidhbhgen.

Aois domhain, tri mile da ced nochat atrí. A bfoircenn an cethramhadh
bliadhain do righe Foidhbhgen do rochair la hEochaidh mac Erc.

Aois domhain, tri mile da ced nochat a cethair. An ced bhliadhain do
righe Echdhach mic Erc indsin.

Aois domhain, tri mile tri ced atrí. An dechmadh bliadhain do righe
Eachdhach mic Erc, agus as isidhe bliadhain deidhenach a
fhlaithiusa, uair tangatar Tuatha De Danonn do gabhail Ereann for
Feroibh Bolcc co ttardsat cath dia roile for Maigh tuiredh hi
Conmaicne Chuile Toladh i cCondachtaibh, gur ro marbhadh an ri
Eochaidh mac Erc lá tribh macoibh Neimhidh mic Badhrai do Tuathaibh
de Danonn, Ceasarb, Luamh, agus Luachra a nanmanna. Ro
díotlaithrighedh Fir Bolcc isin chath sin, agus ro ladh a nár. Ro
benadh beos a lámh do Nuadhatt mac Eochdhach, mic Ettarlaimh, (don
righ ro baoi for Tuathaibh De Dannann) isin cath cedna. Asé an
tEochaidh remhráite Rí deidhenach Fir mBolcc. Naonbhar ro gabh
righe diobh, agus seacht mbliadhna décc ar fichit fod a bflaithiusa
for Erinn.

Aois domhain, tri mile tri ced a cethoir. An ced bhliadhain do righe
Bress mic Ealathoin for Erinn, uair do ratsat Tuatha De Danann
righe do iar mbrisiodh catha Muighe tuireadh Conga, an ccein ro baoi
lámh Nuadhat accá leighius.

Aois domhain, tri mile tri ced a deich. An sechtmadh bliadhain do
Bres ós Erinn innsin, go ro fhagoibh an righe do Nuadhat iar
níoc a laimhe la Diancecht, agus Creidne cerd ag congnamh lais.
Uair do ratsad laimh nairgitt fair.

Aois domhain, tri mile tri ced a haoin décc. An ced bhliadhain do
righe Nuadhat airgetlaimh tar eis a laimhe do thaitheamh re píosa
airgaitt aithleigthedh.

Aois domhain, tri mile tri ced triochat. A bfoirchend fiche bliadhain
do

righe Nuadhat Argatlaimh torchair i ccath Muighe tuiredh na
bFomorach la Balor mbailcbemnioch d'Fhomhoiribh.

Aois domhain tri mile tri ced, triochat a haon. An céd bhliadhain do
righe Logha Lamfada uas Erinn.

Aois domain sic, tri mile tri ced Sechtmoghat sic. Iars an
ccethrachatmhadh bliadhain do Lugh Lamhfada hi righe nEirend
do rochair lá Mac Cuill hi

cCaondruim. As i reimhes an Loghasa do rónadh aonach Taillten
a bforaithmet agus i ccuimhne écca a buime, Taillte ingen Maghmóir
isidhe, inghen righ Easpáine, ben Eachdach mic Eirc, rí dedhenach
Fer mBolc an tEochaidh sin.

Aois domain sic, tri mile tri ced sechtmoghat a haon. An ced
bhliadhain do ríghe Eachdach Ollathair dár bainm an Daghda ós
Erinn indsin.

Aois domhain, trí míle cethre ced caoga. Iar bforbadh na bliadhna
dedhenaighesi don ochtmogat bliadhan ro caith Eochaidh Ollathar i
nairdrige na hErend, ro écc is an mBrugh do gaíbh cró na gona
do rat Cethlend fair hi ccéd cath Maighe tuiredh.

Aois domhain, tri mile cethre ced caoga a haon. An ced bhliadhain do
righe Dealbaoith mic Ogma ós Erinn innsin.

Aois domhain, tri mile cethre ced Sescat. Is an deachmadh bliadhain
do righe Dealbhaeith torchair do laimh a mic feisin, Fiacha mac
Dealbhaeith.

Aois domhain, tri mile cetra ced sescat a haon. An ced bhliadhain do
Fiacha mac Dealbhaeith i righe.

Aois domhain, tri mile cethre cedh Seachtmoghat. A bhfoircheand
an deachmadh bliadhan do righe Fiachaidh mic Dealbhaeith ós
Erinn do thuit la hEógon nInbir.

Aois domhain, tri mile cethre ced seachtmoghat ahaon. An ced
bhliadhain

do righe na ttrí ríogh ndedhenach do Tuathaibh De Danann ro bhadar
hi ccomflaithius ós Erinn, Mac Cuill, Mac Cécht, agus Mac
Gréine innsin.

Aois domhain, trí míle cúicc ced. Tasgur (.i. cobhlach) mac Míleth
do techt i nErind a bfoirchend na bliadhna so dia gabhail ar
Tuathaibh De Danann, agus ro fersat cath Slébe Mis friú isin tres
laithe iar na ttecht hi ttír: ba isin cath sin do rochair Scota
inghen Pharao ben Míleadh, agus ata fert Scóta eider Sléibh Mis
agus muir. Do rochair and beos Fás, bean Uin, mic Uicce, dia tta
Glend Faisi. Ro fersat meic Mileth iar sin cath i tTailltin fri
trí ríogaibh Tuaithe De Danann, Mac Cuill, Mac Cecht, agus Mac
Greine. Ro bas go cian ag cur in catha go ttorchoir Mac Cecht lá
hEireamhon, Mac Cuill la hEmear, agus Mac Greine la
hAimhirgin.

Torchatur tra a tteora Rioghna, Ere lá Suirge, Fotla la
hEadan, agus Banba la Caicher. Ro sraoineadh an cath fa deóidh
for Tuathaibh De Danann, agus ro machtait in gach maigin i ttarrustar
iad. Torchratar o macoibh Mileadh do leith ele dá taoisioch airegdha
ag slaighe an madhma, Fuad i Sléibh Fuaid, agus Cuailgne i
Sleibh Cuailgne.

Aois domhain tri Mile cúig ced a haon. As í so bliadhain in ro gabh
Ereamhon agus Emhear comhflaithius os Erind, agus ro randsatt
Ere ar dó etorra. As innte beos do ronadh na gniomha so síos la
hEireamón agus lá hEmher co na ttaoisiochaibh. Ráth Beothaigh
os Eoir i nArgatt Ros, agus Ráth Oinn i ccrich Cualann, la
hEireamhón, tochar Inbhir móir, i ccrich Ua nEneachglas Cualann,
lá hAimhergin, cumdach Dúine Náir i Sleibh Modhairn, la
Goisten, Dún Delginnsi i ccrích Cualann la Sedgha, Dun
Sobhairce i Murbholg Dal Riada lá Sobhairce, agus Dún Eadair la
Suirghe. La hEreamhon co na thaoisiochaibh do ronadh innsin.
Rath Uamain i Laighnibh la hEmhear. Rath Arda Suird la
hEatan mac nUice, Carracc Fethaighe la hUn mac nUicce, Carracc

Blaraighe la Mantan, Dun Ardinne la Caicher, Rath Rioghbhaird
i Muiriscc la Fulman. La hEmhir co na thaoisiochaibh innsin.

Ro fás imriusain i foirceann na bliadhna so etir Eremhon agus Emhear
im na tríbh druimnibh oirrdherca, Druim Clasaigh i cCrich Maine,
Druim Bethaigh i Maonmaigh, agus Druim Finghin i Mumhain.
Fertar cath etorra as allos ar brú Brí damh ag Tochar eter da
magh. As frisidhe asberar cath Geisille. Meabhaidh an cath for
Emhear, agus do cher and. Torchratar dna tri taoisigh airegda do
mhuintir Ereamhóin isin chath cedna. Goisten, Setgha, agus
Suirge a nanmanna. Gabhais Eremhon an righe iar sin.

Aois domhain, trí míli cúicc ced adó. An cheid bhliadhain do righe
Ereamhoin os Erinn, agus an dara bliadhain iar ttecht do macoibh
Míleadh, do rann Eremhón Ere. Do rad coicceadh Uladh
d'Emhear mac Ir, an Mumha do ceithre macoibh Emhir Find;
coigeadh Connacht d'Un agus d'Eadan, agus coicceadh Laighen
do Criomhthann Sciathbél do Domnandchoibh.

Tea, ingen Luighdheach, mic Ithe, tug Eremhón isin Espáin tar cend
Odhbha, as í an Tea so conaitcestoir go hEremhon tuloigh
toghaidhe ina tionsccra cecip maighean iraegbadh, gomadh innte no
hadhnaicthi, agus no toccaibte a múr agus a lighe, agus go madh and no
biadh gach rioghordan no geinfiodh dia síol go brath. As iad na ratha
condogaib aire im a comhall di, Aimhirgin Gluingheal agus Emhear
Fionn. Iseadh iaromh dho raegisi Druim Caoin .i. Teamhuir. As
uaithe ráitear, agus as innte ro hadhnacht.

Odhbha dna mathair Muimhne, agus Luighne, agus Laighne décc go
ro hadnacht i nOdhbha.

Cath Cúile Caichir, i torchair Caichear lá hAimhirgin nGlúingeal
an bhliadhoinsi, agus focres a fhert isin maighin sin conadh uadha do
garar Cúil Caichir.

Aois domhain, tri mile cúicc ced a tri. An dara bliadhain do righe
Eremhoin ós Erinn. Aimhirgin Gluingeal mac Mileadh do thuitim
hi ccath Bile tinedh an bliadhainsi la hEreamhon. Tomaidhm
naoi mBrosnach .i. aibhne nEle,

naoi Righe .i. aibhne Laighen, agus teora nUinsionn Ua nOiliolla
isin bliadhain cedna.

Aois domhain, tri mile cuicc ced a sé. An cuigeadh bliadhain do righe
Eremhóin. Fulman agus Manntan do thuitim las an righ i cath
Breogain i bhFemhean, agus tomaidhm na loch so in bliadhain cedna.
Loch Cimbe, Loch Buadhoigh, Loch Baadh, Loch Ren, Loch
Fionnmaighe, Loch Gréine, Loch Riach, Loch da Caoch i
Laighnibh, agus Loch Laogh ind Ultoibh.

Aois domhain, trí mhíle cúic ced a deich. An naomhadh bliadhain do
righe Eremhoin do cher Un, En, agus Eadan lais i ccath
Comhraire i Midhe. Tomaidhm Eithne i nUibh Néll, na teora
Socc i Connachtaibh, agus Fregabhail etir Dál nAraidhe agus
Dal Riada an bhliadhainsi. Aibhne iadsidhe.

Aois Domhain sic, trí mhíle cúicc ced a se décc. An cuicceadh
bliadhain décc dEreamhón i righe, agus a écc a foircheann na ree sin
i Ráith Beothaigh os Eóir i nArgat Ross.

Aois Domhoin, trí mhíle cúicc ced a secht decc. An ced bhliadhain do
Muimhne, do Luighne, agus do Laighne, clann Eremhoin i
ccoimhrighe os Erinn.

Aois domain, trí míle cuicc ced a naoi decc. I ffoirchenn na ttrí
mbliadhan so atbath Muimhne i cCruachain, Luighne agus Laighne
torchrator hi ccath Arda Ladhrann la macaibh Emhir.

Er, Orba, Fearon, agus Fergen ceithre meic Emher
leithbliadhain doibh. As hí a leithbliadhainsi agus leithbhliadhoin
Nuadhaitt Neacht do ni bliadhain comhlán, agus as ag an righ Nuadha
Neacht airimhthir í i naois domhain. Torchrator an cland sin Emhir
la hIrial Fáidh, mac nEremhoin, i ccath Cuile Márta iar
bforbadh na leithbhliadhna remhráite.

Aois domhain, tri mile cúicc ced fiche anaoi. A bhfoirchend an
dechmhadh bliadhain so Irial Fáidh mic Eremhoin hi righe, fuair bás
i Maigh Muaidhe. As las an hIrial fFaidh so ro cuirit na catha
so: Cath Cuile Marta, Cath Arda Inmaoith hi Teathba i
ttorchair Stirne mac Duibh mic Fomhoir, cath Tenmaighe i
ttorchair Eocha Eachcheann rí Fomhoire, agus cath Lochmaighe i
ttorchair Lugh Roth, mac Mofemis, d'Feroibh Bolg. As i
naimsir an Ireóil cedna slechtadh na magh, togbhail na ráth, agus
tobhruchtadh na naibhneadh so. Atiad na maighe, Magh Sele i nUibh
Néll, Magh nEle la Laighniu, Magh Rechet, Magh Sanais i
Connachtaibh, Magh Techt la hUibh mac Uais, Magh Faithne
la

hAirithera, Magh nDairbhrech i Fothartaibh Dairbhreach, Magh
Lughna i cCiannachta, Magh nInis la hUltoibh, Magh Chúile
fedha i Fernmaigh, Magh comair, Magh Midhe, Magh Cobha, Magh
Cuma lá hUibh Néll, Magh Fernmhaighe la hOirghiallaibh, agus
Magh Riatta. Atiad na ratha, Rath Croich i Moighinis, Rath
Cuincedha i Semhne, Rath Bacain i Latharna, Rath Lochaid i
nGlascharn, Rath Glaise cuilg, da ngoirthear Rath Ciombaoith
ind Eamhain, Ráth Mothaigh agus Rath Buirg i Slechtmhoigh. Na
haibhne, Siúir, Féil, Ercre lá Mumhain, na trí Fionna, agus
na trí Coimde.

Aois domhain, tri mile cúicc ced triochat. An ced bhliadhain do righe
Ethrel, mac Ireoil Fáidh, os Erinn indsin.

Aois domhain, tri mile cuicc ced cethrachat anaoi. An fichetmhadh
bliadhain dEthrel, mac Ireoil Fáidh, mic Eremhóin i righe go
ttorchair lá Conmhaol mac

Emhir i ccath Rairend. Is i remhes an Ethreoil si ro slechtaitt
na maighe si, Teanmagh lá Connachtoibh, Magh Lughadh lá Luighne,
Magh mBealaigh lá hUibh tTuirtre, Magh Géisille lá hUibh
bFailghe, Magh Ochtair la Laighniu, Lochmagh lá Conaille, agus
Magh Roth lá hUibh Eachdhach.

Aois domhain, trí mhíle cúig ced caoga. An ched bhliadhain do righe
Conmhaoil, mac Eimhir, os Erinn innsin. Céd rí Ereann a
Mumhoin esidhe.

Aois domhain, trí míle cúig céd seachtmoghat anaoi. Iar mbeith dech
mbliadhna fichet do Conmaol, mac Emhir, i righe nEreann torchair
i ccath Aonaigh Macha lá Tighernmus mac Follaigh. Conmaol tra as
lais do cuiredh na catha so, cath Geisille, i ttorchair Palap mac
Ereamhoin, cath Berre, cath Slébhe Betha la hUibh Cremhthainn,
cath Ucha, cath Cnucha, cath Slebhe Modhairn i ttorchair
Semroth mac Inboith, cath Clere, cath Carn móir i ttorchair
Ollach, cath Locha Lein for Earna, Mairtine, agus for Modh
Ruith, mac Mofebis, dFeroibh Bolg, cath Ele.

Aois domhain, tri míle cúig ced ochtmoghat. An céd bhliadhain do righe
Tighernmais mic Follaigh ós Erinn.

Aois domhain, trí míle ced ochtmoghat a haon. An dara bliadhain do
righe Tighernmais, tomaidhm na naoi loch so. Loch nUair i Midhe,
Loch nIairn,

Loch Cé i Connachtaibh, Loch Saileand, Loch nAillend i
cConnachtaibh, Loch Feabhail, Loch Gabhair, Dubhloch agus
Loch Dabhall i nOirghiallaibh.

Aois domhain, tri mile se ced caoccat a sé. As í an bliadhain si an
seachtmadh bliadhain décc ar tribh fíchtibh do Tighernmas na righ os
Erinn. Ar lais ro briseadh na catha so for shíol nEmhir agus for
araill dErennchoibh agus deachtaircenelaibh oile cén mo tátsomh.
Atiad so na catha hishin, cath Elle i torchair Rocorb, mac Gollain,
cath Lochmuighe i ttorchair Dagairne mac Guill, mic Gollain, cath
Cula aird i Muighinis, cath Chuile Fraochain, cath Maighe
Techt, cath Commair, cath Cula Athguirt i Semhne, cath Aird
Niadh hi cConnachtaibh, cath Cairn Feradhoigh i torchoir
Feradach mac Rochuirb, mic Gollain, ó ráiter Carn Feradhaigh, cath
Cnamhchoille hi Connachtaibh, cath Cuile feadha, cath Reabh,
cath Congnaidhe i Tuaith Eabha, cath Cluana Cuas, i Teathba,
cath Cluana Muirscce, i mBrefne, da cath Chuile i nArgat Ros,
cath Ele, cath Berre, Seacht ccatha ag Loch Lughdhach,

da cath oili i nArgad Ros, trí catha for Fiora Bolg, cath Cuile
Fobhair for Erna.

As la Tigernmus bheos ro berbhadh or ar tús i nErinn, i foithribh
Airthir Liffe. Uchadan cerd dFeroibh Cualainn rodus berbh. As
lais ro cumhdaighit cuirn agus brethnassa dor agus dargat in nErinn
ar tús. As lais tugadh ruamnadh for edoighibh, corcair, gorm, agus
uaine. Ar na reimhius tobruchtadh teora ndubh aibhnedh Ereann,
Fubhna, Torann, agus Callann, a nanmanna. A bfoirchend na
bliadhna so atbailsiomh, to teoraibh cethramhnaibh fer nEreann ime,
i mordhail Maighe Slecht, isin mBreifne, ag adhradh do Crom
Croach, airdiodhal adhartha Erenn eisidhe, oidche hSamhna do
hsonradh innsin. As do na sleachtanaibh do ronsat fir Erionn im
Tighernmas hisuidhe ro hainmnigheadh an magh.

Aois domhain, tri mile sé ced caogatt a seacht. An ced bhliadhain
dErind gan righ iar tTighernmas innsin.

Aois domain, tri mile sé ched sesccat a trí. An seachtmadh bliadhain
indsin. Baoi Ere gan rígh frí ré na secht mbliadhan sin.

Aois domhain, tri mile sé ced seasccat a cethair. An cead bhliadhain
dEochaidh Eudgadhach na righ ós Erinn indsin. As aire atberar
Eochaidh Eudgadhach fris ar as lais tuccadh ilbhrechtradh gacha
datha i nedighibh ar tús

i nErinn deidirdeliughadh onóra gach aoin as a edach, ótha íseal go
huasal. As amhlaidh din ro deligh ettorra, aendath i nedoighibh
moghadh, adó i nedoighibh amhoss, a tri i nédoighibh daghlaoch agus
oigtighernadh, a ceathair i nedoighibh brughadh, a cuig i nedoighibh
tighearnadh tuath, a se i nedoighibh ollamhan, a secht i nedoighibh
ríogh agus ríoghan.

Aois domhain, tri mile se ced sesccat a seacht. An cethramhadh
bliadhain dEochaidh. Hi bfoircend an cethramhadh bliadhain dia
righe do rochair lá Cermna mac Ebric i ccath Teamhra.

Aois domain, tri mile sé ced seasccat a hocht. An ced bhliadhain do
Sobhairce agus do Cermna Fiond, dá mac Ebric, mic Emhir, mic Ir,
mic Mileadh, ós Erinn, agus ro rannsat eatorra í ar dó, Sobairce
tuaith i nDún Sobhairce, agus Cermna teas i nDun Cermna. Dá
cédrígh Ereann do Sliocht Ir iadsidhe.

Aois domhain, tri míle seacht cced a seacht. Ar mbeith cethrachat
bliadhain do na rioghaibh si a ccomhfhlaithius os Erinn, do chear
Sobairce la hEochaidh Meand dFomoiribh, agus do rochair Cermna
la hEochaidh bFaobharglas mac Conmhaoil.

Aois domhain, tri mile seacht ccéd a hocht. An ced bhliadhain
dEochaidh Faobharglas, mac Conmail, mic Emhir, os Erinn.

Aois domhain, tri mile seacht cced fiche a seacht. Iar mbeith imorro
dEochaidh fiche bliadhain i righe Ereann torchair lá Fiacha
Labhrainne i ccath Carmain i ndioghoil a athar. Atiad andso na
catha ro cuirid agus na maighe ro sleachtaid lá hEochaidh
fFaobharglas. Cath Luachra Deadhadh, cath Fosaidh da gort, cath
Comair trí nuiscce, cath Tuama Dreacon i nUibh Briúin Breiffne,
cath Droma Liathan. Atiatt na maighe, Magh Smetrach

lá hUibh fFailghe, Magh nAidhne, Magh Luirg i Connachtaibh,
Magh Leamhna, Magh nInir, Magh Fubhna, agus Magh da gabhor lá
hAirghiallaibh.

Aois domhain, tri mhíle secht cced fiche a hocht. An céd bhliadhain
do righe Fiachach Labhrainne os Erinn indsin.

Aois domhain, tri mile seacht ccéd caoccat a haon. An cethramhadh
bliadhain fichit so foirchend righe Fiachach Labhrainne, agus do cher
lá hEochaidh Mumho don Mumhoin i ccath Bealgadain. As las an
bFiacha Labhrainne si ro briseadh na catha so. Cath Gathlaighe i
ttorchair Mofebis mac Eachdach Faobharglais, cath Fairrge for
cloinn Emhir, cath Slebhe Feimhin, cath frí hErnoibh dFeroibh
Bolg an bail i fuil Loch Erne. Iar meabhsain an catha forra as ann
ro meabhaidh an loch tairsibh, conadh uatha ainmnighther an loch .i.
loch tar Ernaibh. As a reimhius an Fiacha cedna tobhruchtadh na
tteóra naibhneadh, Fleasc, Mand, agus Labhrand, dia ro lil an
forainm fairsium.

Aois domain, tri mile secht ccéd caogat a dó. An céd bhliadhain do
righe Eachdach Mumhó, mac Mofebis, os Erinn indsin.

Aois domhain, tri mile seacht ccéd seachtmoghat a do. Bliadhain ar
fichit dEochaidh i righe nEreann, co ttorchair la hAonghus
Olmucadha i ccath Cliach.

Aois domhain, tri mile secht ccéd sechtmoghat a trí. An céd
bhliadhain do righe Aonghusa Olmucadha, mac Fiacha Labhrainne, ós
Erinn insinn.

Aois domhain, tri mile seacht céd nochat. Iar mbeith dAenghus
Olmucadha ocht mbliadhna decc inn airdrighe Ereann do cher i ccath
Carman lá hEnna nAirgtheach. Ase Aenghus ro bris na catha so,
cath Clére, cath Cuirce, cath Slébhe Cuilge for Mhairtine i
ccrích Corca Baisccinn, cath Ruis Fraochain i Muiriscc i
torchair Fraochan Fáidh, cath Cairn Ricedha, cath Cúile Ratha i
nDeasmumhain, cath Slébhe Cua for Erna, cath Airdachaidh i
torchair Smiorgoll mac Smeathra, rí Fomoire, caoga cath for
Cruithentuaith agus for Fiora Bolg, dá cath déc for Longbardaib,
agus ceithre catha for Colaist. Atiat na locha ro tomaidhmseat ina
ré, Loch Aonbeithi la hUibh Cremhthuinn, Loch Saileach, Loch na
ngasan i Maigh Luirg la Connachtaibh, agus Murbrucht eidir
Eabha agus Ros Cette. As la hAonghus dna ro sleachtadh na
maighe so, Magh Glinne Decon lá Cenél Conaill, Magh Mucruimhe la

Connachta, Magh Cúile caol lá Cenél mBogaine, Magh nOensciath la
Laighne, Aolmhagh la Calraighibh, Magh Arcaill lá Ciarraighe
Luachra, agus Magh Luachra Deadhaidh.

Aois domhain, tri mhíle secht ccéd nochat a haon. An céd bhliadhain
dEnna Airgthech a righ ós Erinn insin.

Aois domhain, tri mile ocht ccéd a secht décc. Iar ccaithemh secht
mbliadhon ffichet dEnna Airgthech i righe Ereann do cher la
Roitheachtaigh, mac Maoin, mic Aonghusa Olmhucadha, i cath
Raighne. As las an Enna Airgthech so do ronta scéth airgit i
nAirget Ros, go ttarad dferoibh Ereann amaille re heachaibh
agus cairpthibh.

Aois domhain, tri mile ocht ccéd a hocht decc. An céd bhliadhain do
Roithechtaigh mac Maoin os Erinn indsin.

Aois domhain, tri mile ocht ccéd cethrachat a dó. I ffoirchend cuicc
mbliadhan ffichet do Roitheachtaigh i righe Ereann torchair la
Sedna mac Airtri i ccruachain.

Aois domhain, tri mhíle ocht ccéd ceathrachat a tri. An ched
bhliadhain do ríghe Shedna, mic Airtri, mic Ebhric, mic Emhir, mic
Ir.

Aois domhain, tri mhíle ocht ccéd cethrachat aseacht. Iar mbeith
cúicc bliadhna do Sédna isin ríghe, torchair la Fiacha Fíonscothach
agus lá Muineamhon, mac Cais Clothaigh, i ccruachain.

Aois domhain, tri mile ocht ccéd ceathrachat a hocht. An céd
bhliadhain do righe Fiachach Fionscothaigh os Erinn.

Aois domhain, tri mile ocht ccéd seasccat a secht. Iar mbeith
dFiachaidh Fionscothach fiche bliadhain i righe Erionn do cher la
Muineamhon mac Cais.

Ba scoithshemrach gach magh i nErinn i naimsir Fhiachach.
Do gebhthí bheós a lán fíona isna sgothaibh ísin, go bfáisctís i
lestraibh glainidhibh an fíon. Conadh aire sin ro len an forainm
Fiacha Fionscothach do ghairm de.

Aois domhain, tri mile ocht ccéd sescat a hocht. An céd bhliadhain
do righe Muineamhoin, mic Cais Clothaigh, os Erinn innsin.

Aois domhain, tri míle ocht ccéd sechtmogat a dó. I ffoirchenn an
coicceadh bliadhan do Muineamhón, atbath do thámh i Maigh Aidhne.
As las an Muinemhón so tuccadh muincedha óir fa braighdibh Ríogh agus
Ruirech ar tos i nErinn.

Aois domhain, tri mile ocht ccéd sechtmoghat atrí. An ced bhliadhain
do Faildergóid.

Aois domhain, tri míle ocht ccéd ochtmoghat a do. Iar mbeith dech
mbliadhna dFailderdóid isin righe do rochair lá hOllamh fFotla,
mac Fiachach Fíonscothaigh, i ccath Temhra. As las an righ
Faildeargdóid ro cuiredh failge óir im lámhoibh airech i nErinn ar
tús.

Aois domhain, tri mile ocht ccéd ochtmoghat a trí. An céd bhliadhain
do righe Ollamhan Fotla, mac Fiachach Fionscothaigh.

Aois domhain, trí mile naoi ccéad fiche a dó. Iar mbeith dá fichet
bliadhain i righe Ereann dOllamh Fothla, atbail ina mhúr budhen
i Temhroigh. As é cédna rí las a ndernadh Féis Teamhrach, agus as
lais do togbhadh Múr nOllamhan i tTemhraigh. As é din ro ordaigh
taoisioch ar gach triochait

céd, agus brughaidh ar gach baile, agus a bfoghnamh uile do Righ
Ereann. Eochaidh cédainm Ollamhan Fothla, agus as aire
adrubradh Ollamh (Fodhla) fris ar a bheith na ollamh ergna cédus,
agus ('na) Rígh (Fodhla .i.) Ereann iaromh.

Aois domhain, tri mile naoi ccéd fiche a trí. An céd bhliadhain do
righe Fionnachta, mic Ollamhon Fothla, ós Erinn indsin.

Aois domhain, trí míle naoi ccéd cethrachat a dó. An fichetmadh
bliadhain dFionnachta ós Erinn innsin. Atbath iaromh do thámh i
Muighinis la hUltu. As a reimhius an ríogh Fionnachta ro feradh
snechta go mblas fíona condemheth an fér. As de ro lean an forainm as
Fionnachta fairsiomh. Elim a ainm ar tús.

Aois domhain, tri mhíle naoi ccéd cethrachat a trí. An ced
bhliadhain do righe Slanuill, mic Ollamhan Fotla, ós Erinn.

Aois domhain, tri míle naoi ccéd caogat a naoi. An sechtmhadh
bliadhain décc do Slanoll isin righe, co nerbailt i bfoirchend na
réé sin i Teamhraigh, agus ní fes cia galor ros fucc acht a faghail
marbh, seach ní ro sódh dath dó. Ro hadhnaicedh e asa haithle, agus
iar mbeith cethrachat bliadhain isan adhnacal dia churp ro togbadh
iaromh la a mhac .i. la hOilill mac Slanuill, agus ro mhair a
chorp gan lobhadh gan leaghadh an airet sin. Ba machtnadh mór agus ba
hiongnadh la fiora Erionn an ní sin.

Aois domhain, tri míle naoi cced seascca. An chéd bhliadhain do
righe Ghedhe Ollgothaigh os Erind.

Aois domhain, tri míle naoi ccéd seachtmoghat a haon. An dara
bliadhain

décc do Ghedhe Ollgothach i righe Ereann, agus do cher i
bforchend na réé sin la Fiacha mac Fionnachta.

Aois domhain, tri mile naoi ccéd sechtmoghat a dó. An cedh bhliadhain
dFiacha Fionnailches, mac Fíonnachta, i righe Ereann. Nach agh
ro genair ina reimhes ro ba ceindfhiond.

Aois domhain, tri mile naoi ccéd nochat a haon. Iar mbeith fiche
bliadhain dFiachaidh Fionnailches i righe Erionn, torchair i
ccath Bregha la Berngal, mac Gedhe Ollgothaigh. As lá Fiacha
Fionnailches conrodacht Dún Chuile Sibrinne .i. Cenandus. Gach
dú ina mbiodh a arus somh ba Ceanandus a ainm. As las an righsi
cetus ro tochailte talomh i nErinn do chum uiscce do beith hi
curraibh. Ba deacmaic don connall a ioth diomfulang ina flaith.

Aois domhain, tri míle naoi ccéd nochat a dó. An céd bhliadhain do
Berngal, mac Gedhe Ollgothaigh, ós Erinn.

Aois domhain, cethre míle a trí. Iar mbeith dá bliadhain décc i righe
nEreann do Bernghal mac Gedhe Ollgothaigh do cher lá hOilill
mac Slanuill, agus la Siorna mac Dén.

Aois domhain, cethre míle a cethair. An céd bhliadhain do righe
Oiliolla, mic Slanuill, os Erind innsin.

Aois domhain, cethre mhíle anaoi decc. Iar mbeith sé bliadhna décc
dOilioll, mac Slanuill, hi righe nEreann, torchair lá Siorna
mac Dén.

Aois domhain, ceathre míle fiche. An céd bhliadhain do Siorna mac
Dén, mic Demain, hi righe nEreann innsin. As é an Siornasa,
mac Dén, ro scar flaithius Teamhra fri hUlltoibh .i. fri sliocht
Ir. As é dna ro díoghail forra Rothechtaigh mac Maoin ro
marbhsat i cCruachain, go ttorchair Berngal mac Gedhe Ollgothaigh,
agus Oilioll mac Slanoill leis.

Aois domhain, cethre míle céd sescat a naoi. Iar mbeith céd go leith
do bliadhnaibh i righe nEreann do Siorna Saoghlach, mac Déin,
do chear lá Rotheachtaigh mac Roáin i nAillinn. As é an Siorna
so ro bris cath Aircealtra for Ultaibh, dá cath Slébhe Airbhreach,
cath Cinn duín i nAssal, cath Mona Foichnigh lá hUibh Failghe
for Mairtine agus Erna, cath Luachra, cath Cláire, cath
Samhna, cath Cnuicc Ochoir. Saigidh dó for Fomhoiribh hi ccrich
Midhe. As lais bheos ro cuireadh cath Móna Troghaidhe hí
cCiannachtaibh an tan tug Lughair mac Luigdigh .i. do
shíol Emhir, forlíon dFomhoiribh i nErinn ima rígh, Ceasarn a
ainm. Attairgidh Síorna fir Ereann do chathugadh friú go Móin
Tróghaidhe. Re mbeith ag slaidhe an catha dóibh do fuirmedh támh
forra, co napadh Lughair, agus Ceasarn de co na muintir, agus
drong dírimh dferoibh Ereann amailli friú.

As a naimsir Siorna dna tobruchtadh Sciortaighe i Laighnibh,
Doailte hi Crich Roiss, Nithe i Maigh Muirthemhne, Leamhna i
Mumhain agus Sláine la hUibh Cremthainn.

Aois domhain, ceithre mile céd seachtmoghat. An céd bhliadhain do
righe Rotheachtaigh, mic Roain, ós Erinn innsin.

Aois domhain, ceithre míle céd seachtmoghat a sé. Iar mbeith seacht
mbliadhna hi righe nEreann do Rotheachtaigh, ro loiscc teni
ghealáin é hi nDun Sobhairce. Ar las an Rotheachtaigh so
arricht carpait ceithre nech ar tús i nErinn.

Aois domhain, ceithre míle céd seachtmoghat asecht. En bhliadhain
dElim Oillfhinshneachta, mac Rotheachtaigh, hi ríghe nEreann,
go torchair i ffoircend na bliadhna sin lá Giallchaidh, mac Oiliolla
Olchaoin. Ro fearadh sneachta mór go mblas fíona isin
mbliadhainsi. As aire ro gairthí Oillfhínshneachta desiumh.

Aois domhain, ceithre míle ced sechtmoghat a hocht. An ced bhliadhain
do Giallchaidh, mac Oiliolla Olchaoin, mic Síorna, i righe
nEreann.

Aois domhain, ceithre míle ced ochtmoghat a sé. Iar mbeith naoi
mbliadhna do Giallchaidh i righe nEreann do róchair la hArt
Imleach i Moigh Muaidhe.

Aois domhain, ceithre mile céd ochtmoghat a secht. An céd bhliadhain
dArt Imleach, mac Elim Oillfinshneachta, i righe nEreann innsin.

Aois domain, ceithre mhile céd nochat a hocht. Iar mbeith dá
bliadhain décc dArt Imleach i righe nEreann do cher la Nuadhat
Fionnfáil.

Aois domhain, ceithre mile ced nochat a naoi. An ceid bhliadhain do
righe Nuadhaid Finnfáil os Erinn innsin.

Aois domhain, ceithre míle dá céd triochat a hocht. Iar mbeith dá
fichet bliadhain hi righe nEreann do Nuadha Fionnfáil do cher la
Breas, mac Airt Imligh.

Aois domhain, ceithre míle dá céd triocat a naoi. An céd bhliadhain
do righe Breis mic Airt Imligh ós Erinn innsin.

Aois domhain, ceithre mile da céd cethrachat a seacht. Iar mbeith naoi
mbliadhna do Breas i righe nEreann do rochair la hEochaidh
nAptach hi Carn Conluain.

Aois domhain, ceithre míle da céd cethrachat a hocht. En bhliadhain

dEochaidh Apthach, mac Finn, hi righe nEreann, agus do rochair
i bfoircheann na bliadhna sin la Fionn, mac Bratha.

Aois domhain, ceithre mile da céd cethrochat a naoi. An céd bhliadhain
do righe Finn, mic Bratha, ós Erinn innsin.

Aois domhain, ceithre míle da céd sechtmoghat. Iar mbeith da bliadhain
ar fichit hi righe nEreann dFionn mac Bratha do cher lá Sédna
mac Breis a Mumhain.

Aois domhain, ceithre mile da chéd sechtmoghat a haon. An ceid
bhliadhain do Sedhna Ionnarraigh, mac Breis, mic Airt Imligh, hi
righe nEreann.

Aois domhain, ceithre míle da chéd nochat. Iar mbeith fiche bliadhain
hi righe nEreann do Sédhna Ionnarraidh do rochair lá Siomón
mBrec.

Aois domhain, ceithre mile da céd nochat a haon. An ced bhliadhain
do Siomón Breac, mac Aodhain Glais, i righe nEreann innsin.

Aois domhain, ceithre mile da ched nochat a sé. Iar mbeith sé
bliadhna comhlána i righe nEreann do Siomón Brec, mac Aodhain
Glais, do chear lá Duach Fionn.

Aois domhain, ceithre mile dá chéd nochat a seacht. An céd bhliadhain
do Duach Fionn, mac Sedhna Ionnarraigh, hi righe nEreann
innsin.

Aois domhain, ceithre mile trí céd ase. Iar mbeith deich mbliadhna
hi righe nEreann do Duach Fionn, mac Sedhna Ionnarraigh,
do rochair i ccath Maighe la Muireadhach Bolgrach.

Aois domhain, ceithre mile tri ced a secht. Ro caith Muiredhach
Bolgrach mí for bliadhain i righe nEreann go ttorchair i cchionn
na réé hísin la hEnda nDercc, mac Duaich.

Aois domhain, ceithre mile tri ced a hocht. An céid bhliadhain
dEnda Derg, mac Duach Find, hi righe nEreann innsin.

Aois domhain, ceithre mile trí chéd a naoi décc. Iar mbeith da
bhliadhain décc dEnna Derg, mac Duach, hi righe nEreann,
atbath do thámh i Slébh Miss go sochuidhe moir uime.

Aois domhain, ceithre mile tri ced fiche. An céd bhliadhain do
Lughaidh Iardonn, mac Enna Deirg, hi righe nEreann innsin.

Aois domhain, ceithre mile tri ched fiche a hocht. Anaoi do
Lughaidh Iardonn hi righe nEreann go ttorchair la Síorlamh
hi Raith Clochair.

Aois domhain, ceithre mile tri ched fiche a naoi. An ced bhliadhain
do Siorlamh, mac Find, mic Bratha, hi righe nEreann innsin.

Aois domhain, ceithre mile tri ched cethrachat a cethair. Iar mbeith
sé bliadhna décc do Siorlamh hi righe nEreann do rochair lá
nEochaidh nUairches.

Aois domhain, ceithre mile tri ched cethrachat a cúig. An céd
bhliadhain dEochaidh Uaircheas i righe nEreann.

Aois domhain, ceithre mile tri ced caogat asé. Iar mbeith da
bhliadhain décc dEochaidh Uairches hi righe nEreann do rochair
lá macoibh Conghail .i. Eochaidh agus Conaing.

Aois domhain, ceithre mile tri ced caogat a secht. An céd bhliadhain
do dá mac Conghail Cosccaraigh .i. Duach Teamhrach, mic Muiredhaigh
Bolgraigh .i. Eochaidh Fiadhmuine agus Conaing Beageglach,
na rioghaibh os Erinn, descart Ereann la hEochaidh, a tuaiscert
la Conaing.

Aois domhain, ceithre mile tri ced seascat a haon. Iar mbeith cuig
bliadhna i ccomrighe ós Erinn dEochaidh Fiadhmuine agus do
Conaing Begeaglach do rochair Eochaidh lá Lugaidh Laimhdherg,
mac Eathach Uairches, agus do scaradh an righe fri Conaing.

Aois domhain, ceithre mile tri ched sesccat a dó. An céd bhliadhain
do Lughaidh Laimhderg mac Eathach Uairches i righe nEreann.

Aois domhain, ceithre mile tri ced seasccat a hocht. A Secht do
Lughaidh i righe nEreann go ttorchair la Conaing, mac Congail.

Aois domhain, ceithre mile tri céd sesccat a naoi. An céd bhliadhain
do Conaing Begeaghlach, mac Congail, i righe nEreann innsin
doridhisi.

Aois domhain, ceithre mile tri chéd ochtmoghat a hocht. Iar mbeith
fiche bliadhain hi righe nEreann do Conaing Becceaglach do cher
lá hArt mac Luighdeach. As aire do beirthi Conaing Begeaglach
fris ar ní ro gabh omhan fris nach aon é cén ro mhair.

Aois domhain, ceithre mile tri ched ochtmoghat a naoi. An céd
bhliadhain dArt, mac Luighdheach, mic Eathach Uairches, hi righe
nEreann innsin.

Aois domhain, ceithre mile tri ched nochat acethair . Iar mbeith sé
bliadhna i righe nEreann dArt, mac Luighdheach, ro rochair la
Fiacha Tolgrach agus la a mac Duach Ladhrach.

Aois domhain, ceithre mile trí chéd nochat a cúig. An ceid bhliadhain
dFiachaidh Tolccrach hi righe nEreann.

Aois domhain, ceithre mile ceithre chéd a cethair. Iar mbeith deich
mbliadhna hi righe nEreann dFiachaidh Tolgrach, mac Muiredhaigh
Bolccraigh, do cher la hOilioll mac Airt i mBoirind.

Aois domhain, ceithre mile ceithre chéd a cúig. An céd bhliadhain
dOilioll Fionn, mac Airt, mic Luighdheach Laimhdercc, os Erinn
innsin.

Aois domhain, ceithre mile ceithre ced a cúig décc. Iar mbeith én
bhliadhain dég hi righe nEreann dOilioll Fionn, mac Airt, mic
Luighdeach Laimhdeirg, do rochair la hAirgetmair agus lá Duach
Ladhghair hi ccath Odhbha.

Aois domhain, ceithré mile ceithre ced a sé decc. An céd bhliadhain
dEochaidh mac Oiliolla Finn hi righe nEreann innsin.

Aois Domhain, ceithre mile ceithre ced fiche adó. Iar mbeith seacht
mbliadhna hi righe nEreann, dEochaidh, mac Oiliolla Finn,
do rochair lá nAirgetmair agus lá Duach Ladhgair hi nAine.

Aois domhain, ceithre mile ceithre chéd fiche a tri. An céd
bhliadhain dAirgetmar, mac Siorlaimh, hi righe nEreann innsin.

Aois domhain, ceithre mile ceithre chéd caoccat a dó. An deachmhadh

bliadhain fichet dAirgetmar hi righe nEreann go ttorchair lá
Duach Ladhrach agus la Lucchaidh Laighdhe mac Eathach.

Aois domhain, ceithre mile ceithre chéd caogat a trí. An céd
bhliadhain do Duach Ladhgrach, mac Fiachach Tolgraigh, hi righe
nEreann.

Aois domhain, ceithre mile ceithre chéd seasccat a dó. A deich do
Duach Ladhgrach hi righe nEreann go ttorchair lá Lughaidh
Laighdhe.

Aois domhain, ceithre mile ceithre chéd seasccat a trí. An céd
bhliadhain do Lughaidh Laighdhe hi righe nEreann innsin.

Aois domhain, ceithre mile ceithre ced seasccat anaoi. Iar mbeith
seacht mbliadhna hi righe nEreann do Lughaidh Laghdhe do chear
la hAodh Ruadh, mac mBodhairn, mic Airgedmair.

Aois domhain, ceithre mile ceithre ced seachtmoghat. An céd
bhliadhain dAodh Ruadh, mac Badhairn, hi righe nEreann.

Aois domhain, ceithre mile ceithre chéd seachtmoghat asé. Iar mbeith
seacht mbliadhna hi righe nEreann dAodh Ruadh, mac Badhairn,
ro fagoibh an righe ag Dithorba, mac Demain, iar ccaithemh an ceid
shealoid dó budhein, ar ro batur ratha fair ima tealgadh uadh i
ccionn seacht mbliadhna do Diothorba, agus ar Diothorba bheós ima
légadh uadh do Ciombaoth iar seacht mblíadhna oile, agus amhlaidh sin
iar nurd go forbadh a fflatha. As aire do ronsat an chora ísin
immon righe ar robtar meic trí nderbrathar.

Aois domhain, ceithre mile ceithre ced seachtmoghat, asecht. An ced
bhliadhain do Diothorba, mac Demain, hi righe nEreann.

Aois domhain, ceithre mile ceithre ched ochtmoghat atri. Iar mbeith
seacht mbliadhna hi righe nEreann do Diothorba, mac Demain, ro
fhagaibh an righe ag Ciombaoth, mac Fionntain, uair ba dó rainic an
seal iar nDiothorba.

Aois domhain, ceithre mile ceithre ced ochtmoghat a cethair. An ced
bhliadhain do Ciombaoth mac Fionntain hi righe nEreann innsin.

Aois domhain, ceithre mile ceithre ced nochat. Iar mbeith seacht
mbliadhna hi righe nEreann do Ciombaoth, mac Fionntain, ro
fagoibh an righe ag Aodh Ruadh, mac Badhairn.

Aois domhain, ceithre mile ceithre chéd nochat a seacht. Iar mbeith
seacht mbliadhna hi righe nEreann an dara feacht dAodh Ruadh,
mac Badhairn, ro fhagaibh an righe ag Diothorba do ridhisi.

Aois domhain, ceithre mile ceithre ced nochat a hocht. An ced
bhliadhain do Diothorba, mac Demain, an dara feacht ro gabh righe
nEreann.

Aois domhain, ceithre mile cúig cet a cethair. Iar mbeith seacht
mbliadhna do Diothorba don chur sin hi righe nEreann ro
fhagoibh a sheal ag Ciombaoth, mac Fionntuin.

Aois domhain, ceithre mile cúigh chéd a cúig. An céd bhliadhain do
Ciombaoth an dara feacht ro gabh righe nEareann.

Aois domhain, ceithre mile cúig chéd a haon ndécc. Iar mbeith
seacht mbliadhna do Ciombaoth hi righe nEreann, an dara feacht,
ro fhagoibh an righe ag Aodh Ruadh, mac Badhairn.

Aois domhain, ceithre mile cuig chéd a dó décc. An céd bhliadhain
dAodh Ruadh, mac Badhairn, hi righe nEreann (an tres feacht ro
gabh an righe) innsin.

Aois domhain, ceithre mile cúig chéd a hocht décc. Iar mbeith secht
mbliadhna hi righe nEreann dAodh Ruadh, mac Badhairn, (an tres
feacht ro gabh righe) ro báidhedh i nEass Ruaidh, co ro hadhnacht
isin sith ós ur in esa, conadh uadha do garar Síth Aodha, agus Eass
Aodha Ruaidh.

Aois domhain, ceithre mile cúig ched a naoi décc. An ced bhliadhain
do Diothorba, an tres feacht ro gabh righe nEreann.

Aois domhain, ceithre mile cúig ced fiche a cúig. Iar mbeith seacht
mbliadhna do Diothorba hi righe nEreann (an tres feacht) ro
fagoibh an righe ag Ciombaoth.

Aois domhain, ceithre mile cúig chét fiche asé. An céd bhliadhain
do Ciombaeth i righe nEreann an tres feacht ro gabh an righe
innsin.

Aois domhain, ceithre mile cuig céd triochat adó. Iar mbeith seacht

mbliadhna hi righe nEreann do Cimbaoth an tres feacht, ro raidh
Macha inghen Aodha Ruaidh, mic Badhairn, ba lé seal a hathar don
righe. Atbert Diothorba agus Ciombaoth ná tiobradaís righe do
mhnaoi. Feachair cath etorra, brisis Macha forra go ros ionnarb
Diothorba co na chloinn hi cConnachtaibh co torchair i ccorann.
Do bert iarsin Ciombaoth cuicce do céili di, agus do bheir in righe
dó. Do choidhsi iaromh na haonar hi cConnachtaibh, agus tug clann
Diothorba lé i ndaorcengal co hUltoibh a los a neirt, agus do bert
iad fo trom daoire go ro claidhset Ráth Eamhna dhi, go madh si budh
priomhchathair Uladh do ghrés.

Aois domhain, ceithre mile cúig ced triochat atrí. An céd bhliadhain
do Ciombaoth hi righe nEreann iar na thabhairt cuicce do Macha
mar chele.

Aois domhain, ceithre mile cúigh chéd triochat anaoi. Iar mbeith
seacht mbliadhna hi righe nEreann do Ciombaoth mac Fiontain, iar
na tabhairt cuice do Macha, atbail i nEamhoin Macha. As é céd rí
Eamhna an Ciombaoth hísin.

Aois domhain, ceithre mile cuig ced cethrachat. An céd bhliadhain do
Macha hi righe nEreann iar neg do Ciombaoth mic Fiontainn.

Aois domhain, ceithre mile cuig ced cethrachat asé. Iar mbeith seacht
mbliadhna hi righe nEreann do Macha mongruaidh, inghen Aodha
Ruaidh, mic Badhairn, do cher la Reachtaidh Righdercc, mac
Luighdheach. As hí Macha ro forail for macoibh Diothorba (iar na
ttabhairt fo daoire) Raith Eamhna do claidhe, gomadh si
priomhchathair Uladh do ghres, amhail rémraidhsem, agus ba he
Ciombaoth agus Macha ro oil Ughaine Mór.

Aois domhain, ceithre mile cúig céd cethrachat a seacht. An céd
bhliadhain do Reachtaidh Righdercc, mac Luigdheach, hi righe
nEreann.

Aois domhain, ceithre mile cuig céd seasccat asé. Iar mbeith fiche
bliadhain i righe nEreann do Reachtaidh Righdercc, mac
Luighdheach, do rochair la hUghaine Mor a ndioghail a bhuime .i.
Macha Mongruadh.

Aois domhain, ceithre mile cuig ced seasccat a seacht. An céd
bhliadhain dUghaine Mór, mac Eathach Buadhaigh, hi righe
nEreann innsin.

Aois domhain, ceithre mile sé ced asé. I fforchend na bliadhna so,
iar mbeith cethrachat bliadhain comlán dUghaine mhór na rígh
Ereann agus iarthoir Eorpa go hiomlán go muir Toirrian,
do rochair la Badbchadh, i tTealach

an chosgair i Maigh Muireadha i mBreghoibh. As é an tUghaine
sin ro gabh ratha na nuile dúl aicsidhe agus nemhaicsidhe for fiora
Ereann go coitcend, gan iomchosnamh im righe nEreann fria a
chloinn go bráth na fria shíol bheós.

Badbchadh, mac Eachdhach Buadhaigh, iar nUghaine Mór lá go leith
isin righe, go ros marbh Laoghaire Lorc, mac Ughaine, a ndioghail
a athar.

Aois domhain, ceithre mile se chéd aseacht. An céd bhliadhain do
Laoghaire Lorc, mac Ughaine Mhoir, hi righe nEreann innsin.

Aois domhain, ceithre mile sé chéd a hocht. Iar mbeith dá
bhliadhain hi righe nEreann do Laoghaire Lorc, mac Ughaine,
do rochair la Cobhthach Caol mBregh hi ccarman.

Aois domhain, ceithre mile se chéd anaoi. An céd bhliadhain do
Cobhthach Caol Bhregh hi righe nEreann indsin.

Aois domhain, ceithre mile sé chéd caogat a hocht. Iar mbeith
caogatt bliadhain i righe nEreann do Cobhthach Caol Bregh, mac
Ughaine Mhóir, do rochair la Labhraidh Loingseach, Maen mac
Oiliolla Aine, co ttriochaid riogh ime hi nDionn righ for bhrú
Berbha.

Aois domhain, ceithre mile sé chéd caogat anaoi. An céd bhliadhain
do Labhraidh Loingseach hi righe nEreann.

Aois domhain, ceithre mile sé chéd sechtmoghat aseacht. Iar mbeith
naoi mbliadhna décc do Labhraidh Loingseach, Maen mac Oiliolla
Aine, mic Laoghaire Luirc, mic Ughaine Móir, i righe nEreann
do rochair lá Melghe Molbhthach, mac Cobhthaigh Caoil Bregh.

Aois domhain, ceithre mile sé chéd seachtmoghat a hocht. An céd
bhliadhain do Melghe Molbhthach, mac Cobhthaich Chaoil Bregh,
hi righe nEreann innsin.

Aois domhain, ceithre mile sé chéd nochat a cethair. Iar mbeith
seacht mbliadhna dég hi righe nEreann do Melghe Molbthach, mac
Cobthaigh Caoil Bregh, do cher i ccath Cláire lá Modhcorb. An
tan ro chlas a fheart as ann ro meabhaidh Loch Melghe fo tír hi
ccoirbre, conidh uadha ainmnighther.

Aois domhain, ceithre mile sé chéd nochat a cúig. An céd bhliadhain
do Modhcorb mac Cobhthaigh Caoimh, hi righe nEreann.

Aois domhain, ceithre mile seacht ccéd a haon. Iar mbeith seacht
mbliadhna hi righe nEreann do Modhcorb mac Cobthaigh Caoimh
do rochair la hAenghas Ollamh.

Aois domhain, ceithre mile seacht ccéd, adó. An céd bhliadhain
dAengus Ollamh, mac Oiliolla, mic Labhradha, hi righe nEreann.

Aois domhain, ceithre mile secht ccéd anaoi dég. A hocht décc
dAengus Ollamh mac Oiliolla, mic Labhradha, go ttorchair la
hIrereo, mac Melghe, i bfoirchend na ree hisin.

Aois domhain, ceithre mile secht ced fiche. An céid bhliadhain
dIrereo, mac Melghe Molbhthaigh, hi righe nEreann.

Aois domhain, ceithre mile secht ced fiche asé. Iar mbeith secht
mbliadhna

hi righe nEreann dIrereo, mac Melghe, do rochair la Fercorb
mac Modha cuirb.

Aois domhain, ceithre mile secht cced fiche aseacht. An céid
bhliadhain dFiorcorb, mac Modha Cuirb, hi righe nErionn.

Aois domhain, ceithre mile secht ccéd triochat a secht. Iar mbeith
én bhliadhain dég hi righe nErionn dFior Corb do rochair la
Connla Caomh mac Irereo.

Aois domhain, ceithre mile secht cced triochat a hocht. An céid
bhliadhain do Connla Caomh hi righe nEreann.

Aois domhain, ceithre mile secht ccéd caogat a secht. Iar mbeith
fiche bliadhain hi righe nEreann do Conla Caomh atbail i
tTemhraigh.

Aois domhain, ceithre secht ccéd caogat a hocht. An céd
bhliadhain dOilioll Caisfiaclach, mac Connla Caoimh, hi righe
nEreann.

Aois domhain, ceithre mile secht ccéd ochtmoghat adó. Iar mbeith
cúig bhliadhna fichet hi righe nEreann dOilill Caisfhiaclach,
mac Connla Caoimh, mic Irereo, do rochair la hAdamar mic
Fircuirb.

Aois domhain, ceithre mile secht ccéd ochtmoghat a tri. An ced
bhliadhain dAdamar mac Fircuirb, os Erinn.

Aois domhain, ceithre mile secht ced ochtmoghat asecht. An cúigeadh
bliadhain dAdamar, mac Fircuirb, hi righe nEreann, go ttorchair
la hEochaidh nAiltlethan.

Aois domhain, ceithre mile secht ccéd ochtmoghat a hocht. An céid
bhliadhain dEochaidh Ailtlethan hi righe os Erinn.

Aois domhain, ceithre mile ocht ced a cethair. Iar mbeith seacht
mbliadhna décc hi righe uas Erinn dEochaidh Ailtlethan, mac
Oiliolla Caisfhiaclaich, do rochair lá Ferghus Fortamhail.

Aois domhain, ceithre mile ocht ced a cúig. An céd bhliadhain
dFerghus Fortamhail, mac Bresail Bric, hi righ nEreann.

Aois domhain, ceithre mile ocht ced a cúig décc. Iar mbeith én
bhliadhain décc i righe nEreann dFearghus Fortamhail, mac
Bresail Bric, do rochair lá hAonghus Tuirmhech hi ccath
Teamhrach.

Aois domhain, ceithre mile ocht ccéd ase décc. An céd bhliadhain
dAenghus Tuirmeach Teamhrach hi righe nEreann.

Aois domhain, ceithre mile ocht cced seachtmoghat a cúig. Iar mbeith
sesccat bliadhain hi righe nEreann dAenghus Tuirmeach Temhrach
atbail hi tTeamruigh. Aonghus Tuirmeach do ghairm dhe, ar as
cuicce tuirmidthear saor clanna Síl nEireamhoin.

Aois domhain, ceithre mile ocht cced sechtmoghat asé. An céd
bhliadhain do Conall Collamrach, mac Etersceoil, na righ ós
Erinn.

Aois domhain, ceithre mile ocht ccéd ochtmoghat. Iar mbeith cúig
bliadhna hi righe nEreann do Conall Collamrach, mac Etersceoil
Temhrach, mic Eathach Ailtlethan, do rochair lá Nia Sedhamain.

Aois domhain, ceithre mile ocht ccéd ochtmoghat ahaon. An céid
bhliadhain do Nia Sedhamain, mac Adhamair, hi righe nEreann.

Aois domhain, ceithre mile ocht cced ochtmoghat asecht. Iar mbeith
secht mbliadhna hi righe nEreann do Nia Sedhamain, mac
Adhamair, do rochair la hEnna Aighneach. As a naimsir an rígh
Niadh Sedhamain do blightea ba agus ellte fo aenchoma.

Aois domhain, ceithre mile ocht cced ochtmoghat ahocht. An ceid
bhliadhain dEnna Aighneach os Erinn.

Aois domhain, ceithre mile naoi cced a secht. Iar mbeith fiche
bliadhain

hi righe nEreann dEnna Aighnech, mac Aonghasa Tuirmigh
Temhrach, do rochair lá Criomthann Cosccrach hi ccath Aird
Cremhthainn.

Aois domhain, ceithre mile naoi cced a hocht. An céid bhliadhain do
Criomthann Cosccrach, mac Felimidh, mic Ferghusa Fortamhail, hi
righe nEreann.

Aois domhain, ceithre mile naoi ced a haon ndécc. Iar mbeith
ceithre bliadhna hi righe nEreann do Criomhthann Cosccrach
do rochair la Rudhruighe, mac Sithrighe.

Aois domhain, ceithre mile naoi ccéd a dó décc. An céid bhliadhain
do Rudhruighe, mac Sithrighe, hi righe nEreann.

Aois domhain, ceithre mile naoi cced ochtmoghat a haon. Iar mbeith
sechtmoghat bliadhain hi righe nEreann do Rudhruighe, mac
Sithrighe, mic Duib mic Fomhoir, mic Airgetmair, adbail i
nAirgetgliond. As las an Rudhruighe si ro meabhsat na catha so fo
Eirind. Cath Cuirce, cath Luachra, seacht ccatha hi ccliú,
cath Gleandamhnach, cath Sleibhe Mis, cath Boirne, cath Ren,
cath Ai, cath Cúile Silinde, da cath Fortraiscc.

Aois domhain, ceithre mile naoi cced ochtmoghat a dó. An ceid
bhliadhain dIondadmar, mac Nia Sedhamain, hi righe ós Erinn.

Aois domhain, ceithre mile naoi cced nochat. Iar mbeith naoi
mbliadhna hi righe nEreann dIonnatmar, mac Nia Sedhamain,
do rochair la Breasal Boidiobhadh, mac Rudhruighe.

Aois domhain, ceithre mile naoi ced nocha a haon. An céid bhliadhain
do Bresal Boidiobhadh i righe nEreann.

Aois domhain, cúig mile a haon. Iar mbeith en bhliadhain décc na
righ os Erinn do Breasal Bóidiobhadh, mac Rudhruighe, do rochair
la Lughaidh Luaighne. Bóár mór i nErinn hi reimhius Bresail.

Aois domhain, cúicc mile a dó. An céid bhliadhain do Lughaidh
Luaighne, mac Iondatmair, hi righe nEreann.

Aois domhain, cúicc mile a sé décc. An cúigeadh bliadhain décc do
Lughaidh Luaighne, mac Iondatmair, hi righe nEreann, go
ttorchair la Congal Claroinech, mac Rudhruighe.

Aois domhain, cúig mile a secht décc. An céd bhliadhain do Congal
Claroineach hi righe nEreann.

Aois domhain, cúig mile triocha a haon. Iar mbeith cúig bliadhna
décc hi righe nEreann do Congal Claroinech, mac Rudhruighe,
do rochair la Duach Dallta Deadhadh.

Aois domhain, cuig mile triocha a dó. An céid bhliadhain do Duach
Dallta Deadhadh, mac Cairbre Luiscc, hi righe nEreann.

Aois domhain, chúig mile cethracha a haon. Iar ccaithemh deich
mbliadhon hi righe nEreann dho Duach Dallta Deadhadh, mac
Cairbre Luiscc, do rochair lá Fachtna Fathach.

Aois domhain cuig mile cethracha a dó. An céid bhliadhain
dFhachtna Fathach hi righe nEreann.

Aois domhain, cuig mile caoga a secht. Iar mbeith sé bliadhna décc
dFachtna Fathach, mac Rosa, mic Rudhruighe, hi righe nEreann
do chear la hEochaidh fFedhlech.

Aois domhain, cúig mile caoga a hocht. An céid bliadhain dEochaidh
Feidhleach hi righe ós Erinn.

Aois domhain, cúig mile seascca a naoi. Iar mbeith da bliadhain décc
hi righe nEreann dEochaidh Feidhleach, mac Find, mic
Fiondlogha, atbail i ttemhraigh.

Aois domhain, cúicc mile seachtmoghat. An céid bhliadhain dEochaidh
Airemh (derbhrathair Eathach Feidhligh) hi righe nEreann.

Aois domhain, cuicc mile ochtmoghat a cethair. Iar ccaithemh cóig
mbliadhna ndécc hi righe nEreann dEochaidh Airemh ro
loiscceadh lá Sioghmall hi fFremhaind.

Aois domhain, cuicc mile ochtmoghat a cúig. An céd bhliadhain
dEderscél, mac Eoghain, mic Oiliolla, na rígh ós Erinn.

Aois domhain, cúig mile ochtmoghat anaoi. Iar ttochaithemh cóicc
mbliadhan hi righe nEreann dEderscel, mac Eoghain, mic Oiliolla,
do rochair la Nuadha Neacht, i nAillind.

Aois domhain, cuicc mile nochat. Iar ccaithemh leithbhliadhna hi
righe nEreann do Nuadha Necht, mac Sedna Sithbhaicc, torchair
hi ccath Cliach i nUibh Dróna lá Conaire Mór. Leithbhliadhain
comhfhlaithis cloinne Eimhir Find hi ccenn na leith bhliadhan so
Nuadhat Necht comhlánaighes nochat as cúig míle bliadhain i naois
domhain.

Aois domhain, cuicc mile nocha a haon. An ceid bhliadhain do
Conaire Mór, mac Etersceóil, i righe nEreann.

Aois domhain, cuicc mile ced seascca. Iar mbeith sechtmoghat bliadhain
hi righe nEreann do Conaire Mór, mac Etirsceoil, do rochair hi
mBruighin da Derg la díbheargaibh. As a fflaith Conaire do
chuireadh an mhuir torchar gach bliadhna fa thír i nInbher Colpa
do shonnradh. Do gebthi bheós cna iomhais for Bhóind agus
Bhuais fria linn. No biodh na cethra gan comhda a nErinn ina
flaith, ar mhéd an tsíodha agus an chaenchomhraic. Nír bo toirneach
ainbhtionach a fhlaith, ar ní bhuingeadh gaoth cairche a hindlibh ó
mhedhon foghmair go medhon Earraigh. Suaill ná feacdaois na feadha
daidhble a measa fria linn.

Aois domhain, cuicc mile ced seascca a haon. An céd bhliadhain
dErinn gan rígh iar cConaire.

Aois domhain cuig mile ced seascca asé. An céid bhliadhain do
Lughaidh Sriabh ndercc hi righe nEreann.

Aois domhain, cúig mile ced nochat a haon. Iar mbeith sé bliadhna
fichet hi righe nEreann do Lughaidh Sriabh ndercc atbath do
chumhadh.

Aois domhain, cúig mile ced nochat adó. Aon bliadhain do Concubhar

Abhradhruadh, mac Finn Filedh, mic Rossa Ruaidh, mic Ferghusa
Fairrghe, hi righe nEreann go ttorchair la Criomhthann, mac
Luighdheach Sriabh ndercc.

Aois domhain, cuig mile céd nochat a trí. An céid bhliadhain do
Criomhthann Niadhnáir, mac Luigdheach, hi righe nEreann.

Aois domhain, cuicc mile céd nochat a cethair. An dara bliadhain do
Criomhthann.

DAOIS Criost.

An céd bhliadhain daois Críosd, agus an tochtmadh bliadhain do righe
Criomhthainn Niadhnáir.

Aois Criost, a naoi. A se décc do Criomhthann hi righe nEreann,
go nerbailt i nDún Criomthainn, i nEdair, iar ttoidheacht don
eachtra oirrdheirc fors a ndeachaidh. As don eachtra sin tug lais na
seóid adhamhra imon ccarpat nórdha, agus imon ffithchill nóir, go
ttríbh ccédoibh geam gloinidhe innte, agus imon ccédaigh
cCriomhtainn, léne saineamhail isidhe co mbreachtradh órdha. Do
bhert cloidhemh cathbhuadhach co niolar naithreach do mhaisi óir
aithleaghtha ar na rionnadh ann, sciath co mbocóidibh airgit aengil,
sleagh da nach térnodh oen no gonta dhi, tabhall as nach teillccti
urchor niomraill, agus da choin go

slabhradh ngeal arccaid etorra. Ro bfiú céd cumhal an slabhradh
hisin maille le móran do sedoibh oile.

Aois Criost, a deich. An céd bhliadhain do righe Cairpre Cinncait,
iar marbhadh na saorchlann dó cen motha uathadh térna as an orcoin in
ro hortadh na huaisle las na hAitheachthuathoibh. Atiad na trí
saoir atrullatur uatha an ionbhaidh sin. Feradhach Fionnfechtnach,
ottád síol cCuinn Cédcathaigh, Tiobraide Tireach, ottád Dál
nAraidhe, agus Corb Olum, ottád rioghraidh Eoghanachta hi
Mumhain. Agus cidh iadsidhe bá hi mbronnaibh a maithreach
luidhsiot tairis. Baine inghen righ Alban ba mathair
dFearadhach Fionnfechtnach, Cruife inghen rígh Bretan mathair
Cuirb Oluim, agus Aine inghen rígh Saxan máthair Tiobraide
Tírigh.

Aois Criost, a cethair décc. Iar mbeith cúig bliadhna hi righe
nEreann do Chairbre Caitcend atbath. Olc tra ro boí Ere fria
reimhiussiomh, aimbrith a hioth, ar ní biodh acht en gráine ar an
cConall, ettorthach a hinbhir, dioscc a cethra, neimhlionmar a mes,
ar ní biodh acht aen derc ar an ralaigh.

Mac don Cairbre hisin an Morann moireolach fris a raite Morann
mac Maoin. Aois Criost, a cúig decc. An céd bhliadhain
dFeradhach Fionnfechtnach na righ ós Erinn. Maith tra ro
ro boi Eire fria linnsiomh. Robdar certa suaimnech na síona.
Túismis an talamh a toradh. Iasccmhar na hinbhiora, blechtmhara na
buair, ceanntrom na coillte.

Aois Criost, triocha a sé. Iar ccaithemh dá bhliadhain ar fichitt
hi righe nEreann dFeradhach Fiondfechtnach, mac Criomhthainn
Niadhnáir, ro écc hi tTemhraigh.

Aois Criost, triocha a secht. An céd bhliadhain dFiatach Fiond,
mac Daire, mic Dluthaigh, hi righe nEreann.

Aois Criost, triocha anaoi. Iar mbeith tri bliadhna hi righe
nEreann don

Fiatach Fionn so (o ttád Dal fFiatach i nUltaibh) do rochair
la Fiacha Fionnfolaidh.

Aois Criost, cethracha bliadhain. An céd bhliadhain do righe
Fiachach Fionnfolaidh ós Erinn.

Aois Criost, caoga a sé. Iar mbeith secht mbliadhna décc hi ríghe
nEreann dFiachaidh Fionnfolaidh ro marbhadh é las na
coiccedhchaibh tre comhairle na nAithechtuath i norccain Moighe
Bolg. Atiad na coiccedhaigh las a ttorchair. Elim mac Connrach
rí Uladh, Sanbh mac Ceit, mic Magach, righ Connacht, Foirbre
mac Fine rí Mumhan, agus Eochaidh Aincend rí Laighen. Ní
fairgoibhsiomh do cloinn achtmadh aen mac boí hi mbroinn Ethne
inghen rí Alban, Tuathal adacomhnaic.

Aois Criost, caocca seacht. An céd bhliadhain do righe Elim mic
Conrach.

Aois Criost, sechtmoghat a sé. Iar mbeith fiche bliadhain hi righe
os Erinn dElim mac Conrach do rochair hi ccath Aichle la
Tuathal Techtmhar. Do rad Dia dioghla hi ccionaidh a mighníomh
for Aithechthuathoibh fri reimhius Elim isin ríghe .i. Ere do
bheith gan ioth, gan bliocht, gan mes, gan iascc, agus gan nach
mórmhaith aile, o ro mharbhsat Aithechthuatha Fiacha Fionnoladh
ind orgain Moighe Bolg go ré Thuathail Techtmair.

Aois Christ, céd a sé. Iar mbeith triocha bliadhain hi righe
nEreann do Tuathal Techtmar torchair lá Mal mac Rochraidhe ri
Uladh hi Moigh

Line, hi Moin in chatha, i nDal Araidhe an bail as a mbrúcht
Ollar agus Ollarba an da abhuinn. Ceanngubha ainm an chnuic in
ro marbhadh somh febh dearbhus an rann:

Ollar agus Ollarba,
Ceann gubha triathach tuathach,
nibdar anmonda gan adhbhar,
an lá do marbadh Tuathal.

Agus amhail as rubradh bheos,

Tuathal diar ffine feronn,
flaith Midhe milibh galann,
gaotta flaith Fremhann finne
hi re cnuic Glinde an Gabhann.

Aois Christ, céd a seacht. An chéd bhliadhain do Mal, mac
Rochraidhe, mic Cathbhadha, hi righe nEreann.

Aois Christ, céd a deich. Iar mbeith ceithre bliadhna na righ ós
Erind do Mal, mac Rochraidhe, do chear la Feidhlimidh Rechtmhar.

Aois Criost, ced a haon ndécc. An ceid bhliadhain dFeidhlimidh
Rechtmhor, mac Tuathail Techtmhair, na righ os Erinn. Baine
inghen Scáil máthair an Fedhlimidh si. As uaithe ainmnighther
Cnoc mBáine la hOirgiallaibh, ar is ann ro hadnaichtsi. As lé
beos ro clasadh Ráith Mor Mhaighe Lemhna i nUlltoib.

Aois Criost, ced anaoi décc. Iar mbeith naoi mbliadhna hi righe
nEreann dFeidlimidh Reachtmhar atbail.

Aois Chriost, ced fiche. An céd bhliadhain do Cathaoir Mór, mac
Feidhlimidh Firurglais, hi righe nEreann.

Aois Chriost, ced fiche adó. Iar mbeith tri bliadhna na righ os
Erinn do Cathaoir Mor do cear la Conn, agus la Luaighnibh
Teamhra, hi gcath Moighe hAgha.

Aois Chriost, céd fiche a trí. An ceid bhliadhain do Conn
Cedcathach na righ os Erinn. A noidhce geine Cuinn forrith
cóicc príomhróid go Temhraigh na ro taidhbhredh riamh go sin. Atiatt
a nanmanna, Slighe Asail,
Slighe

Miodhluachra, Slíghe Cualann, Slighe Mór, Slighe Dála. Slighe
Mór tra as isidhe Esccir Riada .i. sabhronna Ereann a dó etir
Chonn agus Eoghan Mór.

Aois Chriost, ced caocca a seacht. Iar mbeith cúig bliadhna triocha
hi righe nEreann do Conn Cedcathach torcair la Tiobraide
Tireach, mac Mail, mic Rochraidhe, ri Uladh hi tTuaith Amrois.

Aois Christ, céd caocca a hocht. An ceid bhliadhain do Conaire,
mac Modha Lamha, hi righe uas Erinn.

Aois Chriost, ced seascca a cuig. Iar mbeith ocht mbliadhna hi
righe nEreann do Chonaire, mac Modha Lamha, torcair la Neimhidh
mac Sruibhginn. Tri meic lais an cConaire hisin, Coirbre Muscc,
ó raiter Musccraighe, Cairpre Bascain, o ttádh Baiscnigh hi
cCorca Baisccinn, agus Cairpre Riata, o bfuilit Dál Riata.
Saraid inghion Cuinn Cedcathaigh mathair na mac sa Conaire, mic
Modha Lamha.

Aois Christ, ced seascca asé. An ced bhliadhain do righe Airt, mic
Cuinn Cedcathaigh.

Aois Criost, ced ochtmogat asé. A haon fichet dArt, mac Cuinn
Cedcathaigh, hi righe nEreann. Cath Cind Feabrat ria macaibh
Oiliolla Auluim, agus rias na tri Coirbribh (clann Conaire, mic
Modha Lamha .i. Cairbre Múscc, Cairpre Riada agus Cairpre
Bascain) for Dadera drai, for Nemhidh mac

Sroibcind, agus for deiscert nEreann, du hi ttorcair Nemidh, mac
Sroibcinn, rí Erna Mumhan, agus Dadera Druth Dairine, do cear dna
Dadera la hEogan, mac Oiliolla, do cear Nemidh, mac Sroibginn,
la Cairbre Rigfhoda, mac Conaire, a ndioghail a athar .i. Conaire
budein. Ro gon Cairbre Musc Lughaidh .i. Mac Con ina cholpta, gur
bo bacach iaromh. Is é fáth an foranma sin mar do bhi Lughaidh
taithnemhach do choin do bhí acc biathadh a coilen a ttigh a oidedh,
agus do ibheadh as ballan na con remhraite, gur lean Mac con de.

Aois Criost, ced nochat acuicc. Iar mbeith triocha bliadhain hi
righe nEreann dArt, mac Cuinn Cédcathaigh, torchair hi ccath
Moighe Mucraimhe la Mac Con go na allmarchoibh. Torcratar beos
isin cath cedna maraon re hArt, meic a Sethar Saidbe ingine Cuind
.i. seacht maca Oiliolla Oluim, tangatur lais i naghaidh Mic Con
a nderbrathar, Eoghan Mór Dubhmerchon, Mughcorb, Lughaidh,
Eochaidh, Dichorb, agus Tadcc a nanmanna, agus Béinne Briot,
ri Bretan ro imir lamha forra. Torchair Beinde la Lughaidh Lagha
a ccionaidh a bhráithrech. Liogairne Leacanfhoda, mac Aengusa
Bailbh, mic Eathach

Finnfuathnairt, ro imbir lamha for Art isin cathsin Moighe
Muccroimhe, iar ttocht do hi sochraide Mic Con.

Aois Criost, céd nochat asé. An céd bhliadhain do Lughoidh, (.i.
Mac Con) mac Maicniadh, hi righe nEreann.

Aois Criost, da ced fiche acuig. Iar mbeith triocha bliadhain i
righe nEreann do Lughaidh (.i. Mac Con), mac Maicniadh, torcair do
laimh Feircis, mic Comain Ecis, iar na ionnarbadh a Temraigh do
Cormac ua Chuinn.

Aois Criost, da chéd fiche asé. Ferghus Duibhdhedach, mac
Iomchadha, na righ ós Erinn fri ré mbliadhna, co ttorchair, hi
ccath Crionna, la Corbmac ua Cuind, do laimh Logha lagha.
Torcratar lais beós a da bhrathair, Ferghas Foiltleabhar, agus
Ferghus Bot, tar Bregaibh, da ngoirthi Ferghus Caisfhiaclach.
Is doibh ro ráidheadh:

For an aoinlicc ag Ráith cró
foirtbhe na ttri fFerghusó,
atbert Corbmac as gle
ni chel a dae for Laighe.

I sochraide Corbmaic tainic Tadhg mac Céin agus Lughaidh don
chath hishin, agus ba i tirfocraic an chatha do rata o Chorbmac
do Thadhg an feronn forsa ttá Ciannachta, i Muigh Bregh,
amhail as erdheirc i leabhraibh oile.

Aois Criost, da chéd fiche a seacht. An ched bhliadhain do
Corbmac, mac Airt, mic Cuinn Chedchathaigh, na rígh ós Erind.

Aois Criost, da chéd triochat a cethair. A hocht do Chorbmac.
Ailill Olom, mac Mogha Nuadhat, ri Mumhan, dég.

Aois Criost, da chéd triochat a sé. A dech do Chorbmac. Cath
Granaird ria cCorbmac ua cCuinn for Ultoibh an bhliadhainsi.
Cath in hEu hi Moigh Aei for Aedh, mac Eachdach, mic Conaill,
rí Connacht. Cath i nEth, cath Cinn Daire, cath Srutha for
Ultoibh, cath Slicche Cuailnge.

Aois Criost, da chéd triochat a secht. A haon décc do Chorbmac.
Cath Atha beathaig. Cath Ratha Dumha an bliadhainsi ria
cCorbmac.

Aois Criost, da chéd triochat a hocht. A do do dhécc do Corbmac.
Cath Chuile tochair fo trí, agus trí catha hi nDubadh ria
cCorbmac.

Aois Criost, da chéd triochat anaoi. A tri décc do Chorbmac.
Cath Allamaigh, agus secht ccatha Elne ri cCorbmac.

Aois Criost, da chéd cethrachat. A cethair decc do Chorbmac. Cath
Moighe Techt, agus loinges Chorbmaic tar maigh Rén (.i. tar an
ffairge) an bhliadhain sin, conid don chur sin ro ghabhastairsiomh
righe nAlban.

Aois Criost, da chéd cetrachat a haon. A cuig décc do Chorbmac.
Attiad andso catha Chorbmaic for Mumhain an bhliadhainsi. Cath
Beirre, cath Locha Lén, cath Luimnigh, cath Grene, cath
Clasaigh, cath Muirisc,

cath Ferta hi torchoir Eochaidh Taobhfoda, mac Oiliolla Oluim,
cath Samhna hi torchair Cian, mac Aileallo Oluim, agus cath
Arda caim.

Orgain na hingenraighe, isin Claoinferta hi tTemhraigh, la
Dunlang, mac Enna Niadh, rí Laigin. Triocha righingen a líon,
agus céd ingen la gach ninghin díobh. Dá rígh décc do Laighnibh ros
bí Corbmac ar galaibh aoinfhir, i ndioghail na hoirgne hisin,
amailli re foshnaidhm na boramha co na tormach iar tTuathal.

Aois Criost, da chéd agus cethrachat a hocht. A dó fichet do
Chorbmac. Cath hi Fochaird Muirthemhne ria cCorbmac an
bhliadhainsi.

Aois Criost, da céd sescca a dó. A sé triocha do Chorbmac. Cath
Críonna Fregabhail ria cCorbmac for Ulltoibh, du hi ttorchair
Aongus Fionn, mac Ferghusa Duibhdéadaigh, rí Uladh, go nár
Uladh imme.

Aois Criost, da chéd seasca a cuig. A naoi triocha do Chorbmac.
Guin Ceallaigh, mic Chorbmaic, agus Rechtaire Chorbmaic, agus súil
Chorbmaic budhein do bhrisedh daen fhorccom la hAengus
Gaibhuaibhtheach, mac Fiachach Suighdhe, mic Feidhlimidh Reachtadha.
Ro bhris iaramh Corbmac seacht ccatha fors na Déisibh a
ccionaidh an ghniomha sin, go ros tafainn ó a ttír, conus filid hi
Mumhain.

Aois Criost, da céd seascc a sé. Cetracha bliadhain do Corbmac, mac
Airt, mic Cuind, hi righe nEreann go bfuair bás i cCletech
iar lenmhain cnáimh

bradáin ina bhraghait, tres an siabhradh ro imir Mailgenn drai
fair, iar niompodh do Corbmac ar na draoithibh fo bithin adharta Dé
dó tairsibh. Conadh aire sin ro aimsigh diabhal eisiumh tre furaileamh
na ndruadh go ttuc bás dochraidh dó. As é Corbmac do thracht
teguscc na righ do comhda modh, bes, agus follamhnaighthe na righe.
Ughdar oirdherc eisidhe i ndlighthibh, hi ccoimgnibh, agus hi
senchus, ar asé ro shíol recht, riaghail, agus dirgiatadh gacha haoi,
agus cecha caingne iar ccóir, conadh hé an dligheadh ro smacht for
chách baoi for congbhail leo gus an aimsir freacnairc.

A sé an Corbmac so, mac Airt, beos ro thionóil croinicidhe
Ereann co haon mhaighin go Temraigh, gur ro forcongair forro
croinic Ereann do scríobhadh in nen liubar dar bo hainm psaltair
Temhrach. Ba hisin liubar sin batar coimgneadha agus comhaimsera
rioghraidhe Ereann fri ríoghaibh agus impireadha an domhain, agus
ríogh na ccoicceadh frí ríoghaibh Ereann. As ann dna ro scriobhadh
ina ndlighfeadh rí Ereann do na coiccedhachaibh agus cios agus
dlighedh na ccoicceadh o a fomhámaighthibh o tha uasal co híseal.
Ba han tra baoi crioch agus torann Ereann or ind or, o thá
cuicceadh co tuaith, ó thuaith co baile, agus

o baile go traighidh do thír (oirdherc na neithisi i Leabhar na
h-Uidhri. As follus iatt i Leabhar Dinnsenchusa).

Aois Criost, da céd seascca a seacht. En bhliadhain dEochaidh
Gondat hi righe nEreann go ttorchair lá Lughaidh Mend, mac
Aongusa, dUlltoibh.

Aois Criost, da céd seascca a hocht. An ced bhliadhain do Cairpre
Liffechair, mac Cormaic, mic Airt, hi righe nEreann.

Aois Criost, dá chéd sechtmoghat a haon. A cethair do Cairbre.
Tri catha ria cCoirpre for fioru Mumhan ag cosnamh cirt Laighen.

Aois Criost, da ced seachtmoghat a dó. A cuicc do Coirpre. Ceithre
catha la Coirbre for fiora Mumhan ag cosnamh cirt Laighen.

Aois Criost, da céd seachtmoghat a sé. A naoi do Coirpre i righe
nEreann. Oengus Gaibuaibhtheach do marbhadh an bhliadhainsi
la cloinn Cairbre Liffechair .i. Fiacha Sraibhtine agus Eochaidh
Doimhlen.

Aois Criost, da céd ochtmoghat a trí. A sé décc do Cairbre.
Fionn Ua Baisccne do thuitim la hAichlech mac Duibhdrenn, agus la
macoibh Uirgrend, do Luaighnibh Temhrach, occ Ath Brea for
Bóinn, dia ndebhradh.

Ro bith Find, ba do ghaibh,
go ndiach guin,
do all Aichleach mac Duibhdrend
a chenn do mhac Mochtamuin.

Minbadh Cailti cosccair,
do bu buaidh ar cech fírgliaidh,
Ro badh cosccrach las in triar
ilach im chenn ind righ niadh.

Aois Criost, da céd ochtmoghat a cethair. Iar mbeith seacht
mbliadhna décc hi ríghe nEreann do Cairbre Liffechair do cer i
ccath Gabhra Aichle, do laimh Sémeoin, mic Cirb, do
Fothortaibh iar tabhairt na fene dFiorcorb, mac Cormaic Cais,
lais ind aghaidh an rígh do cosnamh Leithe Mogha fris.

Aois Criost, dá céd ochtmoghat a cúicc. En bliadhain don da Fothadh
ós Erinn, go ttorcair Fothadh Carpthech la Fothadh
nAirgtheach. Do chear Fothadh Airccteach iar sin hi ccath
Ollarbha hi Line la Caoilte.

Aois Criost, da céd ochtmoghat asé. An céd bhliadhain do righe
Fiachaidh Sraibhtine ós Erinn.

Aois Criost, da céd nochat a haon. An seiseadh bliadhain
dFiachaidh irrighe. Cath Duibhlinde ria fFiachaidh for
Laighnib. Tri catha hi Slébh Toadh, cath Smetire, agus cath
Ciarmaighe ria fFiachaidh Sraibhtine bheós.

Aois Criost, trí céd fiche a dó. Iar mbeith seacht mbliadhna ar
triochat na righ ós Erinn dFiachaidh Sraibhtine do cear las na
Collaib hi ccath Dubhchomair hi cCrich Rois i mBreaghaib.

Aois Criost, trí céd fiche a trí. An ced bhliadhain do Colla Uais
mac Eathach Doimhlén na righ ós Erinn.

Aois Criost, trí céd fiche asé. An cethramadh bliadhain do Colla
Uais hi righe nEreann go ros ionarbh Muiredhach Tireach eisiomh
co na bhraithribh i nAlbain go ttríbh cédaibh maraon riu.

Aois Criost, trí céd fiche a seacht. An céd bhliadhain do Muiredhach
Tirech hi righe nEreann. A bfoircend na bliadhna so tangatar na
tri Colla go hErinn, agus ní ro mair dia sochraide acht trí
naonbhair nama. Do deochatar din go Muireadhach iar na tteagascc
do draidh. Ro baigset fris, agus ro raidseat droichbhriathra corus
marbhadh, agus corbadh fair tuairseadh ind fiongal. Onat etaiset
tairiset oca, agus robtar gora dó.

Aois Criost, trí céd triocha a haon. An cúicceadh bliadhain do
Muireadhach. Cath Achaidh leithdeircc hi Fernmoigh las na tríbh
Collaibh for Ulltuibh, du i ttorchair Fergus Fogha, mac Fraechair
Fortriuin, tiughfhlaith Uladh i nEamhain in Fergus hisin.
Ro loiscset iaromh Eamhain, agus nís aittreabhsat Ulaidh innte osén.
Tallsat for Ultoibh beos don cúicceadh ó Righe agus Loch nEathach
siar. Do cer Colla Meann isin cath sin.

Aois Criost, trí céd caocca a sé. Iar mbeith triocha bliadhain hí
righe nEreann do Muireadhach Tíreach do cear la Caolbhadh, mac
Cruinn, rin Uladh, oc Port Righ uas Dabhall.

Aois Criost, trí céd caocca a seacht. Iar mbeith aon bhliadhain i
righe nEreann do Caolbhadh, mac Cruinn Badhrai, do cear la
hEochaidh Muighmeadhoin.

Aois Criost, trí céd caocca a hocht. An céid bhliadhain dEochaidh
Muighmeadhon hi righe ós Erinn.

Aois Criost, trí céd seascca a cúicc. An tochtmadh bliadhain
dEochaidh Muighmhedhoin, mic Muiredhaigh, Tirigh ós Erinn go
nerbailt i tTeamhraigh.

Aois Criost, trí céd seascca a se. An ced bhliadhain do Criomhthann,
mac Fiodhaidh, mic Daire Cerb, os Erinn.

Aois Criost, trí céd seachtmoghat a hocht. Iar mbeith tri bliadhna

décc na righ ós Erinn do Criomhthann, mac Fiodhaigh, atbail do
digh neimhe tucc Moingfhionn a hsiuir feisin dó.

Aois Criost, trí céd sechtmoghat a naoi. An céd bhliadhain do Niall
Naoighiallach, mac Eathach Moighmhedhoin, hi righe nEreann.

Aois Criost, ceithre céd a cúicc. Iar mbeith seacht mbliadhna
fichet na righ ós Erinn do Niall Naoighiallach, mac Eathach
Moighmhedhoin, do rochair la hEochaidh, mac Enna Cendsealaigh, occ
Muir nIocht .i. an mhuir edir Franc agus Saxain.

Aois Criost, ceithre céd fiche a hocht. Iar mbeith tri bliadhna
fichet i righe nEreann do Dathí, mac Fiachrach, mic Eathach
Moighmheadhoin, torchair do saighit gealain ag Sleibh Ealpa.

Aois Criost, ceithre céd triocha. An dara bliadhain do Laoghaire.
Is in mbliadhainsi ro faoidh an céd Celestinus Papa Paladius
epscop dochum nEreann do shíoladh creidmhe dEirennchoibh, agus
tainic i ttír i ccrích Laighen, da fher décc a lion. Ro diult
Nathi mac Garrchon roimhe, ar a ai ro bhaist uathadh daoine i ttir
nEreann, agus ro fhothuigheadh teora heccailsi crainn lais, Cell
Fhini, Teach na Romhan, agus Domhnach Arta. A cCill Fhine ro
faccaibh a liubhra, agus an comhra go ttaisibh Póil, agus Pedair,
agus martirech niomdha noile. Ro fháccaibh an cethrar so is na
heccailsibh ishin dia eis, Augustinus, Benedictus, Siluester,
agus Solonius. Ag tionntudh do Phalladius for ccul do Roimh
(o na fuair airmittin i nErinn) dos fairidh galor i ttíribh
Cruithnech co nerbailt de.

Aois Criost, ceithre céd triocha a haon. An tres bhliadhain do
Laoghaire. Ro hoirdneadh naomh Pattraicc i nespuccoide lasa naomh
Papa, an ced

Celestinus, ro furail fair tocht dochum nEreann, do shenmóir agus
do proicept credmhi agus crabhaidh do Gaoidhealaibh, agus dia
mbaitseadh idir.

Aois Criost, ceithre ched triocha adó. An ceathramhadh bliadhain do
Laoghaire. Pattraic do theacht i nErinn an bliadhainsi, go ro
gabh for baitseadh agus beannachaigh Ereann, fiora, mna, maca, agus
ingena, cén mó tá uathadh na ro fhaomh baitsiodh na creideamh uadh,
amhuil aisnedheas a bheatha.

Ath Truim do fothúghadh la Patraicc iar na edhpairt do Fhedhlim,
mac Laeghaire, mic Nell, do Dhia, dosomh, do Lomman, agus do
Fortchern. Flann Mainistrech cecinit.

Pádruig, ab Eireann uile, mac Calprainn, mic Fotaide,
mic Deisse, nar dóigh do liudh, mic Cormuic Mhóir, mic Leibriuth,
mic Ota, mic Orric mhaith, mic Moiric, mic Leo in lanraith,
mic Maximi, mairg na sloinn, mic Encretta aird alaind,
mic Pílist is ferrar aig cach, mic Fereni gan ansath,
mic Brittain, dobhra in mara, o tait Bretain bruthmhara,
Cochnias a mhathair malla, Nemthor a bhaile bagha,
don Mumhain ni cael a chuid, ro saor ar puthair Pádraig.

Aois Criost, ceithre céd triochat a cethair. An seiseadh bliadhain do
Laoghaire. Loarn mac Eachach Muinremhair do ghenedh.

Aois Criost, ceithre céd triocha a cúig. An seachtmadh bliadhain do
Laoghaire. Breasal Belach, mac Fiacha Aicedha, mic Cathaoir Móir,
(ri Laighean) dég.

Aois Criost, ceithre ced triocha a sé. An tochtmhadh bliadhain do
flaithios Laoghaire.

Aois Criost, ceithre chéd triochat a seacht. An naomhadh bliadhain do
Laoghaire. Fiondbharr mac ua Bairdene décc.

Aois Criost, ceithre céd triocha a hocht. An dechmhadh bliadhain do
Laoghaire. Seanchus agus Feneachus na hEreann do ghlanadh agus do
scriobhadh, ar tteclamadh screaptradh agus seinleabhar nEreann co
haon maighin, ar impidhe Naomh Patraicc. Atiad andso naoi sailghe
fothaightheacha las a ndernadh indsin. Laoghaire (.i. ri Ereann),
triur ríogh, Padruicc, Benen, agus Cairnech an triur naomh, Ros,
Dubhthach, agus Ferghus an triur seanchadh, amhail dhearbhas an
rann.

Laoghaire, Corc, Daire dúr, Padraicc, Benen, Cairnech cóir,
Ros, Dubthach, Feargus go febh, naoi sailghe sen senchais móir.

Aois Criost, ceithre céd ceithracha. An dara bliadhain décc do
Laoghaire. Maine, mac Néll Naoighiallaigh, décc.

Aois Criost, ceithre chéd cethracha a cethair. An seiseadh bliadhain
décc do Laoghaire mac Néill isin Righe.

Aois Criost, ceithre céd, cetracha aseacht. Anaoi décc do
Laoghaire. Secundinus .i. Seachnall, mac ua Baird, mac sethar
Patraicc .i. Dairerca, epscop Arda Macha, cúicc bliadhna
sechtmoghat a aois an tan ro faoidh a spirat .i. 27 Nouember.

Aois Criost, ceithre ced cethracha a hocht. An fichetmhadh bliadhain
do Laoghaire.

Muinnter Phadruig na patter, accá raibhe ro Laitten,
Meabhra lim, ni cuirt cranna, a nuirt is a nanmanna.
Sechnall a espog gan acht, Mochta ar sein a shagart,

Espog Erc a breitheamh binn, a threinfhear Espog Maccaeirthinn.
Benen a shailmcheatlaidh saer, agus Coemhán a mhacaemh.
Sinell a fer bein in chluic, agus Aithcen a fhir chóic.
Cruimhther Meascan gan bine, a chara sa chirpsire.
Cruimhther Bescnait, binne a rainn, sagart meise mic Alpraind.
A thri gabhaind, gasta a ndealbh, Macecht, Laebhan, is
Fortchearnd.
A thri cerda, fa mor rath, Aesbuite, Tairill, agus Tasach.

A thri druinecha nach dis, Lupaid, Erca, Cruimthiris.
Odhran a aragan oil, Rodan, mac Braga a bhuachail,
Ippis, Tigris, is Erca, agus Liamhain la Eibeachta,
Padruig ros forran an dhecra, dóibh ro ba tearbh fhearta,
Cairniuch sagart ron bhaist, German a oide can aisg,
Cruimhther Manach fa mor rath, a fer coir ra connadach.
Mac da siar banban co mblaidh, Martain bráthair amháthar.
Rapa ro got ar oglach, Mochonnoc a chomhgarmach.

Cribri is Lasra na leand, ingheana glana Glegrand,
Macraidh car sai abhir ar Erc, ra tharngair re na tri uidheacht
Brogan sgribnidh a scoile, Cruimhther Loga a luamaire.
Nocha ne ní nach canta, agus Machui a fhirdalta
Maith fear damsat muinnter mhór da dard Dia bachaill cen bhron,
Flaithi ca cluinnter na cluic, muinnter maith muinter Phadruig.
In Trinóid istrean ar chuch dailea duind maith morgrath
Righ ran foem tre aittin mbuic, ra soer do phattir Padruig.

Aois Criost, ceithre céd cetrachat anaoi. Bliadhain ar fichit do
Laoghairi. Amhalgaoidh, mac Fiachrach, mic Eachach Muidhmhedhoin,
diobaidh. Uaidhe Tir nAmhalgaidh.

Aois Criost, ceithre céd caocca a trí. An cuicceadh bliadhain ficheat
do Laoghaire. Cathsraeineadh mor ria Laoghaire mac Nell for
Laighnibh.

Aois Criost, ceithre céd caocca a cethair. A sé fichet do Laoghaire.
Feis Teamhra la Laoghaire, mac Néll.

S. Usaille Espucc a Chill Usaille hi Life (décc) xxvii
August.

Aois Criost, ceithre céd caocca asé. A hocht fichet do Laoghaire.
Enda, mac Cathbhadha, décc.

Aois Criost, ceithre céd caoga a seacht. A naoi fichet do Laoghaire.
Cath Atha dara ria Laighnib for Laoghaire, mac Nell. Ro gabhadh
dna Laoghaire isin cath sin, agus do rad Laoghaire ratha gréne agus
gaoithe, agus na ndul do Laighnibh nach tiocfadh forra tria bithu,
ar a legadh uadha.

Ard Macha dfothuccadh lá Naomh Patraicc iar na edhbairt do ó
Dhaire mac Fionnchadha mic Eoghain mic Nialláin. Ro hoirdnedh da
fhir dhécc lais fri cumhdach an bhaile. Ro thionchoiscc dhóibh
cetus, cathair airdepscoip do dhenamh isuidhe, agus ecclus do
mhanchaibh, agus do chailleacha, agus durdaibh oile archena doigh
ro fhindsiomh combadh si budh cenn, agus budh cleithe deccailsibh
Erenn a coitchinne.

Sean Patraicc do faoidhedh a spioraide.

Aois Criost, ceitre ced, caocca a hocht. Iar mbeith deich mbliadhna
fichet hi righe nEreann do Laoghaire mac Nell Naoighiallaigh
atbath i ttaobh Caissi deir Erinn agus Albain .i. da cnoc
iadsidhe filet in Uibh Faoláin, agus grian agus gaoth ros marbhsomh
ar ra sharaigh iad. Conidh do sin atbert an fili,

Atbath Laoghaire mac Nell
for taob caissi glas a tír
duile dé adraegaid raith
tucsat dail mbais forsan righ.

Aois Criost, ceithre ced caocca anaoi. An ceid bhliadhain dOilill
Molt, mac Dathi, mic Fiachrach, hi righe nErenn.

Aois Criost, ceithre céd seascca a dó. An cethramhadh bliadhain
dOilill. Domhangort mac Nissi décc.

Aois Criost, ceithre chéd seasca atrí. An cúicceadh bliadhain
dOilill. Feis Teamhra la hOilill Molt an bhliadhainsi.

Aois Criost, cethre chéd sescca a cethair. An seiseadh bliadhain
dOilill. Cath Dumha Aichir ria Laighnibh for Ailill Molt.

Conall Gulban, mac Neill Naoighiallaigh, (o ttátt Cenel cConaill)
do mharbhadh la sen tuathaibh Maighe Slecht iar na foghbháil i
mbaoghal, agus a adhnacal i fFiodhnach Mhaighe Réin, la Naomh
Caillin, amhail aisnéidhes beatha an naoimh rémhraite.

Aois Criost, ceithre chéd seasccat a cúicc. An seachtmhadh bliadhain
dOilill Molt. Feis Teamhra la hOilill Molt.

Eoghan, mac Neill Naoighiallaigh, (ó ttatt Cenel nEoghain), décc
do chumhaidh Chonaill Ghulban, mic Neill Naoighiallaigh, agus a
adhnacal i nUisge chaoín i nInis Eoghain, dia nebradh.

Atbath Eoghan, mac Néill,
re deoraibh, bá maith a mhaoin,
tré écc Chonaill na ccleas ccruaidh,
go ffuil a uaigh i nUiscce chaoin.

Criomhthann, mac Enda Censelaigh, rí Laighen, do mharbhadh lá mac
a inghine budhéin, .i. Eochaidh Guinech do Uibh Bairrche.

Aois Criost, ceithre chéd seascca a sé. A hocht dOilill. Feis
Teamhra la hOilill Molt.

Aois Criost, ceithre chéd seascca a seacht. Anaoi dOilill Molt.
Benen, mac Seisccnein, epscop Arda Macha, do fhaoidhedh a
spioraitte.

Aois Criost, ceithre chéd seascca a hocht. A haon ndécc dOilill.
Dornghal Brí Ele for Laighnibh ria nOilill Molt.

Aois Criost, ceithre chéd seachtmoghatt. An dara bliadhain décc
dOilill. Cath Dumha Aichir for Ailill Molt ria Laighnibh.

Aois Criost, ceithre chéd seachtmoghatt adó. An cethramhadh bliadhain
décc dOilill. Toca, mac Aodha, mic Senaigh, taoiseach Criche
Cualann hi Laighnibh décc.

Aois Criost, ceithre chéd seachtmoghat a cethair. A sé décc
dOilill. Eirc, mac Eachach Muinreamhair, décc.

Aois Criost, ceithre céd seachtmoghat a cúicc. A seacht décc
dOilill. Conall Cremhthoinn, mac Nell Naoighiallaigh, or
chinset clanna Colmain agus Síol Aodha Slaine décc.

Aois Criost, ceithre céd seachtmoghat asé. A hocht décc dOilill.
Cath Granaird ria nEochaidh, mac Coirpre, mic Oililla, mic
Dunlaing, mic Enda Niadh, for righ Laighen, Fraoch, mac
Fionnchadha, mic Garrchon, mic Fothaidh, mic Eachdach Lámhdóidh, mic
Mesin Cuirb, agus do cher Fraoch isuidhe.

Aois Criost, ceithre céd seachtmoghat a hocht. Iar mbeith fiche
bliadhain

hi righe nEreann dOilill Molt, mac Dathi, mic Fiachrach,
do chear i ccath Ocha la Lughaidh, mac Laoghaire, la
Muirchertach mac Earcca agus la Ferghus Cerrbel, mac Conaill
Cremhthainde, agus la Fiachra, mac Laoghaire, ri Dal nAraidhe,
agus la Cremhthann, mac Enda Cennselaigh ri Laighen. As don chur
sin do rata dFiachra na Leé agus Cairloegh i ttiorfocraicc in
catha. As don cath sin atbert Becc mac Dé.

Mor chath Ocha fearsaitir
imoralta catha ile
for Oilill Molt, mac Nathí,
meabaidh ria nDál Araidhe.

Aois Criost, ceithre chéd sechtmoghat anaoi. An céd bhliadhain do
Lughaidh, mac Laoghaire, ós Erinn i righe.

Aois Criost, ceithre chéd ochtmoghat. An dara bliadhain do Lughaidh.
Cath Granaird a ttír Laighen eitir laighnibh feisin, dú in ro
marbhadh Fionnchadh, tigherna Ua Cennsealaigh, la Coirpre.

Aois Criost, ceithre céd ochtmhoghat ahaon. An treas bhliadhain do
Lughaidh. S. Iarlaithe, mac Trena, epscop Arda Macha, do
fhaoidedh a spioraite.

Aois Criost, ceithre céd ochtmoghat aseacht. An naomhadh bliadhain do
Lughaidh. Mel, Easpoc Ardachaidh i tteathbha, deiscipul
Patraicc, décc.

Aois Criost, ceithre céd ochtmoghat a hocht. An deachmhadh bliadhain
do Lughaidh. Cianán, espoc Doimhliacc, décc.

Aois Criost, ceithre céd ochtmoghat anaoi. An taonmhadh bliadhain
dég do Lughaidh. Maccaille espoc décc. Aongus, mac
Natfraoich, rí Mumhan, do thuitim hi ccath Chellosnadh la
Muircertach Mac Earca, la hIollann mac Dunlaing, la hAilill,
mac Dunlaing, agus la hEochaidh nGuinech dia nebradh,

Atbath craobh, dosbhile nóir,
Aongus molbhthach, mac Natfraoich,
Faccbhadh la hIlland a rath
hi ccath Cell Osnadha claoin.

Cath Taillten for Laighnibh ria cCoirpre, mac Néll.

Aois Criost, ceithre céd nochot adó. An cethramhadh bliadhain décc do
Lughaidh. Cath Slemhna, hi Midhe, ria cCoirbre, mac Neill,
for Laighnibh.

Aois Criost, ceithre céd nochat atri. An cuicceadh bliadhain décc do
Lughaidh. Patraicc, mac Calpuirn, mic Potaide, airdeaspuc,
ceitt priomhaidh agus ardapstol Ereann, do chuir an céd Celestinus
Papa do phroichept soiscela, agus do shíoladh irsi agus crabhaidh
do Ghaoidhealaibh, - asé ro etarsccar

iaidsidhe fri hadhradh iodhal agus arracht, ro chosccair agus ro
choimbhris na hiodhla batar aga nadhradh aca. Ro indarb deamhna
agus droch spirada uaidhibh, agus tucc iad ó dhorcha peacaidh agus
doailche co soilsi creidimh agus caoinghníomh, ro threoraigh agus ro
shédaigh a nanmanna o dhóirsibh ifrinn (gus a mbatar ag dul) go
dóirsibh flatha nimhe. Ase dna ro bhaist agus ro bhendaigh fir,
mna, maca, agus inghena Ereann, co na ttíribh agus co na
ttreabhaibh, etir uiscce agus inbher muiridh. As leis do rónadh
cealla, mainistrecha, agus ecclasa iomdha sechnón Ereann. Seacht
ccéd ceall a líon. As leis céttus ro hoirdneadh epscoip, sacairt,
agus aos gach gráidh ar chena, secht gced epspoc agus trí mhíle
sagart a líon. Do roine ferta agus mírbhaile iomdha, co ná cumhaing
aiccnedh daonna a chuimhniúghadh na a foraithmhet an do righene do
mhaith is na talmannaibh. O ro comhfoiccsigh aimsir eitsechta naomh
Patraicc hi Sabhall, ro thochaith corp Chriost a lámhaibh an
naoimh epscoip Tassach, isin 122 a aoisi, agus ro fhaidh a
spirat do chum nimhe.

Ro bai comhthóccbháil catha agus adhbhar easaonta isin cuicceadh ag
imresain im corp Patraic iar na eccuibh. Uí Néill agus
Airghialla acc triall a thabhairt

go hArdmacha, Ulaidh acca fhostadh aca fadein, go ndechattar
Ui Néill agus Airghialla go alaile uiscce, go ttuargaibh an abhann
friú, co ná ro chumhaingset techt tairsi lá méd a tuile. O do choidh
an tuile for ccula do dheachatar na sloigh fo combaigh .i. Uí Néill
agus Ulaidh do bhreith chuirp Patraicc leó. Asedh tarfas lá gach
ndruing díobh co mbaí an corp leo budhéin dochum a ttire, go ro
edarsccar Dia iad gan troid gan tachar fon ionnus sin. Ro hadhnacht
iaramh corp Patraic go nonoir agus go nairmittin moir, i nDún da
leathglas, agus na dí oidhce décc ro batar na sruithe ag faire an
chuirp, co psalmaibh agus hymnaibh, ni baí oidhce i Muighinis, ina
is na ferannaibh comhfoiccsibh (an darleó) acht amhail bidh soilsi an
laoi lansholais ro ionorchaidh ann do ghrés. As do bhliadhnaibh
bais naomh Patraicc atrubradh.

O Genar Criost, áirimh ait,
.cccc. sic for caomh nochait,
teora bliadhna fair iarsoin,
go bás Patraicc priomhapstoil.

Aois Criost, ceithre céd nochat a cethair. A sé décc do Lughaidh.
Cath Cindailbhe ria cCoirbre, mac Nell, for Laighnibh.

Aois Criost, ceithre céd nochat asé. Mochaoi, abb nAondroma,
décc

an treas la ficheat do mí Iun. Cath Droma Lochmaighe ria Laighnibh
for Uibh Nell.

Corbmac a Crich in Ernaidhe epscop Arda Macha, comharba
Patraicc, do faoidhedh a spioraitte.

Aois Criost, ceithre céd nochat a seacht. A naoi décc de Lughaidh.
Cath Inde Moire hi cCrich ua nGabhla for Laighnibh, agus for
Iollann, mac Dunlaing, la Muirchertach mac Earca.

Aois Criost, ceithre céd nochat a hocht. An fichetmhadh bliadhain do
Lughaidh. Fergus Mor, mac Eirc, mic Eathach Muinreamhair, co na
bhraithribh do dhul ind Albain.

Aois Criost, ceithre céd nochat a naoi. A haon fichet do Lughaidh.
Cearban easpoc, ó Fiort Cearban oc Teamhraigh, décc.

Cath Seaghsa ria Muircertach mac Erca for Duach Tengumha, ri
Connacht. Iseadh fochann an chatha .i. Muirchertach ro bai hi
rathaighius etir in rí agus Eochaidh Tiormcharna, a brathair, go ro
gabhadh Eochaidh for comairce Muirchertoigh. Ceannfaoladh asbert
da dhearbhadh.

Cath Seghsa ben do mnaibh fodruair, ro boí crú derg dar cruisigh,
la Duisich, ingin Duaich.
cath Dealcca, cath Mucramha acus cath Tuama Drubha,
la cath Seghsa, hi ttorcair Duach Tengumha.

For Connachtaibh ro sraoineadh na catha hisin.

Aois Criost, cuicc céd. An dara bliadhain fichet do Lughaidh. S.
Ibhar espuc, décc an tres la fichet do mí April. Ceithre bliadhna
ar tri céd fod a shaoghail.

Cath Lochmaighe ria Laignibh for Uibh Nell.

Aois Criost, cuicc céd a haon. A tri fichet do Lughaidh. Cath
Fremhainne hi Midhe for Fiachaidh, mac Nell, ria fFailge
Berraidhe, dia nebradh an rann,

In rí aile asmberaidh Fiacha, mac Nell, ní celaidh,
As fair, tar cremla cile, cath Freamhna Midhe meabhaidh.

Aois Criost, cúicc céd a trí. Iar mbeith cúig bliadhna fichet i righe
Ereann do Lughaidh, mac Laoghaire, torchair i nAchadh Forcha,
iar na bém

dforcha tenntighe, tre miorbailibh De, tres an dímiadh tuccustoir do
Pattraicc, amhail a deir an rann so:

A nAchadh farcha ughrach, bás mhic Laogaire Lughach,
Gan molbhtha tall na sonn, de do forcha trom teinntighe.

Eochaidh, mac Muiredhaigh Muindeircc, ri Uladh, decc.

Aois Criost, cúicc céd a cethar. An céid bhliadhain do
Muirchertach, mac Muiredhaigh, mic Eoghain, mic Néll, na righ ós
Erinn.

Aois Criost, cúicc céd asé. An treas bhliadhain do Mhuirchertach.
Iollann, mac Dúnlaing, ri Laighen, décc. Cath Luachra ria
Coincorb for Uibh Néill. As do ro raidhedh:

Cath lonn Luachra, uasa tuas, atces Brighit, ni frith fás,
flannchath Fionnabhrach ba huas im corp nIollainn iar na bhás.

Aois Criost, cuig céd aseacht. An cethramhadh bliadhain dho
Muirchertach. Cath Droma dergaighe for Foilghe mBerraidhe, ria
fFiachaidh mac Néll.

As la Cinel Fiachaidh an feronn o Cluain in dibair co hUisnech
osin ille, amhail asbert Cendfaoladh

Dighal Dia seacht mbliadhan,
ba si dighde a cridhe
cath i nDromm dergaighe
ba dhe do cer magh Midhe.

Aois Criost, cuig céd a haoin ndécc. A hocht do Mhuirchertach.
S. Bron epscop o Cúil Iorrae, i cCondachtuibh, décc, an
tochtmhadh lá do mí Iun.

Aois Criost, cuig céd a dó dég. A naoi do Muirchertach. S. Earc
Slaine espucc Lilcaigh, agus ó Ferta fer fFeig i ttaobh Sídhe
Truim aniar, do écc, an dara lá do mhí Nouembris. Deich mbliadhna
ar cheiththre fichtib a

aois an tan thesta. As e an tespucc Eirc sin ro ba breithemh do
Phattraicc. As dó roine Patraicc an rand so.

Espucc Erc, -
gach ní conceartadh ba cert,
gach aon beireas coicheart cert
fortraibh endacht beaspuic Erd.

Dubhthach .i. a Druim derbh espucc Ardmacha do fhaoidhedh a
Spioraitte.

Aois Criost, cuig céd atrí décc. An dechmhadh bliadhain
Mhuirchertaigh. S. Macnisi .i. Aonghas espucc Connere, décc
antreas la do Nouember.

Cath Dedna, i nDromaibh Breagh, ria Muirchertach mac Earca, agus
ria cColgu, mac Loiti, mic Cruinn, mic Feidhlimidh, taoiseach
Airghiall, dú in ro marbhadh Ardghal, mac Conaill Cremhthainne,
mic Néill.

Aois Criost, cúig céd a seacht dég. A cethair décc do Muircheartach.
S. Darerca Cille Slébhe Cuilinn, dar bainm Moninde décc
6 Iulii. Naoi fichit bliadhain fod a shaoghoil dia nebradh.

Naoi fichit bliadhain mole,
do reir riaghla gan time,
gan baes, gan béd, gan baoghal,
ba he saoghal Moninde.

Aois Criost, cuig ced anaoi décc. A sé décc do Mhuirchertach.
S. Condlaedh, epscop Cille dara, cerd Brighde, décc 3. Maii.

Aois Criost, cúig céd fiche a haon. A hocht décc do Mhuirchertach.
S. Buite, mac Bronaigh, espucc Mainistre, décc 7.December.

Buite bratha brí co mblaidh, tí cech tratha dom cobhair,
Geal ghlach go ngloraibh ngluinn ngloin,
degh mac Bronaigh, mic Bolair.

Aois Criost, cúicc céd fiche a trí. An fichetmhadh bliadhain do
Muirchertach. Beoaidh, espucc Arda carna, décc, an tochtmhadh
la do Marta. Eochaidh, mac Aonghusa, righ Mumhan, décc.

Aois Criost, cuig céd fiche a cethair. A haon fichet do
Muircheartach. Cath Atha Sighe ria Muirchertach for Laighnibh,
dú in ro marbhadh Sighe, mac Dein, conadh uadha a derar Ath Sighe.

Aois Criost, cuig céd fiche a cuicc. A dó fichet do Muircheartach.
S. Brighit ogh, banab Chille Dara (décc). As disidhe cetus ro
hiodhbradh Cill

dara, agus ba lé conrodacht. Así Brighit tra ná tucc a meanmain
ná a hinntheifimh as in coimdheadh eadh naonuaire riamh acht a
siorluadh, agus a siorsmuaineadh do grés ina cridhe agus menmain,
amhail as errderc ina bethaidh fein, agus i mbethaidh naoimh
Brenainn, espucc Cluana ferta. Ro thochaith imorro a haimsir acc
foghnamh go diochra don coimdhe, ag denomh fert agus miorbhal, ag
slánucchad gach galair agus gach tedhma archena, amhail aisnéidhes a
betha, go ro faoidh a spirat do chum nimhe, an céd lá do mí Febhru,
agus ro hadhnacht a corp i nDún i naon tumba la Patraicc, co
nonoir agus co nairmidin.

Ailill, epscop Arda Macha, do Uibh Breasail dosidhe, do écc.

Aois Criost, cuicc ced fiche ase. An treas bhliadhain fichet do
Mhuirchertach. As do thairrngire báis Mhuircheartaigh adbeart
Cairneach.

As am uamhon ar in mbein, ima luaidhfe ilor Sin,
Ar fhiur loisccfidher i ttin, for taoibh Cletigh báidhfir fin.

.i. la Sín ingin Sighe dorochair Muircertach, i ccionadh a hathar
ro marbhsomh.

Cath Eibhlinne ria Muirchertach mac Earca, cath Moighe hAilbhe,
cath Almhaine, cath Cinneich, agus orccain na cCliach, cath
Aidhne, for Connachtaibh, conadh do na cathaibh sin atbert
Ceandfaoladh.

Cath Cinn eich, cath Almhaine,
ba haimsir airdherc aimhre,
orccain Cliach, cath Aidhne,
acus cath Maighe hAilbhe.

Cairell, mac Muireadhaigh Muindeircc, ri Uladh, décc.

Oilill, mac Dunlaing, ri Laighen, do écc.

Aois Criost, cúicc céd fiche aseacht. Iar mbeith ceithre bliadhna
fichet i righe nEreann do Muirchertach, mac Muiredhoigh, mic
Eoghain, mic Néill Naoighiallaigh, ro loiscceadh é i ttig Cletigh
uas Bóinn, oidhche Shamhna iar na bhátadh hi ffín. Sín atbert
an rann.

As mesi Taeten in ghen do cher aireach Néll,
As Gannadhaigh mo ainm, in gach airm as rén.

Cendfaoladh ro raidh:

Fillis an rí mac Earca alleith Ua Neill,
Firt fuil ferna in gach moigh, Broghais criocha hi ccén.

Fo seacht ferais no chairpthi, acus bidh cian bus cumhan,
Do bert gialla Ua Néill, la gialla moighe Mumhan.

Aois Criost, cúig céd fiche a hocht. An céd bhliadhain do Tuathal
Maolgarbh, mac Corbmaic Caoich, mic Coirpre, mic Neill, i righe
nEreann.

Cath Luachra móire etir da inbher, fris a raiter cath Ailbhe i
mBreghaibh, ria ttuathal Maolgarbh, for Ciannachtaibh Midhe.

Aois Criost, cuicc céd triocha a haon. An ceathramhadh bliadhain do
Tuathal. Cath Claonlocha hi cCenel Aodha ria nGoibhneann,
taoisioch Ua Fiachrach Aidhne, airm in ro marbhadh Maine, mac
Cerbhaill, ag cosnamh geillsine Ua Maine Connacht.

Aois Criost, cuig céd triocha a cethair. An seachtmhadh bliadhain do
Tuathal. S. Mochta, espucc Lughmhaigh, descipul Patraig, an
naomhadh lá décc do mí Agust ro faoidh a spirat do cum nimhe, as fair
tuccadh an tuarusccbáil si.

Fiacail Mochta ba maith bés, trí chéd bliadhain, buan an cís,
Gan guth niomrail sece suas gan mir nionmair sece sios.

Tri fichit seanóir psalmach, a theglach rioghdha remeann,
Gan ar, gan buain, gan tíoradh, gan gniomhradh, achtmadh léighionn.
Fear trí fichit fer trí céd arcafuin as sean an dét,
Ní mó cin ógan fo ghail, is aithfidhe an seinfhiacail.

Aois Criost, cúicc céd triocha a cuig. An tochtmhadh bliadhain do
Tuathal. Eaclais Doire Calgaigh do fhothughadh la Colom Cille,
iar nedhbairt an bhaile do dia derbfhine fén .i. Cenel cConaill
Gulban mic Néll.

Corbmac, mac Oililla, ri Laighen, décc.

Oilill, epscop Arda Macha, do écc. Do Uibh Bresal doisidhe
bheos.

Aois Criost, cúicc céd triocha a seacht. An deachmhadh bliadhain do
Tuathal. S. Lughaidh, espucc Connere, décc.

Cath Sligighe ria bFergus agus ria nDomhnall, da mac
Muirchertaigh, mic Earcca, ria nAinmire, mac Sédna, agus ria
nAindidh, mac Duach, for Eoghan Bel, ri Connacht. Ro meabhaidh
an cath rempa, do rochair Eoghan Bél, dia nebradh indso.

Fichter cath Ua Fiachrach, la feircc faobhair, tar imBel,
Gesis buar namhat fri slegha, sretha in cath i Crinder.

Ar celt Slicech do mur már fuile fer lia feóil
Bertait ilaigh tar Ebha, im chend nEoghain Beóil.

Aois Criost, cúicc céd triocha a hocht. Iar mbeith aon bhliadhain
décc hi ríghe nEreann do Tuathal Maolgarbh, mac Corbmaic Caoich,
mic Coirpre, mic Néll, torchair i nGreallaigh eillte la Maolmór,
mac Airgedain, oide Diarmoda mic Cerbhaill esidhe, agus do rochair
Maolmór ind fo chédor, dia nebradh,

Echt Maoile móir nad mall, ní gníomh cóir ro cind,
Marbhadh Tuathoil tréin, adrochair fein inn.

Aois Criost, cúicc céd triocha a naoi. An céid bhliadhain do
Diarmaitt, mac Ferghusa Ceirrbheoil, i righe nEreann. Dichendadh
Abacúc i naonach Tailten tre miorbhailibh De agus Ciaráin .i.
luighe néithigh do radsomh fo láimh Ciarain, co ro gabh aillse for
a mhuinél (.i. as for a muinel ro fuirimh Ciaran a lamh) co torchair
a cheand de.

Aois Criost, cúig céd cethracha a haon. An treas bhliadhain do
Diarmait. S. Ailbhe, airdespoc Imlich Iubhair, décc an dara la
décc do September.

Aois Criost, cuicc céd ceathracha a trí. An cuigeadh bliadhain do
Diarmait. Pláigh egsamhail choitchenn ar fedh na cruinne, gur
sgrios an trian bú airmhidnithe don chinedh daonna.

Aois Criost, cúicc céd cethracha, a cethair. An seiseadh bliadhain do
Diarmait. S. Mobhí Claraineach .i. Berchan ó Glais Naidhen,
for bhrú abhand Liffe, don leith i ttuaidh, décc, an dara la décc
do mí October.

Cath Cuile Conaire i cCera ria bFherghus agus ria nDomhnall
dá mac

Muirchertaich mic Earcca, for Ailill Inbhanda, rí Condacht, agus
for Aodh fFortamhail, agus torchair Ailill agus Aodh ann.

Aois Criost, cúig céd cethracha a cúig. An seachtmhadh bliadhain do
Diarmait. S. Ailbhe Senchuae Ua nOiliolla décc.

Aois Criost, cúig céd cetracha asé. An tochtmhadh bliadhain do
Diarmaitt. Cath Cuilne in ro marbadh sochaidhe do Chorc Oiche
tria ernaidhe n-Ide Cluana creadhail. Fothadh mac Conaill décc.
Cairpre, mac Corpmaic, ri Laighen, do écc.

Aois Criost, cuig céd cethracha a seacht. An naomhadh bliadhain do
Diarmait. Ri Uladh, Eochaidh, mac Condlaidh, mic Caolbhaidh, mic
Cruinn Badhrai, décc.

Toiseach Teathbha, Criomthann, mac Briuin, décc.

S. Dubhthach, abb Arda Macha, do écc. Do shíol Colla Uais
dosidhe.

Aois Criost, cúig céd cetracha a hocht. A deich do Diarmaitt.
S. Ciaran mac an tsaoir, ab Cluana mic Nóis, décc an naomhadh lá
do September. Tri bliadhna triocha fot a shaoghail.

S. Tighernach, easpoc Cluana heoais, do dol décc an cethramhadh
dApril.

S. Mac Tail Cille Cuilinn (.i. Eoghan mac Corcrain) décc, an
taonmhadh lá décc do mí Iún. S. Colum mac Criomhthainn décc.

S. Sincheall sen, mac Cenandáin, abb Cille achaidh Droma foda, do
dhol décc an seiseadh lá fichet do Márta, triocha ar tri céd
bliadhain fod a shaoghail.

S. Odhrán, o Leitriochaibh Odhráin, décc an dara lá do mí October.

S. Findén, abb Cluana hEraird, oide naomh Ereann, décc, 12
December. S. Colaim Innsi Cealtra décc. Don mortladh dar bo
hainm an Chron

Chonaill, agus ba hisidhe an chéd Buidhe Chonaill, atbathsat
na naoimh sin, acht Ciaran agus Tighernach.

Bas Eathach, mic Connlo, rígh Uladh, a quo Uí Eathach Uladh. -
Tighernach.

Aois Criost, cuig céd caocca. A dó décc do Diarmaitt. Dauid mac
Guaire Uí Forannáin, epscop Arda Macha, agus Legaitt na hEreann
uile, do écc.

Aois Criost, cúig céd caocca a haon. A tri décc do Diarmaitt.
S. Neasan Lobhar décc. Feargna, mac Aonghusa, rí Uladh, do
marbhadh hi ccath Droma cleithe la Déman, mac Cairill, agus la
hUibh Eathach nArda.

Aois Criost, cúig céd caocca a dó. A cethar décc do Diarmaitt.
Eaccluis Bendchair do fothughadh la Comhgall Bendchair. Feis
Temhra do dhenamh la righ Ereann, Diarmaitt, mac Fergusa
Cerrbheoil. Marbhadh Colmain Móir, mic Diarmata, ina charpat la
Dubhshloit hUa Trena do Chruithneachoibh.

Aois Criost, cuig céd caocca a tri. A cúig décc do Diarmaitt.
Atces Breanainn Biorra ag dol i roth isin aier an bhliadhain si.
Cluain ferta do fhothughadh la naomh Brenainn.

Aois Criost, cuig céd caoga a cethair. An seiseadh bliadhain decc do
Diarmaitt. S. Cathub, mac Fergusa, abb Achaidh cinn, décc 6.
April. Caocca ar céd bliadhain fod a shaoghail.

Feis dédheanach Teamhra do dhenamh la Diarmaitt, righ Ereann.

Curnan, mac Aodha, mic Eathach Tiormcharna, .i. mac righ Connacht
do bhásughadh la Diarmaitt, mac Cerbhaill, tar slánaibh agus
comhairge Coluim Cille,

iar na tharraing go haindeonach as a lámhoibh, conadh é fochann catha
Cúla Dreimhne.

Aois Criost, cuig céd caogatt a cúig. An seachtmhadh décc do
Diarmait. Cath Cúla Dreimhne do bhrisedh for Diarmaitt, mac
Cerbhaill, la Fearghus agus la Domhnall, dá mac Muirchertaigh,
mic Earcca, la hAinmire, mac Sedna, agus la nAindidh, mac Duach,
agus la hAodh, mac Eathach Tiormhcharna, rí Connacht. Hi
ccionaidh marbhtha Curnáin, mic Aodha, mic Eathach Tiormcharna, for
faosamh Coloim Cille, do ratsat Clanna Nell an tuaisceirt agus
Connachta an cath sin Cula Dreimhne don righ, do Diarmait, agus
beos imon cclaoinbhreith rucc

Diarmait ar Colom Cille im liubar Findén ro scríobh Colom Cille
gan rathughadh dFindén, dia ndeachsat i réir nDiarmata, go ro
coiccertaidh Diarmait an mbreith noirrdheirc, la gach boin a
boinín, agus araile.
Colam Cille ro ráidh,

A Dia, cia nach dingbai an cia, dus inermais mís a lín,
An tsluagh do boing beatha dín,
Sluagh do ching hi timchel carn,
As mac ainfthe no das mairn,
Asé mo drui, ním éra, mac Dé as frim congena.
As álainn ferus alluadh gobhar Baodain rés an tsluagh,
Fo la Baotan fuilt buidhe, bena a hEren fuirre.

Fraochan, mac Tenusain, as é do righne ind erbhe ndruadh do
Diarmait. Tuathan, mac Dimmain, mic Sarain, mic Corbmaic, mic
Eoghain, a sé ro la ind erbhe ndruadh dar a cend. Trí míle trá
iseadh torchair do muintir Diarmada. Aoinfhear námá isseadh
torcair don leith naill, Maghláim a ainm, ar is é ro ching tar an
eirbhe ndruadh.

Aois Criost, cúig céd caogat a sé. A hocht décc do Diarmaitt. Cath
Chuile huinnsenn i tTeathbha, for Diarmaitt, ria nAodh, mac
mBreanainn, taoisioch Teathbha, agus ro meabhaidh for Diarmait a
hionadh an iomairecc.

Aois Criost, cúig céd caogat a seacht. A naoi décc do Diarmait. S.
Becc mac Dé, faidh oirrdherc, décc. Colom Cille do dol ind Albain
go ro fothaidh iarumh ecclus, agus as uadh ainmnighter. S. Aodh O
Fiachrach

dég. Cath mona Doire lothair for Cruithniu ria nUibh Nell an
tuasceirt, .i. ria cCenél cConaill agus Eoghain, du i ttorcradar
seacht ttaoisigh Cruitnech im Aodh mBrecc, agus as don cur soin
do rochair doridhisi na Lee; agus Cárn Eolairg do clandoibh Néll
an tuaisceirt. Ceannfaoladh ro raidh indso

Sinsit faebhra, sinsit fir, in Móin mór Doire lothair,
Adbair comronna nat cert, seacht righ Cruithne im Aodh mBrecc.
Fictir cath Cruithne nuile, acus forloiscter Elne,
Fichtir cath Gabra Liffe, acus cath Cuile Dreimhne.

Bersat gialla iar cconghal, as siar im cnuas nuach
Fergus, Domhnall, Ainmire, acus nAindidh, mac Duach.
Fillsit da mac mic Earcca, ar cend an catha cedna,
Acus an rí Ainmire fillis i sealbhaibh Seatna.

Aois Criost, cúig céd caoccatt a hocht. Iar mbeith fiche bliadhain
os Erinn i righe do Diarmaitt, mac Fergusa Cerrbeoil, do cear la
hAodh nDubh, mac Suibhne, rí Dál nAraidhe, ag Raith bicc, hi
Moigh Line. Tuccadh a chend go Cluain mic Nois, go ro hadhnacht
innte, agus ro hadhnacht a cholann hi cCoindere.

Is in mbliadhainsi ro gabhadh an muirgelt .i. Liban inghean Eathach,
mic

Muiredha, for tracht Ollarbha, hi lín Beoain, mic Inli, iascaire
Comhgaill Bendchair.

Aois Criost, cúicc céd caoccat anaoi. An céd bhliadhain do dá mac
Muirchertaich, mic Muireadhaigh, i righe nEreann .i. Domhnall
agus Feargus. Cath Gabhra Liffe, agus cath Dumha Aichir, ria
nDomhnall agus ria bFergus, for Laighnibh, dia nebradh.

Cath Gabhra, agus cath Dumha Achair,
Atbath amhra i ccechtair, Colgu acus a athair.
Cath Gabhra, ni cath duine ná dí cét
Atbath fiche ó Faolan, ó Ailell fiche fichet.

Aois Criost, cúig céd seasccat. An dara bliadhain do Domhnall agus
dFeargus. Daimhin Daimhairgit, .i. Coirpre, décc. As
uadhasidhe na hAirghialla.

Aois Criost, cuig céd seasccat a haon. Iar mbeith trí bliadhna i
righe nEreann do Domhnall agus dFeargus, da mac Muirchertaigh,
mic Muireadhoigh mic Eoghain, mic Nell, ro éccsat araon.

Aois Criost, cúig céd seasccat a dó. An céid bhliadhain dEochaidh,
mac Domhnaill, mic Muirchertaigh, agus do Baodan, mac Mhuirceartaich,
mic Muireadhaigh, i righe nEreann.

Aois Criost, cuig céd seascat atrí. S. Molaisi, abb Daimhinnsi,
décc an dara la décc do September. Iar mbeith dá bhliadhain i
righe nEreann

dEochaidh agus do Baodan, torchradar la Cronán, toiseach
Ciannachta Glinne Gemhin.

Aois Criost, cúig céd sesccat a cethair. An céd bhliadhain do
Ainmire, mac Sedna, mic Fergusa Cendfhoda, hi righe nEreann.

Aois Criost, cúig céd seasccat a cúig. An dara bliadhain dAinmire.
Deman, mac Cairill, ricch Uladh, mic Muireadhoigh Muindeircc, do
marbhadh la bachlachaibh Boirne. Murchobhlach la Colman mBecc,
mac Diarmata, mic Fergusa Cerrbheoil, agus la Conall, mac Comhgaill,
toiseach Dal Riada hi Soil, agus i nIle, co ttardsat edála
iomdha eistibh.

Aois Criost, cúig céd seasccat a sé. Iar mbeith trí bliadhna hi
righe nEreann dAinmire, mac Sedna, torcair la Fergus, mac
Nelline, dia nebrad.

Féimin an tan rom boi rí, nir bo mennat nach detlai,
Indiu as foirdergg a lí, la hAinmire, mac Séatnai.

Aois Criost, cúig céd seasccat a seacht. Iar mbeith aon bhliadhain
hi righe nEreann do Baodan, mac Nindeadha, mic Fergusa Cendfoda,
do cear oc Lém inn ech, i ndebhaidh, las an da Comaoine .i.
Comaoine, mac Colmain

Bicc, mic Cerbhaill, agus Comaoine, mac Librene, mic Iolladhain, mic
Cerbhaill. Tré comhairle Colmain Bicc do ronsat an gníomh hishin.

Aois Criost, cúig céd seasccat a hocht. An ced bhliadhain dAodh,
mac Ainmirech, ós Erinn. Feargas mac Nelline, do mharbhadh la
hAodh, mac Ainmirech, i ndioghail a athar.

Aois Criost, cúig céd seascca a naoi. An dara bliadhain dAodh. S.
Oenna, mac ua Laighisi, abb Cluana mic Nóis, décc. S. Ite, ógh ó
Cluain Credhail, décc an 15 Ianuarii. As di ba hainm Mide.

Aois Criost, cúig céd seachtmoghat. An treas bhliadhain dAodh.
S. Moeinend, espucc Cluana fearta Brenainn, décc an céd lá do
Marta.

Aois Criost, cúig céd seachtmoghat a haon. S. Brenoinn, ab Biorra,
décc an naomhadh lá fichet do Nouember. Cath Tola ria Fiachna,
mac Baodain, mic Cairill, for Osraighibh agus for Elibh, agus ro
meabhaidh forra. Tola ainm maighe etir Cluain ferta Molua agus
Saighir. Cath Femhin ria Coirpre mac Cremhthainn, ri Mumhan,
for Colman Becc, mac Diarmada, agus ro meabhaidh ar Colman.

Aois Criost, cuig céd seachtmoghat adó. An cúicceadh bliadhain
dAodh. Cath Doete, dian hainm Bealach Feadha, ria nAodh,
mac Ainmirech, for

feraibh Midhe, du in ro thuit Colman Becc, mac Diarmada. Conall
mac Comhgaill, rí Dal Riatta, do écc. As eisidhe ro edhbair hI
do Choluim Cille.

Aois Criost, cuig céd seachtmoghat a trí. An seiseadh bliadhain
dAodh. Brenainn, mac Briuin, flaith Teathbha, décc.

Aois Criost, cuig céd seachtmoghat a cethair. A seacht dAodh.
Marbhadh Aodha, mic Eathach Tiormcharna, la hUíbh Briuin.

Aois Criost, cúig céd seachtmoghat asé. An naomhadh bliadhain
dAodh. S. Brenainn, abb Cluana ferta Brenainn, an 16 Maii,
agus do fuair bas a nEanach dúin, agus do hadhlacadh a chorp a
cCluain ferta Brenainn. Colman, mac Coirpre, ri Laighen, décc
acc Sliabh Maircce.

Aois Criost, cúicc céd seachtmoghat aseacht. An deachmhadh bliadhain
dAodh. S. espucc Ethchen Cluana fota Baitan abha décc an 11
Februari. S. Caireach Dergain ogh, o Cluain Boireann, decc 9
Februari. Feidhlimidh Finn, abb Arda Macha, do écc.

Aois Criost, cuig céd seachtmoghat anaoi. A dó décc dAodh. Cath
Droma mic Earcca ria nAodh, mac Ainmirech, for Cenel nEoghain,
dú in ro marbhadh Colcca, mac Domhnaill, mic Muircheartaigh, mic
Muireadhoigh.

Aois Criost, cúig céd ochtmoghat. A tri décc dAodh. Fergus
Scannal, rí Mumhan, do marbhadh.

Aois Criost, cúig céd ochtmoghat a haon. A cethair décc dAodh.
Aedh, mac Suibhne, toiseach Maonmuighe, décc.

Aois Criost, cuig céd ochtmoghat a dó. A cúig décc dAodh.
Feradhach, mac Duaich, tigherna Osraighe, do mharbhadh la a
mhuintir feisin.

Aois Criost, cuig céd ochtmoghat a trí. A sé décc dAodh. S.
Fergus, epscop Droma Lethglaise, do écc an 30 do Mharta, agus
asé an Fergus sin ro fhothaidh Cill mBian.

Aois Criost, cúig céd ochtmoghat a cethair. A seacht décc dAodh.
S. Natcaoimhe, abb Tíre da ghlas, brathair Caoimhghin, do écc an
céd lá do Maii.

Aois Criost, cúig céd ochtmoghat a cúig. An tochtmhadh bliadhain décc
dAodh. Brenainn tigherna Teathbha, décc. As eisidhe ro
edhbair (rias an tan)

(sain) Dermagh do Dia, agus do Colom Cille. Baettan, mac Cairill,
rí Uladh, décc.

Aois Criost, cúig céd ochtmoghat asé. A naoi décc dAodh. S.
Dáigh, epscop, mac Cairill, décc an 18 August. Feidhlimidh, mac
Tighernaigh, rí Mumhan, décc. Cath Moighe Ochtair ria mBran
Dubh, mac Eathach, for Uibh Néll isin tealaigh os Cluain Conaire
a ndes.

Aois Criost, cúig céd ochtmoghat a seacht. An fichetmhadh bliadhain
dAodh. S. Caorlan, epscop Arda Macha, décc, an cethramhadh lá
fichet do Mharta. S. Seanach, epscop ó Cluain Ioraird, décc.

Aois Criost, cuig céd ochtmoghat a hocht. A haon ficheat dAodh.
S. Aodh, mac Bricc, epscop ó Cill Air, i Midhe, decc 10 do
Nouember. Lughaidh Lis móir décc.

Aois Criost, cuig céd ochtmoghat a naoi. A do ficheat dAodh. S.
Macnise, abb Cluana mis Nois, frí re sé mbliadhan, décc, agus a
écc an 13 do mhí Iun.

Aois Criost, cuig cédnochat. An treas bhliadhain fichet dAodh.
Cath Euduind móir ria bFiachna, mac Baetain, mic Cairill, mic
Muireadhoigh Muindeircc, for Gerthidhe, mac Ronain, tigherna
Ciannachta. As do sin do raidheadh,

An feacht noile do regha fian mic Baotain i mBregha,
Biaid Ciannachta i ffout ní bat foicsi do rout.

Seanchan, mac Colman móir, do mharbhadh. S. Grigoir Belóir do
oirdneadh a gcathaoir agus a gcomharbus Pedair apsdal dia
aimhdheoin.

Aois Criost, cuig céd nochat a haon. A cethair fichet dAodh.
Aodh Cerr, mac Colmain, mic Coirpre, ri Laighen, décc.

Aois Criost, cuig céd nochat a dó. A cúig fichet dAodh. Colum
Cille, mac Feaidhlimidh, apstal Alban, ceann crabhaidh ermhoir
Ereann, agus Alban iar bPattraicc, décc ina ecclais fein in
hI ind Albain, iars an cúicceadh bliadhain triochad a oilithre,
oidhce domhnaigh do shundradh an 9 lá Iunii. Seacht mbliadhna
seachtmoghatt a aois uile an tan ro faoidh a spiorait dochum nimhe,
amhail asberar isin rann,

Teora bliadhna bai gan lés, Colum ina Duibhreglés,
Luidh go haingli asa chacht, iar seacht mbliadhna seachtmoghat.

Dallán Forgaill dixit hoc do bhás Choluim Cille:

Is leighes legha gan les, is dedhail smera re smuais,
Is abhran re cruit gan chéis, sinde déis ar nargain uais.

Aodh Dubh, mac Suibhne, rí Uladh, do mharbhadh la Fiacha, mac
Baettain. As las an Aodh nDubh sin torchair Diarmaitt mac
Cearbhaill.

Aois Criost, cuig céd nochat atrí. A sé fichet dAodh. Cumascach,
mac Aodha mic Ainmirech, do mharbhadh la Bran Dubh, mac Eathach, i
nDun Bucat, amhail as bert naomh Aedhan epscop:

Guidhim in coimdiu comhachtach, i fail Cille randairech
Robsi dioghail Comusccaigh, guin Aodha mic Ainmirech.

Cath Slebhe Cuae, hi Mumhain, for Muimhnechaibh, Fiachna ria mac
mBaodain. Tiobraide, mac Calgaigh, décc.

Aois Criost, cúig céd nochat a cethair. Iar mbeith seacht mbliadhna
fichet i righe nEreann dAodh, mac Ainmirech, mic Seatna, torcair
la Bran Dubh, mac Eathach, i ccath Duin Bolcc i lLaighnibh,
ar ndol dAodh do thabhach na

boromha, agus do dhioghail a mhic Chomusccoigh forra. Torcratar
aroile saor clanna isin cath sin Bealoigh Duin Bolg, im Becc, mac
Cuanach, tigherna Airghiall. As do bás Aodha do raidheadh:

A mBuac, ferus an tonn frí bruach,
Atfet scela, cia fa scith, Aodh, mac Ainmireach ro bíth.

Ben Aeda cecinit.

Baotor ionmuine tri taoibh, fris nach freisge aitherrach,
Taobhan taillten, taobh Temhra staobh Aodha, mic Ainmireach.

Aois Criost, cúig céd nochat a cúig. An céd bhliadhain dAodh
Slaine, mac mic Diarmata, mic Fergusa Cerrbheoil, agus do Colman
Rimidh, i righe nEreann. S. Baoithin, mac Breanainn, abb Iae
Choloim Cille, décc an 9 Iuine. Ailithir, abb Cluana mic Nóis,
décc.

Aois Criost, cúig céd nochat asé. An dara bliadhain dAodh Slaine,
agus do Colman. S. Sinche, ógh ó Cluain leth tengadh, décc, an
naomhadh lá do Nouember. Suibhne, mac Colmain Bicc, tigherna
Midhe, do mharbhadh la hAodh Sláine i mBridamh.

Aois Criost, cúig céd nochat aseacht. An treas bhliadhain dAodh
agus do Colman. Bemenna Bran Duib im Breghaibh. Brenainn,
mac Coirpre mic Fechine, tigherna Ua Maine, décc.

Cath Slemhna Midhe ria Colman Rimidh for Conall Cu, mac Aodha,
mic Ainmireach, agus ro meabhaidh for Conall. Cath Cúile Caol ria
bFiachna mac Baotain, for Fiachna, mac Demain, agus ro meabhaidh
an cath for Fiachna mac Demain. Uata, mac Aodha, mic Eathach
Tiormcharna, righ Connachta, décc.
Eochaidh, mac Diarmatta, epscop agus abb Arda Macha, décc.

Aois Criost, cúig céd nochat a hocht. An cethramhadh bliadhain
dAodh agus do Colman. S. Cainnech, abb Achaidh bó, dég an
11 dOctober iar mbeith ceithre bliadhna ochtmoghat ina beathaidh.
Cath Eachrois i Muiriusc ria Colman toisech Cenel Coirpre for
Maolcothaigh, toiseach Ceneoil Fiachrach Muirisce, agus ro
meabhaidh an cath sin for Maolcothaigh.

Aois Criost, sé chéd. S. Comhgall Bendchair abb Bendchair Uladh,
décc, an deachmhadh lá do mí Maii, iar mbeith caoga bliadhain tri
mí agus deich lá i nabdaine Bendchair. Nochat bliadhain a aois.
S. Colman, mac Lemne, décc. S. Laisren .i. ab Mena droichit,
décc.

Iar mbeith sé bliadhna hi righe nEreann dAodh Sláine, mac
Diarmatta, agus do Colman Rimidh, mac Baetain, mic Muircheartaigh,
mic Muireadhoigh, mic Eoghain, mic Néll, do cher dna Colman Rimidh
la Lochan Díolmana, torcair Aodh Sláine la Conall nGuithbhinn,
mac Suibhne, mic Colmáin Móir, no Bicc, mic Diarmatta, mic Cearbuill
ag Loch Semhdidhe. Aodh Gustan, comalta Conaill, agus
Baothghal Bile ron guinsetor, conadh dia noidheadhaibh as rubradh.

Cedu righe cedu reacht, cedu nert for rioghradha,
Enid Colman Rimidh rí, rombi Lochan Diolmana.
Ni ba hairmirt ind airle, do na hócaibh Tuaidh Tuirbhe,
Conall rombi Aodh Sláine, Aodh Sláine rombii Suibhne.

Conall, mac Suibhne, din do marbhadh Aodha Roin, toisioch Ua
Failge, hi Faithche mic Mencnain, agus Aodh Buidhe, toiseach Ua
Maine, isin ló ceatna in ro marbadh Aodh Slaine lais. As
dforaitmet na necht sin ro raidheadh.

Ba ro mór an ruadh cumha, for rioghraidh Ereann uile,
Aodh Slaine fa shluagh glonnach, Aodh Rón agus Aodh Buidhe.

Cui gan máthair, rí Mumhan, décc. Conall Cu, mac Aodha, mic
Ainmirech, décc.

Aois Criost sé céid a haon. An céid bhliadhain dAodh Uairiodhnach,
mac Domhnaill Ilchealgoigh, mic Muirchertaich, mic Muireadhoigh, mic
Eoghain, hi righe nEreann. S. Laisren, .i. mac Feradhaigh, ab
Iae Coluim Cille, dég an 16 do September. Cath Slaibre ria
nUibh Néll for Bran Dubh, mac Eathach, ri Laighen, agus
Brandubh, .i. mac Eachdach, do mharbhadh la hairchindech Senboithe
Sine, agus la a dheirbhfine budhéin, amhail asberar,

Sarán Soebhdherc, seol go se, airchinneach Senboith Sine,
E ní dalbh, gan brandul brath, ro marbh Brandubh, mac Eathach.

Laighneach sainredhach ro raidh inn so,

Madh i mbethaidh mic Eathach, dom hisadh an tuaiscertach,
In cath ima nuaratharar, as cian o do fuaiscertfadh.
Diambadh hi treb tuireadoigh mac Eathach mic Muireadhoigh
Nocha beroinn mo bholg lán do chill ar ai Aodha Allán.

Colman, mac Fearadhoigh, toisioch Osraighe, décc.

Aois Criost, se céd a dó. An dara bliadhain dAodh. S. Sinell,
epscop Maighe bile, décc an céd lá dOctober.

Aois Criost, sé chéd a cethair. An cethramhadh bliadhain dAodh.
Fiachra Caoch, mac Baodain, do mharbhadh la Cruithniu.

Aois Criost, sé chéd a cúig. An cúicceadh bliadhain dAodh. S.
Beoghna, abb Bendchair iar cComhgall, dég 22 dAugust.
Molua, .i. Lughaidh, mac hUi Oiche, céd abb Cluana ferta Molua,
dég. Seachnasach, mac Garbháin, toiseach Ceneoil mBoghaine, do
mharbhadh la Domhnall, mac Aodha, mic Ainmirech. Conall an ghae
dheircc, mac Daimhene, do mharbhadh la hUibh Méith Macha.

Aois Criost, se céd a sé. An seiseadh bliadhain dAodh Uairiodhnach.
S. Siollan, mac Caimmin, abb Bennchair, agus comharba Comhgaill,
dég 28 Februari. Aedh anchori, Aodh, mac Colgan, toisech
Airghiall agus na nAirther archena, décc, ina oilithre hi
cCluain mic Nois. As dó do ráidheadh.

Ro bai tan, ba lind ordan Loch da damh,
Ní bui an loch acht ba hordan, hi flaith Aodha, mic Colgan.
Cuma damhnadh muir cara rodam cur
Cebé fo cer trilis treabh, tré inis Locha da dam.

Maolumha, mac Baetain, dég. Colcca Doilene, mac Fiachna, dég.
Maoldúin, mac Ailene, toiseach Moghdhorn Maighen, décc.

Aois Criost, sé chéd a seacht. Iar mbeith seacht mbliadhna i righe

nEreann dAodh Uairiodhnach atbath ag Ath da ferta. Cath
Odbha ria nAenghus, mac Colmain, dú in ro marbhadh Conall Laogh
Bregh, mac Aodha, go sochaidhe móir ime, dia nebradh.

An scé immullach Odhba, cea a ghai doghra ni laes
Deithbhir di, cid olc a denn, ro baí mór cend ina craos.

Aois Criost, sé céd a hocht. An céid bhliadhain do Maolcobha, mac
Aodha, mic Ainmireach, hi ríghe nEreann.

Aois Criost, sé chéd anaoi. An dara bliadhain do Maolcobha. S.
Tolua Fota, abb Cluana mic Nóis, dég. Seannach, abb Arda
Macha, ó Cluain Ua nGrici doisidhe, agus a écc.

Aois Criost, sé céd a deich. S. Colman Eala, abb lacuna déc, 26
do

September isin seisedh bliadhain ar caogait a aoisi. Neman, abb
Lis móir, décc.

Iar mbeith teora mbliadhan i righe nEreann do Maolcobha, mac
Aodha, mic Ainmirech, do chear la Suibhne Meann, hi ccath Slébhe
Toadh. Ronan, mac Colmain, rí Laighen dég. Gorman do
Mughdhornaibh, ó ttád Meic Cuinn, asé ro boi bliadhain for uisce
Tiobrait Finghin, agus ina ailitre i cCluain mic Nois, atbath.

Aois Criost, sé céd a haon ndécc. An céid bhliadhain do Suibhne
Meann, mac Fiachna, mic Feradhaigh, hi righe uas Erinn. Ecclas
Bennchair Uladh do Losccadh.

Aois Criost, sé céd a dó décc. An dara bliadhain do Suibhne.
Fiontain Oentreibh, abb Bendchair, décc. Condere do losccadh.
Fasughadh Toraighe la murcobhlach muiridhe.

Aois Criost, sé céd a tri décc. An treas bhliadhain do Suibhne.
Colccu, mac Suibhne, do mharbhadh, agus bás Fiachach, mic Conaill,
in bhliadhain sin. Fergus, mac Colmáin Móir, flaith Midhe, do
mharbhadh la hAnfartach Ua Mescan do Muintir Blaitine. As do
sin as rubrad innso:

Ma dom isadhsa com teach, hUa Mescain Anfartach,
Uisce dorbach do bér dó, fo bith gona Feargosa.
Cep tan do corat buidhne ceneoil Colmáin sech Cúilne,
Iar mí foiset di suide, Sil Mescain im Blaitiniu.

Aois Criost, sé céd a cethair décc. An cethramhadh bliadhain do
Suibhne. S. Caemhan Brecc, ó Ros each, décc, an cethramhadh la
décc do September. Aodh Bendan, rí Iarmumhan, décc. As do
foraithmet a bháis as rubradh:

Aodh Bendan, don Eoghanacht Iarluachair, -
As mairg seoda dianad rí, cenmair tír dianat buachail.
A sciath an tan fo crotha, a bhíodhbhadha futbotha'
Cesa beccan (beth acht) for a muin, as didiu don Iarmhumhain.

Finghin, mac Fiachrach, dég.

Aois Criost, sé céd a cúig décc. An cúigeadh bliadhain do Suibhne.
Ailill, mac Baetáin, Maoldúin, mac Fergusa, mic Baotáin, agus
Diucolla do mharbhadh hí Muigh Slecht, hi ccrich Connacht. Do cenel
mBaotáin, mic Muirchertoigh doibh. Fiachra, mac Ciarain, mic
Ainmire, mic Sedna, dég. Cath Cendgabha.

Aois Criost, sé céd a sé décc. An seiseadh bliadhain do Suibhne.
Aengus, mac Colmain Móir, flaith Ua Nell an desceirt, dég.

Cumhdach ecclaise Toraighe la Cenel gConaill, iar na diothláithriughadh
fecht riamh. Dunchadh mac Eoghanáin, Neachtain mac Canainn, Aedh (décc).

Aois Criost, sé céd a seacht décc. An seachtmhadh bliadhain do Suibhne.
S. Caoimhghin, abb Glinde da locha, décc an 3 Iuni, iar ccaitheamh
fichet ar chéd bliadain daois go sin. Comhgall epscop, agus Eoghan,
epscop Ratha Sithe, décc. Cath Cind delgten ria cConall, mac
Suibhne, agus ria nDomhnall mBreac, dú in ro marbhadh da mac Libren,
mic Iollainn, mic Cerbhaill. Maolbracha, mac Rimedha, mic Colmain, mic
Cobhthaigh, agus Ailill, mac Cellaigh, dég.

Cath Cindgubha (no Cinn Bughbha) ria Raghallach, mac Uattach, for
Colman mac Cobhthaigh (athair Guaire Aidhne) airm in ro marbhadh
Colman budhesin. Colga, mac Ceallaigh, dég. Ailill, mac
Ceallaigh, dég.

Aois Criost, sé céd a hocht décc. An tochtmadh bliadhain do Suibhne.
S. Siollán, epscop agus abb Maighe bile, décc an 25 do August.
Liber, abb

Achaidh Bó Cainnigh. Ráth nGuala do losccadh la Fiachna, mac
Baotain, conadh ann asbert Fiachna:

Ro gabh tene Rath nGuala, tasca biucca tan huadha,
Suaichnidh inneort as abadh, ni buim dia congabhadh.
Ro gabh tene Rath nGuala tasca biucca tan huade,
As dian adhannat ind uilc tenidh i rRaith Aodha Builc.

Aois Criost, sé chéd anaoi décc. A naoi do Suibhne. Doir mac Aodha
Allainn do mharbhadh la Failbhe Flann Fidbhadh, amhail asbert feisin:

Ce chana damsa guin Dáir, ar ní rubha Dairene,
As ann ro oirc cach a doel, ó ro oircc a duilene.

Ro marbhadh somh iaramh a ndíoghail Dair. Atbert a mháthair accá éccaíne:

Ba guin saír, ní ba toghail Inse Caíl,
Dia tomat gáir na mbidhbadh, im chend Failbhe Flaind Fidhbhadh.

Rónán, mac Colmain, décc.

Aois Criost, sé céd a fiche. An deachmhadh bliadhain do Suibhne.
Seanach Garbh, abb Cluana ferta Brenainn, décc. Colman mac
Coingellain décc. Ronan, mac Tuathail, tigherna na nAirther, dég.
Corbmac Caomh, agus Iollann, mac Fiachrach, décc. Mongan, mac
Fiachna Lurgan, do mharbhadh

do cloich la hArtur, mac Bicair, do Bretnaibh, conid do ro raidh Becc
Boirche:

As huar an gaeth dar Ili, do fail occa i cCiunn tire;
Do gensat gnimh namhnus dé, mairfit Mongan, mac Fiachnae.
Lann Cluana hairthir indiu, amhra cethrar fors riadhadh,
Corbmac caemh fri imfochidh, agus Iollann mac Fiachrach,
Agus an dias aile dia fognad mor do thuathaibh,
Mongan, mac Fiachna Lurgan, agus Ronán mac Tuathail.

Cathal, mac Aodha, rí Mumhan, décc.

Aois Criost, sé chéd fiche adó. An dara bliadhain décc do Suibhne.
S. Fergna Brit, abb Iae agus epscop, dég an dara lá do Marta. S.
Lachtnain, mac Torbén, abb Achaidh uir, décc 10 do Marta. Cath
Cairn Feradhaigh ria fFailbhe Flann for Condachtaibh, dú in ro marbhadh
Conall, toiseach Ua Maine, Maeldubh, Maoldúin, Maolruain,
Maolcalggaigh, agus Maolbresail, agus aroile saorclanna, agus fodaoine
cen mo tatsidhe, agus ro meabhaidh for Guaire Aidhne, a hionadh an
cathaigthe, conadh dosidhe asrubradh:

Do rochair do Condachtaibh, hic ath cuma in tseisir,
Maolduin, Maolruain, Maolcalggaigh, Conall, Maoldubh, Maolbreisil.

Cath Lethed Midind, i nDruing, ria bFiachna, mac Demain, tigherna
Dal bFiatach, for Fiachna, mac mBaodain, rí Uladh. Ro meabhaidh an
cath for Fiachna mac Baodain, agus cer ann. Mac Laisre, epscop agus abb
Arda Macha, décc.

Aois Criost, sé chéd fiche atrí. Colman mac Ua Barddani (.i. do
Dal Barrdainne a chenel) abb Cluana mic Nóis décc. Iar mbeith trí
bliadhna décc do Suibhne Meann hi fflaitheas Ereann do cer la Congal
cClaon, mac Scandlain, i Traigh Bréna. Conadh dia oidhidh atrubradh:

Suibhne co sloghaibh dia soi, do tarraigh bronaigh Brenai,
Ro marbhadh an gaeth go ngail, la Congal caech mac Scandail.

Aois Criost, sé chéd fiche a cethair. An ced bhliadhain do Domhnall, mac
Aodha, mic Ainmirech, hi righe nEreann. S. Colman Stellan ó Tír da
ghlas dég, 26 Maii. S. Maodhocc, espucc Ferna, décc 31 Ianuari.
Ronan,

mac Colmain, décc. Cath Duin Ceithern ria nDomhnall, mac Aodha, mic
Ainmirech, for Conghal Caoch, no Claon, mac Scandlain, dú in ro marbhadh
Guaire Gaillseach, mac Forannain, agus aroile sochaidhe, agus ro meabhaidh
iarumh for Congal, dia nebradh:

Cath Duin Ceithirn dia raibhe cru ruadh dar suile glasa,
Batar for sliocht Congail cruim colla muinremhra massa.

Cath Arda Corainn la Condaidh Cerr, tigherna Dail Riada, airm in
ro marbhadh Fiachna, mac Démain, rí Uladh.

Aois Criost, sé chéd fiche a cúig. An dara bliadhain do Domhnall.
Fionntain Maoldubh do écc. Mobai, mac Ui Aldai. Cath Lethairbhe etir
Maolfitrigh, toiseach cenel mic earcca, agus Ernaine mac Fiachrach,
toiseach Cenel Feradhaigh, du in ro marbadh Maolfitrigh, mac Aodha
Uairiodhnaigh. Brandubh, mac Mailcobha, dég.

Aois Criost, sé chéd fiche aseacht. An cethramhadh bliadhain do
Domhnall. Cath Atha Abla, dú in ro marbhadh Dicul, mac Fergusa Tuli
la Mumhain. Inis Medcoit dfhothucchadh la hepscop Aedhain.

Aois Criost, sé chéd fiche a hocht. An cúicceadh bliadhain do Domhnall.
Cath Atha Goan, i niarthar Liffe, ria fFaolan, mac Colmain, agus ria
Conall, mac Suibhne, toisech Midhe, agus ria bFailge (no
bFailbhe) Flann, rí Mumhan, airm in ro marbhadh Criomhtann, mac
Aodha, mic Seanaigh, rí Laighen, co sochaidhe oile imaille fris.
Mór Mumhan décc.

Aois Criost, sé céd triocha. An sechtmhadh bliadhain do Domhnall. Da mhac
Aodha Slaine do mharbhadh la Conall, mac Suibhne, oc Loch Trethin, oc
Fremhoinn, .i. Congal, toisech Bregh, senathair Ua cConaing, agus
Ailill Cruitire, senathair Shil nDluthaigh. Cath Seghaisi, dú inar
marbhadh Lochene, mac Nechtain Cendfoda, agus Comasccach, mac
Aongasa. Cath Cuile Caolain re nDiarmaid, mac Aodha Slaine, airm in
ro marbhadh da mhac Aongusa, mic Colmáin Móir .i. Maolumha agus
Colcca, agus araill oile amaille friú, dia nebradh:

Cath Cúile Caoláin caine, ro bo daonbaigh co ndile,
Meabhaidh ria nDiarmait Deala, for fiora medha Midhe,
Hi ruba Colgan cendbháin, agus Maolumha ind ollgráidh,
Dá mac Aongasa armglóir, mic cruthglan calmóir Colmáin.

Segene, abb Iae Coluim Cille, do fothucchadh ecclaise Rechrainne.
Conall,

mac Suibhne, toisech Midhe, agus Maolumha, mac Forannáin, do mharbhadh
la Diarmaitt, mac Aodha Slaine.

Aois Criost, sé chéd triocha a haon. An tochtmhadh bliadhain do
Domhnall. Ernaine, mac Fiachna, toisech Chenél Feradhaigh, do mharbhadh.
As lais sidhe torchair Maolfithrigh, mac Aodha Uairiodhnaigh, hi ccath
Letherbhe. Carthach, .i. Mochuda, mac Fiondaill do ionnarbadh a
Rathain.

Aois Criost, sé chéd triocha a trí. An dechmhadh bliadhain do Domhnall.
Failbhe Flann, rí Mumhan, décc.

Aois Criost, sé chéd triocha acethair. An taonmhadh bliadhain décc do
Domhnall. S. Eochaidh, abb Lis móir, décc an 17 dAipril. S.
Fionntain, mac Telchain, décc an 21 dOctober. Cath Maighe Rath
ria nDomhnall, mac

Aedha, agus ria macaibh Aedha Slaine for Congal Claon, mac
Scandlain, rí Uladh, du ittorchair Conghal, Ulaidh, agus Allmarraigh
ar aon ris. Cath Saeltire ria cConall cCaol, mac Maoilcobha, for
Cenel nEoghain.

Aois Criost, sé chéd triocha a cúig. An dara bliadhain décc do Domhnall.
Ailill, mac Aodha Róin, Congal, mac Dunchadha, décc. Duinseach, ben
Domhnaill, mic Aodha, rí Ereann, décc.

Aois Criost, sé chéd triocha a sé. An treas bhliadhain décc do Domhnall.
S. Mochuda, epscop Lis móir agus abb Raithne, decc 14 Maii. Cath
Cathrach Chindcon la Mumhain ria nAongus Liath, for Maoldúin, mac
Aodha Bendáin. Maolodhar Macha, flaith Oirghiall, décc. Maoldúin,
mac Aodha, do loscadh i nInis caoin. Maoldúin, mac Feargusa, agus
Maoldúin, mac Colmáin, décc.

Aois Criost, sé chéd triocha a secht. An cethramhadh bliadhain décc do
Domhnall. S. Cronán mac Ua Loegde, abb Cluana mic nois, décc 18
Iuli. S. Mochua, abb Balla, décc 30 Marta.

Aois Criost, sé chéd triocha a hocht. S. Critan in Aondruim décc an
seachtmhadh décc do Maii. Aodh Dubh, abb agus epscop Cille dara, dég,
agus ba rí Laighen ar tos esidhe. Dalaise, mac hU Imdae, abb
Leithglinne, décc.

Aois Criost, sé céd triocha anaoi. S. Dagan Inbhir Daoile do écc 13
September. Iar mbeith se bliadhna dég i righe nEreann do Domhnall, mac
Aodha, mic Ainmirech, fuair bás ind Ard Fothadh, i tTír Aodha, do
shunnradh iar mbuaidh naithrighe, uair baoi bliadhain i ngalar a écca,
agus no caitheadh corp Criost gacha domhnaigh. Oilill, mac Colmáin,
toiseach Cenel Laoghaire (décc).

Aois Criost, sé chéd cethracha. An céd bhliadhain do Chonall Caol agus
do Cheallach, dá mhac Maoilcobha, mic Aodha, mic Ainmirech, os Erinn
i righe.

Scannlan mór, mac Cinnfaolaidh, toisech Osraighe, décc. Cuana, mac
Ailcene, toisech Fermaighe, décc. Bu hé sin Laoch Liathmhuine.

Aois Criost, sé chéd ceathracha a haon. An dara bliadhain do Chonall agus
do Cheallach. Maolbresail agus Maolanfaidh décc, agus Flann Enaigh
do ghuin. Do Chenél cConaill Gulban iadsen.

Aois Criost, sé céd cethracha a dó. An treas bhliadhain do Chonall agus
do Cheallach. S. Cronan Becc, espucc nAondroma, décc an 7 Ianuarii.
Furadhrán, mac Beicce, mic Cuanach, toisech Ua Mec Uais, décc.
Huaisle inghen Suibhne, mic Colmáin, ben Faoláin, righ Laighen,
décc. Cath Gabhra etir Laighnibh féin.

Aois Criost, sé chéd cethracha atrí. An cethramhadh bliadhain do
Chonall, agus do Cheallach. Dunchadh, mac Fiachna, mic Demain, rí
Uladh, décc.

Aois Criost, sé chéd cethracha a cethair. An cúicceadh bliadhain do
Chonall agus do Cheallach. Bolccluatha, tigherna Ua cCeinnselaigh,
décc.

Aois Criost, sé chéd ceathracha a cúicc. An seiseadh bliadhain do
Chonall agus do Cheallach. S. Mac Laisre, abb Bennchair, décc an
16 Maii. Raghallach,

mac Uatach, rí Connacht, do mharbhadh la Maolbrighde, mac
Mothlachain, dia domhnaigh do shunnradh, dia nebradh:

Raghallach, mac Uatach, goeta do mhuin geileich,
Muirend dechmon ro cich, Cathal dechmon derich.
Hi greis aniu do Cathal, cia contola fiadh rioghaibh,
Ciasa Cathal cen athair, ní a athair cen díoghail.
Midhedh sech adroch díghail, athar uird a ridneat,
Gonad se firu coigat, oirgedh sé oirgne déac.
Mo chuitsi i ccuma caich, dioghail Raghallaigh ro faith,
Fil a ulcha léith im laimh, Maoilbhrighdi, mic Motlachain.

Cath Cairn Conaill ria nDiarmaid, mac Aodha Slaini, for Guaire, dú in
ro marbhadh an da Cuán, .i. Cuán, mac Enda, rí Mumhan, agus Cuán,
mac Conaill, taoisech Ua Figente, agus Tolamhnach, toisech Ua
Liathain, agus ro meabhaidh for Guaire a hionadh an catha. Iseadh cetus
do luidh Diarmait do thabhairt in catha so tria Cluain mic Nois.
Do righensat iaromh samhadh Ciarain eatla fri Dia fair, co tisadh slán
dionchoibh a ccoraighechta somh. Iar soadh
iaramh in righ ro eadhbair Tuaim nEirc co na fodhlaibh feronn (.i. Liath
Manchain)

amhail fod for altóir, do Dia agus do Chiaran, agus do bert teora triste
(.i. mallacht) for righ Midhe dia nibhedh neach dia muintir cidh digh
nuisce ann. Conadh desin do reogart Diarmaitt a adhnacal hi cCluain
mic Nóis.

Aois Criost, sé chéd, cethracha ase. An seachtmhadh bliadhain do
Chonall agus do Chellach. Cath Duin Criomhthainn ria Conall agus
ria cCeallach, da mhac Maoilcobha, for Aongus, mac Domhnaill, agus ro
marbhadh Aongus san chath sin, agus ro marbhadh citth Cathasach, mac
Domhnaill Bric, san cath sin beos. Maolcobha mac Fiachna, mic Demain rí
Uladh, do mharbhadh la Congal cCennfoda, mic Dunchadha.

Aoís Criost, sé céd cethracha a seacht. An tochtmhadh bliadhain do
Chonall agus do Chellach. Dunchadh agus Conall, dá mac blaithmeic,
mic Aodha Slaine, do marbhadh la Laighnibh i tturraeth muilinn Maolodhrain,
mic Díoma Cróin. Marcan agus Maolodhrán ro ghon iad andís, as do
ro ráidh Maolodhran,

A mhuilind, ro melt anba do thuirinn,
Ní bo coimmelt for seirblind, an roimeilt for Uibh (Síl) Cerbhaill.
An grán meiles an Muileann, ní coirce acht as derg thuireann,
Ba do gesccaibh an chroinn máir, fotha muilinn Maoilodhráin.

Aois Criost, sé chéd cethracha a hocht. An naomhadh bliadhain do
Chonall agus do Cheallach. Maincheni, abb Meanadroichit, do écc.
Iomairecc Cuile

corra ria nAoldeith agus ria nOnchoin, dú in ro marbhadh Cillne, mac
Forannáin, toisech Ua bFailghe. Cugamhna, mac Suibhne, décc.

Aois Criost, sé chéd cethracha anaoi. An deachmhadh bliadhain do Chonall
agus do Cheallach. S. Cronán Maighe bile décc, an seachtmhadh lá
do mí August. Cath airthir Sheola, i Connachtaibh, ria
cCennfaoladh, mac Colgain, agus ria Maonach, mac Baoithin, toisech
Ua mBriúin, in ro marbhadh Marcán, mac Toimeine, toisech Ua Maine.
Fergus mac Domhnaill, agus Fergus, mac Raghallaigh, agus Aodh
Bethra, mac Cuimmine, do mharbhadh la hUibh Fiachrach
Aidhne. Aodh Róin, mac Maoilcobha, décc. Maeldóid, mac Suibhne,
flaith Midhe, décc.

Aois Criost, sé chéd caogat. An taonmhadh bliadhain décc do Chonall agus
do Chellach. Aitchen, abb Tire dá glas, décc. Cailcén ó Lothra
décc. Cath Flescaigh ria cCrunnmaol, mac Suibhne, toisech Cenél
Eoghain, airm in ro marbhadh Cumascach, mac Oiliolla, toisech
Ua Cremthainn. Cruindmaol Erbuilgg, mac Ronáin, toisech Laighen
Desgabhair, décc. S. Beraidh, abb Duibhlinne, do écc.

Aois Criost, sé chéd caoga a haon. An dara bliadhain décc do Chonall agus
do Cheallach. S. Aedhlug, mac Cummain, abb Cluana mic Nóis, (décc)
an 26 Februarii.

Aois Criost, sé chéd caoccat a dó. An treas bhliadhain décc do na rioghaibh
remhraidhte. S. Colman, epscop, mac Aitelduibh, abb Cluana hIoraird,
décc 8 Februarii. S. Oissene Fota, ab Cluana hIoraird, décc Maii
1. S. Dachua Luachra, abb Ferna, décc.

Aois Criost, sé céd caoccat a cethair. A cúig décc do Chonall agus do
Cheallach. S. Nem Mac Ua Birn, .i. comharba Enne Airne, do écc 14
Iuni. Suibhne, mac Cuirtre, abb Iae, décc. Coincenn Cille Slébhe
décc. Cath Delenn, airm inar marbhadh Maoldóid mac Conaing.

Aois Criost, sé chéd caoccat a cúicc. An seiseadh bliadhain décc do
Chonall agus do Chellach. S. Mochaomhócc, abb Leth móir, décc an
treas lá décc do Mharta. Trí bliadhna décc ar ceithre céd fod a shaoghoil,
amhail dearbhus in rann:

Saoghal Mochaomhócc Léith, nocha cealat treoin na treith,
Trí bliadhna décc ceithre céd, ní baoghal ní hiomair brég.

Aois Criost, sé chéd caoccat a sé. S. Ulltan Mac Ui Concobhair, ó Ard
Breccain, décc an cethramhadh lá do September, iars an ochtmhocchat
bliadhain ar cet a aoisi.

Iar mbeith seacht mbliadhna décc ós Erinn do Chonall agus do
Cheallach, da mac Maoilcobha, mic Aodha, mic Ainmirech, do cher
Conall la Diarmait, mac Aodha Slaine, agus atbail Ceallach i mBrugh
Mic an Og. Blathmac, mac Maoilcobha, rí Uladh, a écc.

Aois Criost, sé chéd caoccat a seacht. An céd bhliadhain do Diarmait agus
do Blathmac, dá mhac Aodha Slaine, mic Diarmada, mic Fergusa Cerrbeoil,
i righe nEreann. Ceallach, mac Saráin, abb Othna móire, décc.
Mochua, mac Lonáin, décc. Dunchadh, mac Aodha Slaine, décc.

Aois Criost, sé chéd caoccat a hocht. An dara bliadhain do Diarmait agus
do Blathmac. Dioma Dubh, epscop Condere, dég an 6 Ianuarii.
Cummine, epscop nAondroma, décc. S. Sillan, epscop Daimhinsi, décc
an 17 Maii. Eochaidh, mac Blaithmic, mic Aodha Slaine, décc. Ailill,
mac Dunchadha, mic Aodha Slaine, décc. Conall Cranndamna décc.
Eoghan, mac Tuathalain, décc. Faolan, toisech Osraighi, do mharbhadh
la Laighnibh.

Aois Criost, sé chéd caoccat anaoi. An treas bhliadhain do Diarmait agus
do Blatmhac. Dainiel, epscop Cinngaradh, décc an 18
Februarii. Fionán

mac Rimedha, epscop, décc. Colman Glinne da locha décc an dara la do
December.

Aois Criost, sé chéd seasccat. An cethramhadh bliadhain do Diarmait agus
do Blathmac. S. Laidhgend, mac Baoith, ó Cluain Ferta Molua, dég an
12 Ianuarii. Conaing Ua Daint, abb Imlecha Iobhair, décc.
Iomairecc i nOghamain, oc Cinn Corbadain, la muintir Diarmata, mic
Aodha Sláine, .i. Onchú, mac Saráin, agus Maolmiolchon, agus
Cathusach, mac Eimhine, for Blathmac, mac Aodha Sláine, maighen in ro
marbhadh Conaing, mac Congaile, mic Aodha Slaine, agus Ulltan, mac
Ernaine, toisech Ciannachta, agus Cennfaoladh, mac Geirtidi, toisech
Ciandachta Ardda, agus Faolchu mac Maeleumha.

Maoldúin, mac Aodha Bennáin, décc. Maonach, mac Fingin, ri
Mumhan, décc. Maeldúin, mac Furadhrain, toisech Durlais, décc.
Maolfuatoigh, mac Ernaine, toisech Ciandachta, do mharbhadh. S.
Tomene, mac Ronáin, epscop Arda Macha, décc.

Aois Criost, sé chéd sesccat a haon. An cáicceadh bliadhain do
Diarmait agus Blathmac. S. Cummine Foda, mac Fiachna, epscop
Cluana Ferta

Brenoinn, décc in dara la dég do Nouember. Colman Ua Cluasaigh, oide
Cummine, ro raidh na roinnsi:

Ni beir Luimnech for a druim, desil Muimhnech ilLeth Cuinn,
Marbhan in noi ba fiú do, do Cummine mac Fiachno.
Ma do teighedh neach dar muir, seiseadh hi suidhe nGrigair,
Madh a hEri ní buí dó, inge Cumine Fodo.
Mo cumhasa iar cCumine, on lo ro foilgedh a árc,
Coi mocuil nis ningairedh, dord gaill iar nderach a bárc.

S. Colmán Ua Cluasaigh décc. S. Saran Ua Criotain décc.

Aois Criost, sé chéd sesccat a dó. An seiseadh bliadhain do Diarmait agus
do Blathmac. Segan Mac hUí Cuinn, abb Bendchair. Tuenócc, mac
Fiontain, abb Ferna. Indercaigh epscop, Dimma epscop. Guaire (.i.
Aidhne) mac Colmain, rí Connacht décc. Rob ionann mathair do Guaire
agus do Caimmine Insi Celtra, amhail asberar:

Cumman, inghen Dallbronaigh, mathair Caimmín is Guaire,
Moirseiser ar seachtmoghat, as sedh ro genair uaithe.

Conall agus Colccu, dá mac Domhnaill, mic Aodha, mic Ainmirech, do
mharbhadh la Ceirrcend.

Aois Criost, sé chéd seasccat atrí. An seachtmhadh bliadhain do
Diarmait agus do Blathmach. Baotan, Mac Ua Corbmaic, abb Cluana mic
Nóis, décc. Do Conmaicnibh mara a chenel. Comdhán mac Cutheanne,
Berach, ab Bendchair, Cernach Sotal, mac Diarmatta, mic Aodha
Sláine, décc (imaille ris an ndruing remhráite) do mortladh tuargaibh i
nErinn hi Kallainn August na bliadhnasa hi Muigh Iotha, hi
Fothartaibh.

Aois Criost, sé chéd seasccat acethair. Mortladh adhbhal do bheith in
nErinn in bhliadhainsi da ngoirthí an Buidhe Connaill, agus ro écsat
in drong so do

naomhaibh Ereann di, S. Feichin, abb Fobhair, 14 Februarii, S.
Ronan, mac Beroigh, S. Aileran ind egna, S. Cronan mac Silne,
S. Manchan Lethe, S. Ultan Mac hUi Cunga, abb Cluana hIoraird,
S. Colman Cas, abb Cluana mic Nóis, agus Cummine abb Cluana mic
Nois. Iar mbeith ocht mbliadhna i righe
nEreann do Diarmait agus Blathmac, dá mac Aodha Sláine, atbathatar
don mortladh cétna. Ro tathaimhset beos Maolbresail, mac Maeilidúin, agus
Cucenmathair, rí Mumhan. Aongus Uladh. Atbailset iliomat decclais
agus do tuaith i nErinn don mortlaidh hisin cenmotatsidhe. Dithgréin an
treas la do Maii.

Aois Criost, sé chéd sesccat acúicc. An céid bhliadhain do
Seachnusach, mac Blathmaic, hi righe nEreann. Baeithin, abb
Bendchair, décc. Ailill Fland Eassa, mac Domhnaill, mic Aodha, mic
Ainmirech, décc. Maolcaoich, mac
Scandail, toisech Cruithne do shliocht Ir, décc. Eochaidh
Iarlaithe, ri

Cruithne beos décc. Maoldúin, mac Scandail, toisech Ceneoil Coirbre,
décc. Duibhindrecht, mac Dunchadha, toisech hUa mBriuin, décc.
Ceallach, mac Guaire, décc. Cath Feirtsi etir Ulta agus
Cruithne, du in ro marbhadh Cathusach, mac Laircine. Faolan, mac
Colmain, rí Laighen, décc.

Aois Criost, sé chéd seasccat a sé. An dara bliadhain do Seachnusach.
Mortlaidh mór isin mbliadhainsi, dia ro eccsat cethrar abbadh hi
mBendchair Uladh, Berach, Cummine, Colum, agus Aodhán a nanmanda.
Cath Aine etir Aradha agus Ui Fidhgente dú in ro marbhadh Eoghan
mac Crundmail. Bran Fionn, mac Maoileochtraicch, toiseach na nDéisi
Mumhan, do mharbhadh. Blathmac, mac Maoilcobha, ri Uladh, dég.

Aois Criost, sé ched seasccat aseacht. An treas bhliadhain do
Seachnusach. Colman epscop, go naomhaibh oile imaille fris, do dul go
hInis bo finne, go ro fothaidh ecclas innte, conadh uaithe ainmnighthear
somh. Feargus mac Muccedho (décc).

Aois Criost, sé chéd seasccat a hocht. An cethramhadh bliadhain do
Seachnasach. S. Cummine Fionn, abb Iae Coluim Cille, décc an 24
Februarii.

Maolfothartoigh, mac Suibhne, toisech Cenel Tuirtri, décc.
Cennfaoladh ro raidh:

Ni dile, nach ri liomsa alaile
O do bretha Maolfothartoigh, ina ghaimhnen do Doire.

Maoldúin, mac Maonaigh, do mharbhadh. Criotan, abb Bendchair, décc.
Mochue mac Uist.

Aois Criost, sé chéd seasccat anaoi. Iar mbeith cúicc bliadhna ós Erinn
hi righe do Seachnusach, mac Blaithmic, do cear la Dubhduin, flaith
Ceneoil Coirbre. As for Sechnusach do rattadh an teistimensi,

Ba srianach, ba heachlascach, inteach hi mbidh Seachnusach,
Ba himdha fuigheall for slaitt histaigh i mbidh mac Blatmaic.

Bran Fionn, mac Maoileochtraich, toisech na nDéisi Mumhan. Maoldúin Ua
Ronain do mharbhadh. Blathmac, mac Maoilcobha, décc. Cuana, mac
Cellaigh, do mharbhadh. Bran Find, mac Maelefothartaigh, décc.
Dunchadh Ua Ronáin dég.

Aois Criost, sé céd seachtmhoghat. An céd bhliadhain do Cennfaoladh, mac
Blathmaic, hi righe nEreann. Dungal, mac Maoiletuile, toisech
Ceneoil

mBoghaine, do mharbhadh la Loingsioch, mac Aongusa, toisech Cinel
gConaill. Ard Macha agus Tegh Telle do losccadh. Bendchair do
losccadh. Cumasccach, mac Ronáin, décc.

Aois Criost, sé chéd seachtmoghat a haon. An dara bliadhain do
Chennfaoladh. Maolrubha, abb Bendchair, do dul i nAlbain, go ro
fothaigh ecclas Aporcrosan. Losccadh Maighe Lunge. Failbhe, abb Iae
Colaim Cille, do tocht i nErinn a hIae.

Aois Criost, sé chéd seachtmoghat a dó. An treas bhliadhain do
Cheannfaoladh. Sgannlan, mac Fingin, toisech Ua Méith, décc.

Aois Criost, sé céd seachtmoghat a trí. Iar mbeith ceithre bliadhna hi
righe nEreann do Cendfaoladh, mac Blaithmic, mic Diarmata, do cer la
Fionnachta Fledhach, hi ccath Aircealtra, oc Tigh Ua Maine. Noe,
mac Daniel, décc. Congal Cendfoda, mac Dunchadha, rí Uladh, do
mharbhadh la Bec Boirche.

Aois Criost, sé chéd seachtmoghat, a cethair. An céd bhliadhain do

Fiondachta Fledhach, mac Dunchadha, hi righe uas Erinn. S. Colman,
epscop ó Inis bó finde, décc an 8 lá dAugust. Fionán, mac
Airennain, décc. Cosccradh Ailigh Frigreinn la Fínshneachta, mac
Dunchadha. Failbhe, abb Iae, do soadh ina fhriting a hEirinn.

Aois Criost, sé chéd seachtmoghat a cúig. An dara bliadhain
dFhionnachta. Becan Ruimind dég i mBretain 17 Marti. Cath edir
Finsneachta agus Laighin la taobh Locha Gabhar, agus ro meabhaidh an
cath for Laighnibh. Dunchadh, mac Ultáin, toisech Airghiall, do
mharbhadh i nDun Forga la Maoldúin, mac Maoilefithrigh.

Aois Criost, sé chéd seachtmoghat a sé. An tres bhliadhain
dFhionnachta. Dairchell, mac Curetai, epscop Glinne da Locha (décc),
3 Maii. Comman epscop, Maoldoghar, epscop Ferna, Tuaimsnamha,
toisech Osraighe, do mharbhadh la Faolan Seanchostol. Colggu, mac
Failbhi Flainn, rí Mumhan, décc.

Aois Criost, sé chéd seachtmoghat a seacht. An cethramhadh bliadhain
dFionnachta. S. Failbhe, abb Iae Coluim Cille, décc an 22 do
Marta.

Neachtain Neir décc. Ceannfaoladh, mac Oiliolla, sai in eccna, décc.
Cath Taillten ria fFinshneachta fFledhach for Becc Boirche.

Aois Criost, sé chéd seachtmoghat a hocht. An cuicceadh bliadhain
dFinachta. Colman, abb Bendchair, décc. Maolfothartaigh, epscop
Arda sratha, décc. Fianamhail, mac Maoiletuile, ri Laighen, do ghuin
la Foicseachan, dia mhuintir féin, iar na forcongra fair dFínshneachta
Fledhach. Cathal, mac Raghallaigh, décc. Cath Bodhbhghna, dú in ro
marbhadh Conall Oirggnech, toisech Ceneoil Coirpre.

Aois Criost, sé chéd seachtmoghat a naoi. An seiseadh bliadhain
dFínshneachta. S. Ciar ógh, inghen Duibhrea, décc an 5 Ianuari.
Dungal, mac Sccandail, toisech Cruithne, agus Ceandfaoladh, mac Suibhne,
toisech Ciannachta Glinne Gaimhin, do losccadh la Maoldúin, mac
Maoilefithrigh, i nDun Ceithirn. Conall, mac Dunchadha, do mharbhadh
hi cciunn tíre. Seachnasach, mac Airmedhaigh, agus Conaing, mac
Conghaile, do mharbhadh.

Aois Criost, sé chéd ochtmhoghat. An seachtmhadh bliadhain
dFhíonachta.

Suibhne, mac Maoilumha, comharba Bairre Corcaighe, décc.
Cennfaoladh, mac Colcan, rí Connacht, do mharbhadh iar ngabháil tighe
fair. Ulchaderg

Ua Caillidhe, do Chonmaicnibh Cúile, ro mharbh eisidhe. Cath Ratha
móire Maighe line for Bretnuibh, bail in ro marbhadh Cathasach, mac
Maoiledúin, toisech Cruithne, agus Ulltan, mac Dicollae.

Aois Criost, sé chéd ochtmoghat a haon. An tochtmhadh bliadhain
dFíonachta. S. Ermbedhach, abb Craoibhe Laisre, décc an céd lá do
Ianuari. Colmán ab Cluana mic Nóis, decc. O Airtech dó.
Dunchadh Muiriscce, mac Maolduibh, rí Connacht, do mharbhadh. Cath
Corainn, dú inar marbhadh Colcca, mac Blaithmic, agus Fergus, mac
Maoiledúin, toisech Cenel Coirbre.

Aois Criost, sé chéd ochtmoghat a dó. An naomhadh bliadhain dFhionnachta.
Maine, abb nAondroma, décc. Loch nEathach do shoadh hi fuil.
Cath Caisil Fionnbhairr.

Aois Criost, sé chéd ochtmhoghat a trí. An dechmhadh bliadhain
dFhionnachta. Fásughadh Muighe Bregh la Saxoibh, etir ecclais agus
tuaith, hi mí Iun

do hsonnradh, agus rugsat braigdi iomdha leo as gach ionadh hi
farcaibhset ar fud Maighe Bregh, mailli re headaloibh iomdhaibh oile, go
ndechsat iaromh do chum a long. Congal mac Guaire décc. Breasal, mac
Fergusa, toisech Cobha (décc).

Aois Criost, sé chéd ochtmoghat a cethair. An taonmhadh bliadhain décc
dFionachta. Forcron, abb Cluana mic Nois, décc. Ar ar na huilibh
cethraibh a ccoitchinne, isin uile domhan, co diúidh teora mbliadhan co ná
terna cídh aon as an mile da gach cenel anmann archena. Sicc mór isin
mbliadhain sin co ro reidhset locha agus aibhne Ereann, agus din ro reodh an
muir eitir Erinn agus Albain, co mbidh imaithighidh eattorra fors an licc
eagha. Adamhnán do dhul go Saxaibh do chuindgidh na braite do bertsat
Saxain tuaiscert leo a Muigh

Bregh an bhliadhain rémraite. Fuair a haisec uatha iar ndenamh fert agus
miorbhal fiadh na sloghaib, agus do bhertsat onóir agus airmhidin móir do
iaramh imailli re hoghaiseacc gach neith ro cuinnigh cucca.

Aois Criost, sé chéd ochtmoghat a cúig. An dara bliadhain décc
dFionachta. Docummaichonóg, ab Glinde da locha, décc. Roisseni,
abb Corcaighe móire, décc. Osseni epscop Mainistreach, Fiontain, mac
Tulchain, décc. Feradach, mac Congaile, do marbhadh.
Finshneachta, an rí, do dhul dia oilithre.

Aois Criost, sé chéd ochtmoghat asé. An treas bhliadhain décc
dFhionachta. Cath Imbleacha Phich ria Niall mac Cernaich Sotoil,
for Congalach, mac Conaing, airm in ro marbhadh Dubhdainbher, toisech
Arda Ciannachta, agus hUaircridhe hUa Osene, toisech Conaille
Muirthemhne, agus ro sraoineadh an
cath for Congalach iaramh. As dia noidheadhaibh ro raidheadh:

Bronach Conailli indiu, deithbhir dóibh iar nUaircridhiú,
Ni ba heallmha bhies gen, i nArd iar nDubhdainbher.

S. Seghene, epscop Arda Macha, do écc. O Achadh Cladhbh dosidhe.
S. Cutbert, epscop Ferna, a Saxoibh, decc.

Aois Criost, sé chéd, ochtmhoghat a seacht. An cethramhadh bliadhain décc
dFíonachta. Beccan Cluana hIoraird décc. Gnathnat, banabb Cille
dara, dég. Congal, mac Maoiledúin, mac Aodha Bendain, rí
Iarmhumhan, do mharbhadh.

Ardmacha do losccadh. Bran, mac Conaill, rí Laighen décc.
Finguine Fotta décc. Feradhach Méith, mac Nechtlicc, décc.

Aois Criost, sé chéd ochtmoghat a hocht. An cúicceadh bliadhain décc
dFinshneachta. Cronan Macu Caulne, abb Bendchair, décc an 6 do
Nouember. Fidhgellach, mac Flainn, toisech Ua Máine, Iolan, epscop
Cinngaradh, décc. Dochinne Daire Bruchaisi, décc.

Aois Criost, sé chéd ochtmoghat a naoi. An seiseadh bliadhain décc
dFhínshneachta. Dabecog Cluana hAird décc. Fergas, mac Lodain, rí
Uladh, do mharbhadh la hUibh Eachdhach.

Aois Criost, sé céd nochat. An seachtmhadh bliadhain décc
dFinshneachta.

Dioraith, epscop Ferna, décc an 27 Iuli. Bran Ua Faolain, rí
Laighen, décc. Cath etir Osraighibh agus Laighniu, bail in ro marbhadh
Faolcor Ua Maolódhra. Ro feradh fleachadh fola i Laighnibh isin
bhliadhainsi. Ro soadh

imm ann bheós hi pairtibh cro agus fola, comba forrell do cach i coitcinne
é. Atchlos an faol ag labhairt do glor daonna, gomba hadhuath la cach.

Aois Criost, sé chéd nochat a haon. An tochtmhadh bliadhain décc
dFhínshneachta. Becfola epscop décc. hUidhreini Mhaighe bile
décc.

Aois Criost, sé chéd nochat a do. An naomhadh bliadhain décc
dFhionachta. Cronan Becc, abb Cluana mic Nóis, décc 6 April.
Cronan Balnae (decc).

Aois Criost, sé chéd nochat atrí. Gaimide Lugmhaidh décc. Meann
Boirne, abb Achaidh bó, décc. Iar mbeith fiche bliadhain hi righe
Ereann dFhionachta Fleadhach, mac Dunchadha, do cer la hAodh, mac
nDluthaigh, mic Aililla, mic Aodha Slaine, toisech Fer Cul, agus la
Congalach, mac Conaing, mic Congaile, mic Aodha Slaini, hi cath, hic
Greallaigh Dollaith. Do rocair beos Breasal, mac Fionnachta, isin cath
ísin araon ria a athair. Tadhg, mac Failbhe, do marbhadh hi nGlinn
nGaimhin.

Aois Criost, sé céd nochat a cethair. An céid bhliadhain do Loingseach,
mac Aongusa, hi righe nEreann. Loicheine Meann, eagnaidh, abb Cille
dara, décc. Cummeni Mughdorne dég. Finnguine mac Coí gén mathair, ri

Mumhan, dég. Fergal Aidhne, rí Connacht, dég, mac sidhe Guaire
Aidhne. Fianamhail, mac Maenaich, dég. Congalach, mac Conaing,
mic Congaile, mic Aodha Slaine, décc.

Aois Criost, sé chéd nochat a cúig. An dara bliadhain do Loingseach.
Caisin, scribhnidh ó Luscca, dég. Maolfothartaigh, mac Maolduibh,
tigherna na nAirghiall, décc. Magh Muirthemhne do fhásughadh la
Bretnoibh agus la hUltoibh. Iomairecc Crandcha, dú inar marbhadh
Feradhach, mac Mailedoith.

Aois Criost, sé chéd nochat asé. An tres bhliadhain do Loingseach.
S. Moling Luachra epscop, décc an 17 Maii. Cath i tTuloigh Garraiscc, i
bFhernmhaigh, bail in ro marbhadh Conchobhar Macha, mac Maoiledúin,
toisech na nAirther, agus Aodh Airéd, toisech Dal Araidhe.
Muirgius, mac Maileduin, tigherna Ceneoil Coirpre, décc.

Aois Criost, sé chéd nochat a seacht. An cethramhadh bliadhain do
Loingseach. Forandan, abb Cille dara, décc.

Aois Criost, sé chéd nochat a hocht. An cuicceadh bliadhain do
Loingseach.

Aodh Ancoire, ó Slebhtiu, décc. Iarnlaith, abb Lismoir, décc.
Fianamhail Ua Dunchadha, toisech Dal Riadai, agus Flann, mac
Cinnfaolaidh, mic Suibhne, toisech Cenéil Eoghain, do mharbhadh.
Aurthuile Ua Crunnmaoil, toisech Cenil Eoghain, dionnarbadh as in righe,
i mBretain. Fland Find, mac Maoiltuile hUi Crundmaoil, toisech
Cenil Eoghain, décc. Conall, mac Suibhne, toisech na nDeisi, décc.

Aois Criost, sé chéd nochat anaoi. An seiseadh do Loingseach. Colman,
Linne Uachaille, décc an 30 Marta. Ailill, mac Cuí gan mathair, rí
Mumhan, décc. Conall, mac Doinennoigh, toiseach Ua Fidhgeinte.
Niall Ua Cernaigh do mharbhadh i nDro manUa Casan, la
hIorgalach, mac Conaing.

Aois Criost, seacht ccéd. An seachtmhadh bliadhain do Loingseach.
Colman Ua hEirc, abb Cluana Ioraird, dég. Muiredhach Muighe hAaoi,
righ Connacht, mac Fergusa, ó ttát Síol Muireadhaigh, dég.
Iorgalach Ua Conaing

do mharbhadh la Brethnuibh. Aedh, mac Dluthaigh, dég. Conall, mac
Suibhne, tigherna na nDéisi, décc. Ceallach, mac Maeleroca epscop,
Diucuill, abb Cluana hEois, décc.

Aois Criost, seacht ccéd a haon. Faoldobhair Clochair décc 29 Iún.
Iar mbeith ocht mbliadhna hi righe Ereann do Loingseach, mac Aongusa,
mic Domhnaill, do rochair, hi ccath Corainn, la Ceallach Locha Cime,
mac Raghallaigh, amhail dearbhus Cellach isin rann,

Ba uilcc thuilcc, matan rombi oc Glais chuilcc,
Beosa Loingseach and do chailg (airdri Ereann ima cuird) .i. ima cuairt,

Torcratar tra a thrí meic imailli ris, Artghal, Conachtach, agus Fland
Gergg. Ro marbhait din da mac Colcen ann, agus Dubhdibherg, mac
Dunghaile, agus Fergus Forcraith, agus Conall Gabhra, agus aroile
saerchlanna cenmotatsidhe. Conall Meann, mac Cairbre, ro raidh na
roinnsi, agus ba heisiden fochann an catha,

Dia ti Loingseach don Bannai, co na triocha céd imme,
Giallfaidh, cidh leabhair a liach, Cellach Liath Locha Cimme.
Tecsaidh Ceallach ceirtle cruinne, cro tria rinne bodhbh mos linge
La righ Laimhdhercc Locha Cimme.

Aois Criost, seacht ccéd a dó. An céid bhliadhain do Congal Cinn

Maghair, mic Fergusha Fanad, uas Erinn hi righe. Colman
mac Fionnbhair, abb Lis móir, décc. Cath for Cloin ath, ria
Ceallach Cualonn, for Fogartach (iaromh na rí Erenn) Ua Cernoigh,
airm in ro marbhadh Bodhbhchadh Midhe, mac Diarmada, agus ro meabhaidh for
Foghartach.

Aois Criost, seacht ccéd a trí. An dara bliadhain do Congal.
Adhamhnan, mac Ronáin, abb Iae Coluim Cille, décc an 23 do
September, iar mbeith sé bliadhna fichet i nabdaine, agus iar seacht
mbliadhna seachtmoghat a aoise. Ba maith tra an ti naomh Adhamhnan, do
réir fiadhnaisi naoimh Béda, óir ba derach, ba haithrighech, ba
hurnuighthech, ba hinneithmhech, ba haointech, agus ba mesardha, daigh ní
loingedh do shír acht dia domhnaigh agus dia dardaoin nama.

Do roine mogh de féin do na subháilcibhsi, agus beos ba heagnaidh, eolach
illeire tuicsiona an naoimhscrioptura diadha. Ceallach mac Raghallaigh,
ri Condacht, iar ndul dó fá cuing clércechta décc. Iomairecc
Corcmodhruadh, bail in ro marbhadh Celechar, mac Commain.

Aois Criost, seacht ccéd a cethair. An treas bhliadhain do Congal.
Cennfaoladh Ua Aodha Bricc, abb Bendchair, décc an 8 April. Dachonna
Dairi, agus Ceallán, mac Seachnasaigh, eccnaidh, décc. Oissene
Fremhann, mac Galluist, abb Cluana mic Nóis, decc. Do Calraighe
Tethbha a chenel. Conchubhar, mac Maeilidúin, toisech Ceniuil
Coirpre. Becc Boirche, rí Uladh, do gabháil bachlae, agus a écc ina
oilithre, i foirchenn da bhliadhan décc iar sin. Flann Feabhla, mac
Sgannlain, abb Arda Macha, do écc.

Aois Criost, seacht ccéd a cúig. An cethramhadh bliadhain do Conghal.
Coibhdenach, epscob Arda sratha, décc 26 Nouember. Conodhar, abb
Fobhair, décc 3 Nouember. Inrechtach, mac Dunchadha Muiriscce, rí na
tteora Connacht, do mharbhadh la Fergal, mac Maoiledúin, agus la
Fergal mac Loingsich, mic Aongusa, agus la Conall Mend, toisech
Ceniuil Coirpre. Sloicchedh la Congal Cind Maghair, mac Fergusa
Fanat, for Laighnibh, co ttarat a réir uadhoibh. Ag tocht do don tsloighedh
hisin atbert Congal innso:

Celeabhair damh, a Liffe, as lor rodo bo hit gnáis,
Alainn berrthán fil fort, ba slán co tfolt a Dún Náis.
Ba Magh Liffe madh co sé, indiu as magh fonaithe,
Ticubsa dia athfuine, aitherrach co naithniu.

Cath Lethairbhe ria cConghal, mac Ferghosa Fánatt, for Chenél
nEocchain, dú in ro marbhadh Maoldúin, mac Maoilifithricch, tigherna
Cheneoil nEoghain.

Aois Criost, seacht ccéd asé. An cúicceadh bliadhain do Congal.
Cucuaráin, rí Cruithne agus Uladh, do mharbhadh la Fionnchoin
hUa Ronáin. Fiachra, mac Dungaile, do ghuin la Cruithniu.

Aois Criost, seacht ccéd a seacht. An seiseadh bliadhain do Congal.
Maoldobharchon, epscop Cille dara, décc 19 Februari. Cath Dola
i Maigh Ele, airm in ro marbhadh Leathlobhar, mac Eathach, Cualaidh, agus
Cúdionaiscc. Cath Selgge hi Forthuathaibh Laighen, in ro marbhadh dá
mac Ceallaigh Cualann, Fiachra, agus Fianamhail, agus araill do
Brethnuibh tangatar hi socraide Ceallaigh.

Aois Criost, seacht ccéd, a hocht. Conamhail mac Failbhe, abb Iae,
(décc). Colmán, mac Seachnusaigh, abb Lothra, décc. Iar mbeith secht
mbliadhna hi righe nEreann do Congal Cinnmaghair, mac Fergusa Fanat,
ro tathaimh do bhedhg aonuaire. Cill dara do losccadh.

Aois Criost, seacht ccéd anaoi. An céid bhliadhain dFerghal mac
Maoiledúin, mac Maoilefithrigh, hi righe uas Erinn. Cendfaoladh, abb
Fobhair, décc. Diccolan egnaidhe (décc). Tethghal, epscop ó
Lainn Ela, décc 16 April.

Ultan, mac Cummine, décc. Epscop Telcha Olaind (décc). Cath Slebhe
Fuait ria fFearghal for Uibh Méith, in ro marbhadh Tnuthach, mac
Mochloingi, toisech Ua Méith, agus Curoi, mac Aodha, mic
Dluthaigh.

Aois Criost, seacht ccéd a deich. An dara bliadhain dFerghal.
Coeddi, epscop Iae, décc. Dubhgualai, abb Glinne dá Locha, décc.
Ro feradh iomairecc etir sliocht Aodha Slaine, in ro marbhad Niall, mac
Cernaigh, la Flann, mac Aodha, mic Dluthaigh. Cucerca, toisech
Osraighe, décc. Imaireacc la Laighnibh Deasgabhair, du in ro marbhadh
Bran Ua Maoildúin agus a mhac. Dluthach, mac Fithcheallaigh, do
losccadh. Cath Chairn Feradhaigh las an Des tuaisgertoigh, in ro
marbhadh Cormac, mac Fingin, rí Mumhan.

Aois Criost seacht ccéd a haon ndécc. An treas bhliadhain dFerghal.
Baotan, epscop Insi bo Finne, décc. Failbhe Becc, abb Cluana mic
Nóis, décc. Do Gailengaibh Corainn dó. Cormac, mac Oiliolla, rí
Mumhan, do mharbhadh hi ccath. Seachnusach, toisech Ua Maine, (décc).
Cucearca, tigherna Osraighe, décc.

Aois Criost, seacht ccéd ado décc. An ceathramhadh bliadhain
dFerghal. Iomairecc ettir dá mhac Beicc Boirche agus clann
Breasail, toisecha Ua nEthach Uladh, agus ro meabhaidh for cloinn
Breasail. Fogartach Ua Cernoigh dionnarbadh i mBreathnaibh la
Ferghal ri Ereann.

Aois Criost, seacht ccéd a trí décc. A cúicc dFearghal. S. Dorbaine
Foda, abb Iae, décc 28 dOctober. Mochonna Cluana airdne
décc 30 do September. Cillene, epscop abb Ferna, décc.
Flaithnia eccnaidh, mac Colccan, décc. Ceallach Cualann, mac
Gerrtidhe, rí Laighen, décc. Murchadh, mac Diarmata, mic Airmedhaigh
Caoich, flaith Ua Nell Chloinne Colmáin, do mharbhadh la Conall
Grant Ua Cernoich. Aodh Dubh, toisech Ua Fidhgeinti, décc.

Aois Criost, seacht ccéd a cethair décc. An seiseadh bliadhain
dFerghal. Celetighernaigh, abb Cluana Heouis, décc. Ternocc, mac
Ciarain, décc. Fland Foirbhthe, mac Fogartaigh, décc. Fogartach
Ua Cernaigh do thoidheacht dia ionnarbadh a Bretain. Faolchu, mac
Dorbbene, do oirdneadh i nabdaine Iae an cethramhadh Kalaind do September,
dia Sathuirn do shonnradh, isin ceathramhadh bliadhain seachtmoghat a aoisi.

Aois Criost, seacht ccéd a cúicc décc. An seachtmhadh bliadhain
dFerghal. Aonach Taillten do dhenamh la Ferghal, mac Maoiledúin,
agus Fogartach Ua Cernoigh do mheasccbhuaidhreadh an aonaigh, uair ro
mharbh Maolrubha, agus mac Duibhslébhe.

Aois Criost, seacht ccéd asé décc. An tochtmhadh bliadhain dFeargal.
S. Dunchadh, mac Cinnfhaolaidh, abb Iae Colaim Cille, décc an 25
Maii. Cronán Ua Eoain, abb Lis móir Mochuda, décc 1 Iún.
Dubhdúin Ua Faoláin, epscop agus abb Cluana hEraird, décc. Becc
Boirche décc. Fionamhail Ua Boghaine, mac Finn, (décc). Cath Cenannso
ria cConall nGrant Ua Cernaigh, in ro marbhadh Tuathal Ua Faolchon,
agus Gormghal, mac Aodha, mic Dluthaigh, agus Amhalgaidh Ua Conaing, agus
Ferghal a bhrathair. Ro marbhadh dna Conall Grant feisin iar ndibh
míosaibh las in righ, la Fearghal. Trí frosa inggnathacha isin
bhliadhainsi, fros airccid for Othain móir, fros mealae for Othain
mBicc, agus fross fola hi Laighnibh.

Aois Criost, seacht ccéd a seacht décc. An naomhadh bliadhain
dFearghal. S. Cuanna ó Ros eo décc an 10 April. Drostan
Dairtighe décc i nArd Breccain. Iomaireacc Fionnabhrach la
Laighnibh, in ro marbhadh Aodh, mac Ceallaigh. Airmedhach, mac
Taidhg, agus Criochan, toisech Ua Mic Uais, do mharbhadh. Fasughadh
Laighen fo cúicc i naoin bhliadhain la hUibh Néill.
Cath etir Chonnachtaibh agus Corca Baiscinn, inar marbhadh mac
Talamhnaigh.

Fasucchadh Maighe Bregh la Cathal, mac Fionnguine, agus la Murchadh,
mac Brain. Indredh Laighen, agus naidhm na Boromha dorídhisi, agus na
giallna la Ferghal.

Aois Criost, seacht ccéd a hocht décc. Iar mbeith deich mbliadhna hi righe
uas Erinn dFerghal, mac Maoiledúin, mic Maoilefithrigh, do rochair hi
ccath Almhaine la Dunchadh, mac Murchadha, agus la hAodh mac
Colgan, damhna righ. Atiad líon tangatar síol cCuinn don chath sin .i.
mile ar fichet. Atiad líon tangatar Laighin, don leith ele, naoi mile. As
do bhas Ferghail do raidheadh,

Dunchadh mac Murchadha muaidh, Aodh mac Colgan claidhemh ruaidh,
Marbhsat Fergal feidhm ngaile, hi ccath erlamh Almhaine.

Atiad annso na hairigh agus na toisigh torcratar isin cath ishin, maraen la
Fergal, do Leth Cuinn, Conall Menn, toisech Ceneoil Coirpre,
Forbasach, toiseach Cheneoil mBoghaine, Ferghal Ua Aithechdae,
Ferghal, mac Eachdach Lemhna, toisech Tamhnaigh, Condalach, mac Conaing
agus Eccnech mac Colgan, toisech na nAirther, Coibhdenach, mac Fiachrach,
Muirghius, mac Conaill, Leathaitheach, mac Concarat, Anmchaidh, mac
Concharat, Aedhgen hUa Mathghamhnae, Nuadha mac Eirc, toisech Guill
agus Irghuill, agus dechnebhar do hSíol Mailefithrigh. Battar
iadsidhe easbhadha airech agus toisech an tuaisceirt. Tesbhadha Ua Néill
an deisceirt, Flann, mac Raghallaigh, Aileall, mac Feradhaigh,
Suibhne mac Conghalaigh, Aodh Laighean Ua Cearnaigh, Nia mac Corbmaic,
Dubhdacrioch, mac Duibhdainbhear, Ailill mac Conaill Graint,
Flaitheamhail, mac Dluthaigh, Ferghus Ua hEoghain. Torcratar din trí
fichit ar céd damhsaibh Fergail amaille ris na saorchlandaibh sin, cenmo
tád

sochaidhe oile. Naonbhar tra issedh lotar hi faindeal agus i ngealtacht as
in cath sin. Secht mile isseadh torcair idiu agus anall ettorrae.
(Inrachtach, mac Donnchadha Muirisce, righ Connacht do mharbhadh san
gcoinbhliocht sin Almhuine madh fíor).

Aois Criost, seacht ccéd anaoi décc. Fogartach, mac Néill, mic
Cernaigh Sotail, hi righe nEreann an bhliadhainsi, co ttorchair hi
ccath Delgean la Cionaeth, mac Iorgalaigh. S. Sionach Innsi
Clothrann décc an fichetmhadh lá do mí April. Aelchu Mainistrech
Buitti (décc). Indrechtach, mac Muireadhaigh, rí Connacht, décc.
Cluain mic Nois do losccadh. Sealbhach, tigherna Dal-Riada, do dhol
i cclercecht.

Aois Criost, seacht ccéd fiche. An céd bhliadhain do Chionaoth, mac
Iorgalaigh, mic Conaing Cuirri, hi righe Ereann. S. Faolchu, mac Dorbbe,
abb Iae, S. Cuindles, abb Cluana mic Nois, agus S. Sionach Tailten,
décc. Cath Cinn Delgen ria cCionaoth, mac nIorgalaigh, in ro marbhadh
Foghartach Ua Cernaigh. S. Caochscuile, scribhneóir Doire Chalggaigh,
dég. S. Cillene Ua Colla, abb Aithne, décc 3 Ianuari. S. Colman
Uamach, scribhneóir Arda Macha, agus S. Colman Banban, scribhneoir
Cille dara, décc. S. Ruibin, mac mic Connaid, sccribhneoir Mumhan,
mac sidhe Brocain ó Tigh Telle. Teched (.i. sealbhuthadh) Uladh ria
cCionaedh mac Congalaigh.

Aois Criost, seacht ccéd fiche a haon. An dara bliadhain do Chionaoth.

S. Maolrubha, abb Bennchair, iar ndul ind Albain, décc ina chill
féisin, i nApurcrosan, an 21 April. Ochtmoghat bliadhain ar thrí míosaibh
for naoibh láithibh, fod a shaoghail. S. Celecriost décc. S. Conall,
mac Moudain, do ghlacadh coroine mairtire. Ferdachrioch, mac Congalaigh,
décc. Cuanan o Chill Delcce, Deirir Daimhinsi, dUibh Colla
dosidhe, Cuana Droma Cuilinn, agus Cillene Locha Gercc, décc. Cath
Droma fornocht ria fFlaithbhertach, mac Loingsigh, agus ria cCenel
cConaill, for Aodh nAllán, mac Ferghaile, agus for Cenel nEoghain.
Ro sraoinedh for Aodh nAllán. Atiad na maithe ro marbhadh ó Aodh, -
Flann mac Erthaile, agus Snedgus Dercc Ua Brachaidhe. Murchadh, mac
Brain, rí Laighen, décc. Criomhthann, mac Ceallaigh Cualann, do
mharbhadh i ccath Belaigh Licce. Ailill, mac Bodhbhcadha Midhe, décc.
Cath ria cCionaoth, mac Iorghalaigh, for Laighnibh, agus do bert a réir.
Cath Insi Bregain ria fFaolan, bail in ro marbhadh Eittirsgeól, mac
Ceallaigh Cualann, agus Congal, mac Brain. Cathal Cerr, toisech
descert Bregh, décc.

Aois Criost, seacht ccéd fiche a dó. S. Fland ó Aointreb, abb
Bendchuir, décc. Iar mbeith trí bliadhna dó Cionaedh, mac
Iorgalaigh, uas Erinn hi righe, torchair hi ccath Droma Corcáin, la
Flaithbhertach mac Loingsich.

Torchair Eudos, mac Ailella, agus Maolduin, mac Feradhaigh, isin cath
sin la Dunchadh, mac Corbmaic. Cath Aillinne etir da mac Murchadha,
mic Brain, in ro marbhadh Dunchadh senoir. Domhnall, mac Ceallaigh ri
Connacht, (dég).

Aois Criost, seacht ccéd fiche a trí. An céd bhliadhain do
Flaithbhertach, mac Loingsich, mic Aongusa, uas Erinn hi righe.
S. Gall Lilcaigh décc. S. Fachtna, mac Folachtain, abb Cluana ferta
Brénainn, décc.

Aois Criost, seacht ccéd fiche a cethair. An dara bliadhain do
Flaithbhertach. Mac Onchon, sccribhneoir Cille dara. Mac Concumba,
sccribhneoir Cluana muc Nóis, Cochall odhar, scribhnidh Bennchuir,
dég.

Aois Criost, seacht ccéd fiche a cúig. An treas bhliadhain do
Flaithbhertach. S. Dochonna Craibhdheach, epscop Condere, décc an
15 Maii. S. Cillene Foda ab Ia, décc. S. Adamnan, epscop Ratha
Maighe hAonaigh. S. Mainchin Lethghlinne décc. S. Faeldobhar Becc,
eccnaidh Fobhair, décc. Cúl rathain do losccadh. Cath eidir
Cruithniu agus Dal Riada, i Murbhulg, in ro marbhadh drong mhór do
Chruithniu. S. Colmán Ua Liottáin, doctúir toghaidhe, décc. S.
Eochaidh, mac Colgan, ancoiri Ardamacha, S. Colman Tealcha Ualand,
agus Breac Bearbha, décc. Coblaith, inghen Ceallaigh Cualann, décc.

Aois Criost, seacht, ccéd fiche asé. An cethramhadh bliadhain do
Flaithbhertach. Aolchú, abb Cluana hIoraird, Flann Sionna Ua Colla,
abb Cluana mic Nois (décc), do Uibh Cremhthaind dó. Garalt Maighe
heo décc an 13 do Marta. Sebhdann, inghen Cuirc, banab Cille dara,
décc. Timnen Cille Garadh,

Neachtan, mac Derili (décc), Guin Doedhgasa, mac Baith, toisech na
nDéisi. Muiredhach, mac Indreachtaigh, do mharbhadh, epscop Maighe eú
esidhe.

Iomairecc etir Laighniu Desgabhair agus Muimhnecha, agus ro meabhaidh ria
nAodh, mac Colgan. Ferdomhnach, sgribhneoir Arda Macha, Fergus, mac
Conaill Oircnigh, décc. Congalach Cnúcha décc. Ceallach, inghen
Dunchadha, do Uibh Liatháin, décc.

Aois Criost, seacht cced fiche a seacht. An cúicceadh bliadhain do
Flaithbhertach. Iomairecc etir Aodh, mac Fergaile, agus Cenel
cConaill, i Maigh Iotha, bail in ro marbhadh Conaing, mac Congaile, mic
Fergusa, agus sochaidhe ele do Cenel Eoghain. Eochaidh, mac
Eathach, toisech Dail Riata, décc. Conall, mac Conchubhair, décc.
S. Dochumma Bolggan, ancoire Arda Macha, décc. Aodh, mac Conaing,
toisech Iorluachra, do mharbhadh. Atces bó i nDeilginis Cualann,
aoinchend agus aon chorp le go a slindenaibh, dá chorp ó a slindenaibh

siar, agus dá erball. Bátar sé cosa fuirre, no blightí fo thrí hí gach
laoi, agus ba moa ar gach nuair a hass. Ro toimhleadh la daoinibh iomdha a
has, agus ní don im do ronadh de.

Aois Criost, seacht ccéd fiche a hocht. An seiseadh bliadhain do
Flaithbhertach. Iomairecc hi Maigh Iotha etir cloinn Loingsich, mic
Aongusa, agus cloind Ferghaili, mic Maoiledúin, du in ro marbhadh
sochaidhe do Cenel Eoghain. Flaithbhertach do thochuiredh murchobhlaigh
do Dail Riata do chum nEreann, agus iar na ttorachtain, ní ro airisetar
co rangatar Inis hOinae, agus ro feradh cath eitir Flaithbhertach co na
amhsaibh, agus Ciannachta, agus araill dUltoibh agus do Chenel
Eoghain, agus ro múdhaigheadh drong dirimhe dUltoibh, do Chenel
Eoghain, agus do Chiannachtaibh ann, im Conchubhar, mac Loichene, agus
im Branchoin, mac Brain, agus ro baidheadh líon dírímhe dibh isin
mBanda, iar sraoineadh forra.

Aois Criost, secht ccéd fiche anaoi. Iar mbeith secht mbliadhna do
Flaitbertach, mac Loingsicch, mic Aongusa, i righe nEreann, atbail ind
Ardmacha iaramh, iar ttréccadh a righe ar chléirceacht. Suibhne, mac
Cronnmaoil, mic Ronain, epscop Arda Macha, do écc, 21 Iuni. Do Uibh
Nialláin dó.

Aois Criost, secht ccéd triocha. An céid bhliadhain dAodh Allan, mac
Ferghaile, mic Maoiledúin, os Erinn. S. Mobrioccu Bealaigh Fele,
décc. S. Flann, mac Conaing, abb Cille móire Diothraibh, do marbhadh.
S. Oeghetchair,

epscop nAondroma, décc. Cath Bealaigh Ele etir Cathal, mac
Finnguine, rí Mumhan, agus Laighniu, airm in ro marbhadh sochaidhe do
Laighnibh. Do rochair do Muimhneachaibh ann, Ceallach, mac Faelchair,
toisech Osraighe, agus dá mac Corbmaic, mic Rosa, toisich na nDéisi,
co tribh mílibh amaille friú. Cathal, mac Muireadhaigh, rí Connacht,
décc. Airechtach Ua Dunchadha Muirsce, toisech Ua Fiachrach, décc.

Aois Criost, seacht ccéd triocha a haon. An dara bliadhain dAodh Allan.
Fianamhail, mac Gertidhe, abb Cluana Ioraird, décc. Crunnmaol, mac
Colgan, abb Lusca, agus Dainel, mac Colmain, abb Aird Brecáin, décc.
Colman, mac Murchon, abb Maighe Bile, décc. Maolfothartaigh, mac
Maoiletuile, do Laighnibh, agus Bodhbhchadh, mac Conaill Gabhra, toisech
Cairpre, décc.

Aois Criost, secht ccéd triocha a dó. An treas bhliadhain dAodh Allan.
Ronán, abb Cinn Garadh, Conamhail Ua Loichene, abb Cluana muc
Nóis, do Ciannachtaibh Breagh, agus Graiphnidh, abb Imleacha Fia,
décc. Failbhe, mac Guaire, comharba Maoilerubha, do bháthadh go
bfoirinn a luinge amaille fris. Dias ar fichit allíon. Fiangalach, mac
Murchadha, toisech Ua Mail, (décc). Scainner etir Shiol Aodha
Sláine, in ro marbhadh Cathal, mac Aodha, don taobh thoir do Lícc
Ailbhe, la Conaing, mac Amhalgadha. Muirghes, mac Fergusa

Forcraidh, do mharbhadh. Aengus, mac Ailealla, tigherna
Airde Ciannachta, décc.

Cath Focharta i Maigh Muirthemhne ria nAodh Allán, agus ria
cclandaibh Néll an tuaisceirt for Ultaibh, in ro marbhadh Aodh Róin, rí
Uladh, agus ro benadh a chend de for Cloich an chommaigh i ndoras
teampaill Focháirde, agus ro marbhadh Conchadh, mac Cuanach, toisech
Cobha, go sochuidhibh oile amaille riú. Ba he fochann an chatha Cill
Cunda do shárucchadh la Ua Segáin, do muintir Aodha Róin, dia nebairt
Aodh Ron feisin, ní scarfam a conn fris an Tairr, uair taobh re taobh ata
ceall Cunna agus Ceall Tairre. Congas, comarba Patraicc, do righne
an rann so do ghréasacht Aodha Alláin a ndioghail sháraighthe na cille,
ar rob éisiumh anmchara Aodha, co nerbairt,

Abair re hAodh Allán nuar, dom riacht forrán la sluagh siuil,
Rom nelacht Aedh Róin arraír, im Chonna Cill an chaín chiúil.

Tionóilidh Aodh Allán a shlogha go Fochaird, conadh ann atbert
Aodh Allán occ imthriall in catha:

Im Chunna, im chill manamcaratt, cingiu aniú céim ar conair,
Fáicfidh Aodh Roin a cend lim, no fuicfettsa lasodhain.

As don cath cedna at rubhradh:

Ar nUladh im Aodh Róine la hAodh Allán rí Ere,
Ar coinnimh do Chill Chonna cuirsiom bonna fri médhe.

Aois Criost, seacht ccéd triocha a trí. An cethramhadh bliadain dAodh.
S. Tola, mac Dunchadha, epscop Cluana Iraird, milidh diongmhala do
Criost, dég. Bresal, mac Aodha Róin, ri Uladh, do mharbhadh acc
Dun Celtchair.

Aodh Ollan, rí Ereann, do thionól Leithe Chuinn, do dhul i
Laighnibh go ráinic Ath Senaith. Ro tharcclaimset Laighin in líon
conrangatar do chosnamh a chirt fris. Ro feradh cath ainmhín ettorra isin
maighin sin. Do deachaidh in ri Aodh Allan feisin isin ccath go
nairechaibh an tuaisceirt a mailli fris. Tangatar toisigh Laighen imo
rioghaibh isin ccath, corba fuilech foirniata ra feradh an gleo sin ettorra
dibhlinibh. Ro machtait laoich, agus ro tamhnait colla leó. Imo comhrainic
dAodh Ollan agus dAodh mac Colgan, do righ Laighen, agus torchair
Aodh, mac Colgan la hAodh Ollán. Ro marbhadh agus ro mudhaiccheadh, ro
díothaiccheadh, agus ro díothláiccheadh Laighin co hanbfhoill isin
chaithgleo sin, coná terna ass dibh achtmadh tiruairsi mbicc, agus
scceolanga terca. Batar iadso na toisigh, agus na hairigh torcratar ó
Laighnibh .i. Aodh mac Colgan, rí Ua cCeinnselaigh, Bran Becc mac
Murchadha, an dara righ boi for Laighnibh, Fergus mac Maenaigh, agus
Dubhdachrioch dá tigherna Fothart, mac hUi Cellaigh, mac Trein,
Fiangalach Ua Maileaithgen, Conall Ua Aithechdai, ceithre meic Floinn Uí
Conghaile, Eladhach Ua Maoluidhir, agus sochaidhe oile ro budh emhilt
daisneis.

Batar failigh Leth Chuinn iars an ccosccar sin, uair ro díoghailsiot a
nainninne, agus a naincridhe for Laighnibh. Naoi mile asedh torchair dibh,
amhail asberar:

O cath Uchbhadh co naine, imbidh truchlam Fer Féine,
Ní dóigh fo gréin gil gainmhigh siol nach Laignigh in hEre.
Naoi mile do rocratar, i ccath Uchbhadh co ndéne,
Do shlogh Gailian gér guinich, mór do múiribh Fer Féne.

Aodh Allán cecinit,

An tAodh isin úir, an rí isin ruaimh,
An tenán don deladh in ténán dil déin, Lib. Lec. fol. 311, la
Ciarán i cCluain.

Samhthann cecinit rias an cath,

Ma conrisat na dá Aodh, bidh mórsaeth a nerghaire,
Madh co dul damhsa as saeth Aodh la hAodh mac Ferghaile.

Faolan, mac Brain, rí Laighen, décc iar ndeighbhethaidh. Cearnach,
mac Foghartaigh, mic Néll, mic Cernaigh Shotail, mic Diarmatta, mic Aodha
Slaine, do marbhadh. Fergus mac Cremhthainn do mharbhadh. Slóigheadh la
Cathal, mac Finnguine, co Laighniu, co rug gialla ó Bran Bricc mac
Murchadha, co rug maíne móra.

Aois Criost, seacht ccéd triocha acethair. An cúicceadh bliadhain
dAodh.
S. Samhthann ogh, ó Cluain Brónaigh i tTebhtha, décc an 19 do
December.
As fuirri tug Aodh Allan an teist si,

Samthann fri soilsi sainmand, modh roghabh geansa glunbarr,
Tuadh maigh midhe, miadh nimglann, mor saeth fo sine Samhtann.
Ro gabh an ní nad asa, aini frí righe slesa;
Da mhair frí terca tuarai, batar cruadha a cressa.
Aradh fri nimhe nithiu, glan a cridhiu fri baetha,
Inucht fiadhat frí glanbarr, ar ro la Samhthann saetha.

Flann, mac Ceallaigh, mic Crundmaoil, epscop Reachrainne, décc. Cuana
Ua Bessain, scribhneoir Treoit décc. Fergus Glutt toisech Cobha
décc. Atces dosidhe aes ulc agus aidhmhillti ag tealgad graintseligh in
ro laitis iopadha ina aighidh fair, conadh é fochann a bhais. Ailill, mac
Tuathail, tigherna Ua cCriomhthainn, décc.

Aois Criost, seacht ccéd triocha a cúicc. An seiseadh bliadhain dAodh.
S. Bran, Lainde hEala, décc. Maincheine Tuama Gréine, décc.
Fland Feabhla, abb Goirt conaigh, i Mughdhornaibh Muighen, décc.
Ceallach, mac Sechdi, do Chonmaicnibh, abb Cluana muc Nóis, décc.
Dubhdabhoirend, abb Fobhair, décc. Forbasach, mac Ailealla, tigherna
Osruighe, do mharbhadh.

Aois Criost, seacht ccéd triocha asé. An seachtmhadh bliadhain dAodh.
Condla, tigherna Teabhtha, décc. Amhalgaidh, mac Cathasaigh, toisech
Conaille, décc. Murchadh, mac Fearghaile, mic Mailedúin, do
mharbhadh. Cath Cairn

Feradhaigh, in ro marbhadh Torcan Tineréidh. Fuireachtach, airchindeach
Insi Caoil, agus Flann Aighle, epscop Echdhroma, décc.

Aois Criost, seacht ccéd triocha a seacht. An tochtmhadh bliadhain dAodh.
Airechtach, mac Cuanach, abb Ferna, décc. Maolochtraicch, abb
Cille Foirbrigh, décc. Ferdacrioch ab Imlecha agus Leithghlinne,
décc. Dachua, mac Indaighe, angcoire, décc, agus Cuidgheal, ab agus
scribhnidh Lughmhaidh, décc. Foirtbhe Ceneoil Fiachach, agus Dealbhna
la hOsraighibh. Cathal mac Findguine, rí Mumhan, décc. Fland
Feorna, tigherna Corco Modhruadh, décc. Aodh Balbh, mac Indreachtaidh,
rí Connacht, décc. Artrach, mac Aitheachda, tigherna Ua Méith dég.

Aois Criost, seacht ccéd triocha a hocht. Affiath, abb Maighe Bile,
décc. Affrica, banabb Cille dara, décc. Cuimmeni Ua Ciarain, abb
Rechrainne, decc. Aodh Allan, mac Ferghaile, mic Maoiledúin, do
thuitim i ccath Maighe Seirigh, .i. Cenandus, eidir dí Teabhtha, la
Domhnall, mac Murchadha, iar mbeith naoi mbliadhna i righe Ereann.
Tiughrann Aodha Alláin,

Dia nom ainsiodh mo Dia dil, for bhru Locha Sailchedáin,
Iaramh dia mbeinnsi fri col, ro badh maoin do mhogh manacol.

Torchair bheos isin cath cédna Cumasccach, mac Conchubhair, tigherna na
nAirther, agus Maonach mac Condalaigh, tigherna Ua gCremhthainn, agus
Muireadhach, mac Fergusa Forcraidh, tigherna Ua Tuirtre. Cath
Daimhdeircc i mBreghaibh ria nIndreachtach hUa Conaing, in ro
marbhadh Dungal, mac Floinn, tigherna, Fer cCúl, agus Fergus mac Oistigh
go sochaidhibh oile. Ceallach, mac Raghallaigh,

rí Connacht, décc. Dluthach, mac Fithcheallaigh, tigherna
Ua Maine, décc. Dubhdothrae, tigherna Ua mBriúin Cualann, do
ghuin. Coincheann, inghen Ceallaigh Cualann, décc.

Aois Criost, seacht ccéd triocha anaoi. An céd bhliadhain do Domhnall,
mac Murchadha, mic Diarmata os Erinn; cédna righ Clainne Colmáin
sunn. Colmán, epscop Laessain, décc. Laidhgnen, mac Doineannaigh,
abb Saighre, Fergus, mac Colmain Cutlaigh, eccnaidh oirrdherc, décc.
Reachtabhrat, mac Ferghaile do Connachtaibh, décc. Iomaireacc Ailiuin dá
bernach, in ro marbhadh Dubhdados, mac Murgaile agus dá Ua Ceallaigh
Cualand, Cathal agus Oilill. Ro chuir in mhuir míol mór i ttír i
ccoicceadh Uladh, i mBoirche do shunnradh. Do deachaidh gach aon baoi
'na fochraibh dia dechsain ar a inggnaithe. An tan ro bas acca cosccradh
fo frith trí fiacla óir ina chend, caocca unga in gach fiacoil dibhsidhe.
Ro chuir Fiachna, mac Aodha Roin, rí Uladh, agus Eochaidh mac
Bresail, flaith Ua nEathach, fiacail díbh go Bennchair, go raibhe fri
ré cian for altóir mBennchoir, gur bo foirréil do cach hi ccoitchinne hí.

Aois Criost, seacht ccéd cethrachat. An dara bliadhain do Domhnall.
Forandan, abb Cluana hEraird, décc. Cummene hUa Maonaigh, abb
Lainde Léire, dég. Congus, ancoire Cluana Tibhrinne, décc.
Ceandfaoladh, comarba Droma Cuilinn, décc.

Aois Criost, seacht ccéd cethrachat a haon. An treas bhliadhain do
Domhnall.
Corbmac, epscop Atha Truim, décc. Dubdabhoirend Ua Beccáin, abb
Cluana hEoais, Aongus, mac Tiobraitte, abb Cluana Fotta Baottain Abha,
Cialtrocc, abb Glaisi Naoidhe, Beochaill Ardachaidh, Fiongal Lis
móir, Maolanfaidh Cille achaidh Dromfotta, Seachnasach, mac Colgáin,
tigherna Ua cCensealaigh, décc. Iomairecc Ratha cúile ria nAnmchaidh,
i ttorcair hUargus, mac Fachtna.

Aois Criost, seacht ccéd ceathrachat a dó. An cethramhadh bliadhain do
Domhnall. S. Cuanan Glinde, abb Maighe bile, décc 3 April.
Abel, abb Imleacha Fia, décc. Sárán, abb Bennchair, dég.
Comman ind Rois, agus ba habb Cluana mic Nois esidhe, ba fer lán do
rath Dé é bheos, agus a écc. Ferdacríoch, abb Dairinsi, décc.
Cucummne, eccnaidh togaidhe eisidhe, do écc. As dó do roine Adamhnan an
rann, dia ghreasacht frí leighionn.

Cucuimne, ro legh shuithe co druimne,
Alleth aile arratha ro lecc ar a chaillecha.

Frisccar Cucuimne:

Cucuimne, ro léigh suithe co druimne,
Alleth aile araid cui, legfaidh huile corop sui.

Tuathalan, abb Cinn Ríghmonaidh, dég. Aidhneach Baisligge, décc.
Iacob Ua Forannáin, proiceptaigh ergna ina aimsir, dég. Ruman, mac
Colmáin, saoi in eccna, i ccroinic, agus i filidhecht, décc. Muiredhach
Mend, toisech Ua Méith, do mharbhadh i cCúil Cummaisg, la hUltaibh.
Aedh Muinderg, mac Flaitbhertaigh, tigherna an Tuaiscceirt, dég.
Seachnusach, mac Colgan, rí Laighen Desgabhair, décc. Iomairecc Cairn
Ailche la Mumhain, in ro marbhadh Coirpre, mac Condionaisg. Iomairecc ria
nAnmchaidh, i ttorcair Coirpre, Fergus, agus Caicher meic
Cumhscraigh, co sé toisechoibh décc imaille friu. Fiachra, mac
Garbhráin Midhe, do bhádhadh i Loch Ríbh. Dunlaing, mac Dunchon,
tigherna Ceneoil Ardghail, décc.

Aois Criost, seacht ccéd cethrachat a trí. An cuicceadh bliadhain do
Domhnall. Arasccach abb Muicinsi Reguil, do bhadadh. Dodimmóc,
ancoiri,

abb Cluana hIraird, agus Cille dara, décc. Cobhthach, abb
Reachrainne, dég. Cuan Camm egnaidh, dég. Cuan
angcoire ó Liolcaich, dég. Muirend, inghen Ceallaigh Cualann, ben
Iorgalaigh, décc. Congal, mac Eignich, tigherna na nAirrther, do
mharbhadh i Raith Esclair la Donn boo, mac Conbretan. Inreachtach Ua
Conaing, toiseach Cianachta, décc. Atces co forréil loingius isin aer
cona bfoirnibh isin mbliadhainsi.

Aois Criost, seacht ccéd cethrachat a cethair. An seiseadh bliadhain do
Domhnall. Breasal, mac Colgan, abb Ferna, décc. Liber, abb Maighe
bile, décc. Conall, abb Tuama Greine, dég. Seigeine Claraich
décc. Mac Cuanach, eccnaidh do Cenel Coirpre, decc. Cluain ferta
Brenainn do losccadh. Anfadh mór do theacht isin mbliadhainsi, co ro
báitheadh drong mór do mhuintir Iae Colaim Cille. Condmach, mac
nOendenoigh, décc. Iomairecc Airde Cianachta la Dungal, mac Amalgadha,
in ro marbhadh Aillill, mac Duibhdacrioch hI Chindfaolaidh, agus in ro
marbhadh Domhnall, mac Cionaodo, hi friothghuin iar mbuadhughadh dó an
céid fecht. Coirpre, mac Murchadha Midhigh, décc, agus Becc Baele,
mac Eathach.

Aois Criost, secht ccéd cethrachat a cúig. An sechtmhadh bliadhain do
Domhnall. S. Suairleach, epscop Fobhair, décc 21 Marti.
Dubhdáleithe na Graiffne, abb Cille Scíre, décc. Mac Neamhnaill, abb
Biorrae, décc. Comorbach, mac Cellain, ab Cille móir Inir, dég.
Fobhor agus Domhnach Padraicc do losccadh. Cathal Maenmaighe, tigherna
Ua Maine, décc. Blathmhac, mac Coibhdenaigh, tigherna Musccraidhe,
décc. Dubhdabhoirend, tigherna Ua Fidhgeinte, décc. Anmchaidh,
toisech Ua Liathain, dég. Iomaireacc Inse Snaicc ria nAnmchaidh, mac
Concerca. Cudionaisc Ua Ferghusa dUibh Fiachrach, décc. Fiachra,
mac Ailene, tigherna Mughdorn, do mharbhadh. Eogon mac Tripoit,
abb, décc.

Aois Criost, secht ccéd cethrachat asé. An tochtmhadh do Domhnall.
Maoliomarchair, epscop Eachdhroma, décc. Cuangus, abb Léith móir,
décc.
Colman na mBretan, mac Faoláin, abb Slaine, décc. Nuadha, mac
Duibhslebhe, abb Cluana hEois, dég.
Flann Ua Conghaile, toiseach Ua Foilghe, décc.
Fearghus, mac Fogartaigh, tighearna Deisceirt Breagh, décc.
Muirghius, mac Fearghusa, tighearna na nDeisi, agus Flann Foirtre,
toiseach Corco Laigde, décc.
Fursa, abb Leacnae Midhe, décc. Losglaigde eaccnaidh dég.
Eochaidh Cilli Toma, Cele Dulaisi ó Daimhinis décc. Mac hUige
Lis móir décc.
Losccadh leth airle Cluanah Ioraird. Bran, mac Baitbeitre, décc.
S. Comán .i. naomh Rossa Comain, agus is uadh ainmnigh thear
Ros Chomáin deesse san bhliadhain sin, no san bliadhain inár ndiaigh

agus sgribhthar air go raibh sé dá chéd bliadhain daois. Atá imreasan edir
na hannalaibh cia acu bliadhain inar ég sé, etc.

Aois Criost, seacht ccéd cethrachat a seacht. An nomhadh bliadhain do
Domhnall. S. Cileni Droigthech, abb Iae, agus angcoire, décc 3
Iulii. Cathal, mac Forannain, abb Cille dara, dég. Dicolla, mac
Meinide, abb Insi Muiredhaigh, décc. Fiachna Ua Maicniadh, abb Cluana
ferta Brenainn, Osbran, angcoire, agus epscop Cluana cremha,
Reachtabhrat Ua Guaire, abb Tuama Gréne, Maoltuile, abb Tíre dá glas,
décc. Flaithbhertach, mac Conaill Minn, toisech Cenel Cairbre, décc.
Innreachtach, mac Muireadhoigh Minn, dég. Foidmend, mac Fallaigh,
toisech Conaille Murtheimhne, Conaing Ua Duibhdúin, tigherna Cairpre
Teabhtha, dég. Flann, mac Ceallaigh, tigherna Muscraighe, décc.

Aois Criost, seacht ccéd cethrachat a hocht. An deachmhadh bliadhain do
Domhnall. S. Maccoicceth, abb Lis móir, dég 3 December.
S. Luicridh, abb Cluana mic Nóis, dég 29 April. S. Cellan, abb
Cluana ferta Brenainn, décc. Scannlán Duin Lethglaisi, décc.
Mobhai décc. Ferblai, mac Margusa, eaccnaidh, dég. Scannlan Cluana
Boirend décc. Fursa Easa mic nEirc dég. Eas mic nEirc for Búill
Eas Ui Floinn aniú. Tomaltach, mac Maoiletuile do mharbhadh.

Aois Criost, seacht cced cethrachat anaoi. An taonmhadh bliadhain décc do
Domhnall. Cerban Daimhliag décc. Abel Atha Oirne dég.
Loingsioch

mac Flaithbhertoigh, tigherna Ceneoil Conaill, dég. Flann, mac
Conchubhair, tigherna Maighe hAi, décc. Tuaithlaithe, inghen Cathail,
ben righ Laighen décc. Iomairecc Aird Naescan eitir Ua mBriuin agus
Cenel Coirpre, du in ro marbhadh sochaidhe. Foirtbhe Fothart Fea
dOsraighibh. Cathasach .i. rí Uladh, mac Ailealla, do mharbhadh i
Raith Bethech. Conghus scribhnidh, epscop Arda Macha, do écc. Do
Chenel nAinmire dosidhe.

Aois Criost, seacht ccéd caoga. An dara bliadhain décc do Domhnall.
Daolgus, abb Cille Scire, décc. Fiangalach, mac Anmchadha, mic
Maoilecuraich, abb Insi bo finne for Loch Ribh. Sneithcest, abb
nAondroma, décc.
Fidhmaine Ua Suanaigh, angcoire Raithne, décc. Cluain muc Nois
do losccadh 21 do Marta. Cathal mac Diarmatta, eccnaidh, décc.
Flaithniadh, mac Tnuthaigh, tigherna Ua Meith, dég. Inrechtach, mac
Dluthaigh, tigherna Ua Maine, décc. Flaithnia, mac Flainn, mic
Congaile, toisech Ua Failge, décc. Iomairecc Cindebrath, i ttorchair
Badbhgal, mac Fergail. Fiangalach mac Anmchadha, décc.

Aois Criost, seacht ccéd caoga a haon. An treas bhliadhain décc do
Domhnall. Aolgal, angcoire, ó Imlioch Fordeorach, agus o Cluain mic
Nóis, décc. Baethallach, mac Colmáin hUi Suibhne, abb Atha Truim, dég.
Corbmac, mac Faolain hUi Silne, décc. Forannan, epscop Methais Truim,
décc.

Bennchair mór do losccadh lá féle Patraicc. Fergus, mac Ceallaigh, rí
Connacht, décc. Sloigheadh Laighen la Domhnall, mac Murchadha, fri
Niall co mbatar i Muigh Muirthemhne. Loingbhriseadh Dealbhna Nuadhat
for Loch Ríbh, ima ttigherna Diumasach, con do ro ráidheadh:

Tri naoi nethair is a trí, don Gamhanraighe Locha Ríbh,
Ní terna dibh i mbethaidh amháin, acht lucht aenethair.

Cath Bealaigh cro ria gCriomhthann for Dealbhna Ua Maini, in ro
marbhadh Find mac Airbh, tigherna Dealbhna, og Tioprait Finn, agus ár
Delmhna imme, agus as de sin atá Lochan Bealaigh cro, agus Tiopra Find,
uair ag cosnamh an triochait céd etir Suca agus Sionainn batar hUi
Maine friu, ar rob isidhe triocha céd Delbhna. As dosidhe ro raidheadh:

Cath brec buidhnech Bealaigh cró, ba truagh turus Dealbhna dó,
Criomhthann deabhthach díth do ratt, for Dealbhna neimhnech Nuadhat.
Finn mac Airbh, áirdrí Delbhna, ro gonadh do gháibh leabhra,
Don cath cródha ro ba cing, co torchair ic Tiprait Finn.

Aois Criost, seacht ccéd caocca adó. An cethramhadh bliadhain décc do
Domhnall. Sionchu, abb Lis móir décc. Siadhail Linne Duachail
décc. Cill mór Díothraibh do losccadh la hOaibh Crumhthainn.
Cumasccach, tigherna

Ua Failge, do mharbhadh la Maoldúin, mac Aodha Bennáin, rí Mumhan.
Donn, mac Cumasccoigh, toisech Ua mBriuin an deisceirt, dég. Bodbhghal
mac Fergaile, abb Mungairde, do marbhadh. Tomaltach, tigherna
Cianachta Glinne Geimhin, décc.

Aois Criost, seacht ccéd caoccat a trí. An cúigeadh bliadhain décc do
Domhnall. Muiredhach, mac Corbmaic Slaine, abb Lughmhaidh, dég.
Elpin Glaisi Naidhen dég. Fídhbhadhach Cille Delcce décc.
Martha, inghen Dubháin, banabb Cille dara décc. Gorman, comharba
Mochta Lughmhaigh, décc i cCluain mic Nois, ina ailithre, agus ba
heisidhe athair Torbaigh, comharba Padraicc.
Niallgus, mac Boith, tigherna na nDéise Bregh, décc. Cathal Ua
Cionaotha, toiseach Ua cCeinselaigh, décc. Iomaireac Droma robhaich,
fris a raiter cath Brechmhaighe, etir Ui Fiachrach agus Ui Briuin, in
ro marbhadh trí hUi Ceallaigh, .i. trí meic Fergusa, mic Roghallaigh
.i. Cathrannach, Cathmugh, agus Artbran, a nanmanna.

Aois Criost, seacht ccéd caogat a cethair. An seiseadh bliadhain dég do
Domhnall. Eochaidh, mac Conaill Minn, abb Faoibhrain décc.
Dubhdroma, abb Tuilen, décc. Feidhlimidh, no Failbhe, abb Iae, décc,
iar secht mbliadhna ochtmoghat a aeisi. Coissetach, abb Lughmhaidh,
décc. Eochaidh, mac Fiachrach, eccnaidh, dég. Reachtabhrat, mac
Dunchon, tigherna Mughdhorn, décc. Iomairecc Gabhrain ria nAnmchaidh
for Laighnibh. Cath Eamhna Macha ria bFiachna, mac Aedha Róin, for
Uibh Néill, dú in ro marbhadh Dunghal Ua Conaing agus Donnbó.

Aois Criost, seacht ccéd caogat a cúig. An seachtmhadh bliadhain décc do
Domhnall. Condath, abb Lis móir, décc. Suairlioch, abb Bendchair,
décc.
Ailgnio, mac Gnoí, prióir abbaidh Cluana hIraird, décc.
Gaimdibhla, abb Airne, décc. Fulartach, mac Bricc, angcoire decc.
Muireadhach, mac Murchadha, no Ua Brain, ri Laighen, dég.
Conchubhar Ua Taidhg Teimhin, tighearna Cianachta Glinne Geimhin, décc.
Flann, mac Eirc, tigherna Ua Fidhgeinte décc. Eutighern, epscop, do
mharbhadh la sacart oc altóir Brighde, i cCill dara, .i. etir an
crocaingel agus an altoir. As as sin ro fhás co na deni sacart oifrenn i
fiadhnaisi epscoip osin alle a Cill dara.

Aois Criost, seacht ccéd caogat a sé. An tochtmhadh bliadhain décc do
Domhnall. Domhnall, mac Muirchertaigh, tigherna hUa Nell, décc.
Finsneachta, mac Fogartaigh Ui Cernaigh, décc. Iomaireacc Bealaigh
Gabhráin etir Laighniu agus Osraighibh, co roemidh ria mac Concerca,
agus ro marbhadh Donngal, mac Laidhgnein, tigherna Ua cCeinsealaigh, agus
aroile toisigh imaille fris. Iomairecc Atha dumha eitir Ultaibh agus
Ui Eathach, in ro marbhadh Ailill, mac Feidhlimidh, tigherna Ua
nEathach.

Aois Criost, seacht ccéd caogat a seacht. Anaoi décc do Domhnall.
Corbmac, abb Cluana mic Nóis, décc. Do Cenel Coirbre Cruim do.
Robhartach, mac Cuanach, abb Aithne móire; Suibhne, abb Cluana ferta,
Domgnasach, abb Imleach each; Fearfio, mac Faibre, eccnaidh, abb
Comhraire

Midhe, décc. Iomairecc Caille Taidhbig, in ro meabhaidh for Luighni
ria cCenel Coirpre. Fogartach, mac Eathach, tigherna hEle,
Celepedair, abb Arda Macha, do écc. Do Uíbh bresail dó.

Aois Criost, seacht ccéd caoccat a hocht. Beclaitnae, abb Cluana
Ioraird, dég. Fiodhairle Ua Suanaigh, abb Raithne, décc céd lá
dOctober. Reoddaidhe, abb Ferna, décc. Anfadan, abb Linde
Duachail, décc. Faolchu Fionnghlaisi décc. Iar mbeith fiche
bliadhain i ríghe ós Erinn do Domhnall, mac Murchadha, mic Diarmatta,
fuair bás, agus ba héisidhe céid rí Ereann ó Cloinn Colmáin, agus ro
hadhnaiceadh i nDermhaigh co nonóir, agus co nairmhidin. As dó ro
ráidheadh:

Cossin uair ro nucadh de, Domhnall dochum nDearmaighe,
Nocha rabha díoghal greis na treis for lár Breghmhaighe.

Aois Criost, seacht ccéd caogat anaoi. An céid bhliadhain do Niall
Frosach, mac Feargaile, uas Erinn hi righe. Fiachra, mac Fothaidh,
abb Baislicce, décc. Ronan, abb Cluana mic Nóis, décc. Do
Luighnibh do. Corbmac, mac Aililla, abb Mainistreach Buithe, dég.
Donait, mac Tohence, abb Corcaighe, décc. Fergus, mac Ceallaigh, rí
Connacht décc. Scanlan Feimhin, mac Aedhgaile, décc. Flann Garadh,
tigherna Cenél mic Earca, dég. Iomaireacc Duin bile ria nDonnchadh,
mac Domhnaill, for Fiora tulach. Dunchadh, mac Eoghain, tigherna na
nDéisi, décc. Murchadh, mac Muirchertaigh, do mharbhadh la
Connachtaibh. Tri frosa do fhearthain hi Crich Muireadhaigh i nInis
Eoghain .i. fros do arccat gil, fros do chruithneacht, agus fros do
mhil. Conadh doibhsidhe ro raidheadh:

Trí frossa Aird uillinne, ar ghradh Dé do nimh
Fross argaitt, fross tuirinne, agus fross do mhil.

Aois Criost, seacht ccéd seasccat. An dara bliadhain do Niall Frosach.

Folachtach, mac Sarfaeladha, abb Biorra, décc. Loarn, abb
Cluana Ioraird, décc. Cellbil Cluana Bronaigh décc. Tola Aird
Breacain décc. Ailill, mac Craoibhecháin, abb Mungarat, décc.
Flaithbhertach, mac Loingsicch, rí Ereann, décc i nArd Macha, iar
mbeith seal foda i cclércecht. Suibhne, mac Murchadha co na dhís mac
do mharbhadh. Iomairecc Cairn Fiachach eitir dá mac Domhnaill .i.
Donnchadh agus Murchadh, agus Aelghal tigherna Teathbha, in ro marbhadh
Fallomhon, mac Concongalt, la Donnchadh, agus ro marbhadh Murchadh ann,
agus ro meabhaidh for Aelghal. Dungalach, toisech Ua Liatháin, décc.
Uarghal, toiseach Conaille, décc. Torptha, mac Cernaich, tigherna na
nDéisi, dég.

Aois Criost, seacht ccéd seasccat a haon. An treas bhliadhain do Niall.
Criomhthann, mac Reachtgoile, abb Cluana ferta décc. Aodhan Lis
mhóir décc. Iomairecc Sruthra etir Ui mBriuin, agus Conmaicne, in
ro marbhadh sochaidhe do Conmaicniu, agus Aodh Dubh, mac Toichligh. Ro
meabhaidh an tiomaireg sin ria nDuibhindreachtach, mac Cathail. Iomairecc
etir fira Midhe agus Bregha, in ro marbhadh Maolumha, mac Toithil, agus
Donghal, mac Doireith.

Aois Criost, seacht ccéd seasccat adó. An cethramhadh bliadhain do Niall.
Cubran, abb Cille achaidh décc. Fidhbhadhach, abb Bendchair,
décc. Dubhdainbher, mac Cormaic, abb Mainistreach Buithi, do bhádhadh
isin Bóinn. Slebhene, mac Conghaile, do Chenel Conaill Gulban, abb
Iae, dég. Mac an tsair, abb Eanaigh duibh, décc. Glaindiubair,
abb Lathraigh Briuin, décc. Murchadh, mac Flaithbertaigh, tigherna
Cenel Conaill, do mharbhadh. Ceallach, mac

Coirpre, mic Fogartaigh, do mharbhadh la latrondaibh. Iomairécc Aird na
mBrecc ria tTuaimsnámha, mac Floinn.

Aois Criost, seacht ccéd seasccat atrí. An cúigeadh bliadhain do
Niall. Gormghal, mac Ailiolla, décc. Aedhan, ab Lis móir, décc.
Ceinnsealach, mac Conboirne, abb Imligh Iubhair, décc. Coibhdenach,
abb Cille Toma décc. Forgla sruithe Cluana mic Nóis dég.
Duibhinrecht, mac Cathail, rí Connacht, décc. Eithne, inghen Bresail
Bregh, ben rí Temhrach décc, iar nairilleadh fochraicce ó Dhia tria
déighghníomhaibh, agus tria aithrighe ndíocra ina tairmtheachtoibh.
Iomaireacc etir Laighnibh budhdhéisin .i. eitir Cionaedh, mac Flaind, agus
Aedh, i Foirtrinn, in ro marbhadh Aedh. Conchubhar, mac Cumasccaigh,
tigherna Aidhne, décc. Niall mac Diarmata, tigherna Midhe décc.
Guin Tuamasnamha, tigherna Osraighe.

Aois Criost, seacht ccéd seascca a ceathair. An seiseadh bliadhain do
Niall. Murghal, mac Ninneadha, abb Rechrainne, décc.
Enchorach hUa Dodain, abb Glinne da Locha, décc. Commán Eanaigh Daithe
décc. Iomairecc eitir Osraigibh féissin ria Tuaimsnamha in ro meabhaidh
for cloinn Cheallaigh, mic Faelchair. Iomairecc Ferna ria
cCeinnsealachaibh, in ro marbhadh Dubhcalgaigh, mac Laidhgnen.

Aois Criost, seacht ccéd sescca a cúig. An seachtmhadh bliadhain do
Niall. Ardghal, abb Clochair mic nDaimhine, décc.
Fiachra Granaird décc.

Feirghil Chille móir Eimhire décc. Feargus, mac Cathail, epscop,
décc. Folachtach Thighe Tuae, abb Cluana mic Nóis,
décc. Crundmhaol, epscop agus abb Cille móire Emire, dég.
Condmhach, mac Brenainn, abb Cluana Tochne, décc. hUa Becce, abb
Fobhair, décc. Tuaimsnamha, mac Floinn, tigherna Osraighe, do
mharbhadh. Narghal, mac Natsluaigh, décc. Iomairecc etir Laighnibh
budhdéisin, in ro meabhaidh ria cCeallach, mac nDunchadha, agus in
ro marbhadh Cionaedh, mac Floinn, agus a bhráthair Ceallach, agus
Caithnia, mac Becce, agus sochaidhe eli cenmotaidsidhe. Sraineadh etir
Uí Cennsealaigh, in ro meabhaidh ria nEtersgel, mac Aodha, mic Colgan,
agus in ro marbhadh Cennsealach, mac Brain, lais. Coscradh Ocae ria
bferaibh descert Bregh for Laighniu. Coscradh Bhuilg Boinne for
fhiora descert Bregh in ro marbhadh Flaithbhertach, mac Floinn, mic
Roghallaigh, agus hUairchridhe, mac Baith, agus Snedhgus, mac Ainstigh,
agus Cernach, mac Floinn Fhoirbhthe. Coscradh Atha cliath ria
Ciannachtaibh Breagh for hUa Tégh, agus ár mór for Laighnibh, agus dna
ro báidheadh sochaidhe do Ciannachtaibh illán mara oc tionntudh. Niall
Frosach, mac Ferghaile, secht mbliadhna ós Eirinn 'na righ, co
nerbaili nI Cholaim Chille aga oilithre iar nocht mbliadhna iaromh.

Aois Criost, seacht ccéd seascca a sé. In chéd bhliadhain do Dhonnchadh,
mac Domhnaill, uas Eirinn, i ríghe. Fland hUa Dachua, abb Insi
Caindegha, dég. Failbhe Erdaim dég. Forbasach Ua Cernaigh, abb
Cluana mic Nóis, décc. Do hUibh Briuin dó sein. Aedhgen,
epscop agus abb Fobhair, dég. Cobhlaith,

inghen Cathail, banab Cluana Cuthbhind, dég. Ro fhás easaonta
etir Ceallach, mac Dúnchadha, rí Laighen, agus an rí Donnchadh, mac
Domhnaill. Do rónadh dno lérthinol Ua Neill la Donnchadh go
Laighnibh. Ro siachtadar Laighin rias an righ co na shochraide go
rangadar Sciath nEacthain. Airisidh Donnchadh co na slógh i nAillinn.
Ro ghabhsad dna a muinntir for dhódh, agus losccadh, ionnradh, agus argain
an choigidh co cenn seachtmhaine, co ro riaraidhset Laighin é fó dheoidh.
Coirpre, mac Foghartaigh, tigerna Bregh, dég. Becc, mac Connla,
tigherna Teathbha, décc. Aongus, mac Feradhaigh, tigherna Ceneoil
Laoghaire, dég do bhedhg. Cathal, mac Conaill Minn, tigherna Coirpre
Moire, décc. Dungholach, mac Taichligh, toiseach Luighne, dég.
Artghal, mac Conaill, tigherna Coirpre Tethbha, dég.

Aois Criost, seacht ccéd seascca a seacht. An dara bliadhain do
Donnchadh. Aerlaidh Cluana Ioraird dég. S. Suibhne, abb Iae Coluim
Cille, dég. Maelaithghen, abb Cluana hedhnigh, Sealbhach, mac
Conalta, ab Corcaighe, Edhniuch, mac Erc, abb Léth decc>. Aonach na
lamhcomarta, uair tudcatar airdhena aighthidhe adhuathmhara an tan sin, ro ba
samhalta fri hairrdhibh laoi bratha .i. toirneach agus teinnteach anffoil,
gur bhó difhulaing do chach for chloistecht no faircsi aroile. Gabaidh dna
adhuath agus oman fiora Ereann gur ro furailseat a sruithi forra dá
thredhan do dhenamh imaille re hernaighthe ndiochra agus aon proinn
etorra sidhe dia snadhadh agus saoradh ar thedhmaim im fhel Michil do
shonnradh, conadh de sin boi an lamhcomairt dia rerbradh an tene do

nimh. Aodh Ailghin, tigherna Ua Maine, do mharbhadh. Art, mac
Flaithnia, toiseach Aidhne, do mharbhadh. Dunghal, mac Ceallaigh,
tigherna Osraighe, dég. Cennsealach, tighearna Ua Fidhgente, décc.

Aois Criost, seacht ccéd sescca a hocht. In treas bhliadhain do
Dhonnchadh uas Erinn i righe. Maenach, mac Colmain, abb Slaine,
agus Cille foibrich, dég. Daniel Ua Foilene, scribhneóir Lethabhai
dég. S. Martan .i. epscop Insi edhnigh, deug 1 Nouember. Gallbran
Ua Lingain, scribneoir Cluana mic Nois, Aedhan, epscop Maighe eu,
Cethernach hUa Ermono, abb Cluana ferta Brenainn, Lerthan, banabb
Cille dara, Aedh, mac Coirpre, abb Rechrainne, Donnchadh, rí
Connacht, deug.

Aois Criost, seacht ccéd sescca anaoi. In cethramhadh bliadhain do
Dhonnchadh os Erinn. Albran, mac Fóidmigh, abb Treoit moir, décc
etir di caisg. Ultan hUa Berodherg, abb Othna moire, dég. Ernadhach,
mac Echin, abb Lethghlinne, dég. Forandán, scribneoir, agus epscop
Treóit, déug. Soairleach Ua Concuaráin, abb Lis móir, déug.
Senchan, abb Imleacha iubhair, déug. Iomraiteach Ghlinne Cloitighe,
anchoire, déug. Tomaltach, mac Murgaile, tigherna Maighe hAí, deug.
Badhbchadh, mac Eachtgusa, toiseach Ceneoil Mic Earca, dég. Ceallach,
mac Dunchadha, ri Laighen décc. Eoghan, mac Colmain, dég.
Cédchongbhail Tamhlachta Maileruain.

Aois Criost, seacht ccéd sechtmoghad. In cúigeadh bliadhain do
Dhonnchadh isin righe. Dondghal, mac Nuadhad, abb Lughmhaidh, déug.
Fianchú, abb

Lughmhaidh, deug, agus Conall, abb Maighe Luinge. Ciaran
Craibhdheach Bealaigh duin déug 14 Iun. Suairleach, abb Linne
décc. Ardmacha, Ceall dara, Glend dá Lacha, agus Inis Baoithin do
losccadh. Donnchadh, mac Domhnaill, rí Ereann do thionól slóigh lais i
Mumhain. An Mhumha dfásucchadh lais, agus sochaidhe mór do
Mhuimhnechuibh do mharbhadh don turus sin. Do bertsat iaramh a rér dó.
Fergus, mac Colgan, décc. Aelghal, mac Flaind, mic Conlai, toiseach
Teathbha, dég. Iomaireacc Achaidh liacc etir Ui mBriuin agus Uibh
Maine, in ro meabhaidh for Uibh Máine. Duibhinnrechtach, tigherna
Aradh, déug. Cucoingealta, tigherna Corca Laighdhe, deug.

Aois Criost, seacht ccéd sechtmoghad a haon. In seiseadh bliadhain do
Donnchadh isin righe. Colam Finn, Ancoire, deug. Maccoiccedh, abb
Cluana móir Maedhócc, décc. Tnuthghal, abb Saighre, deug.
Gaoidheal Cluana Ioraird dég. Forbasa, abb Ratha Aodha, dég.
Collbran, abb Cluana mic Nóis, déug. Eoghain, mac Roinchinn, abb Lis
móir, déug. Maolmaenaigh, abb Chinn garadh, deug. Maolrubha Ua
Maenaigh déug. Muireadhach, mac Ainbhcheallaigh, déug. Iomairecc etir
Dhal Araidhe fésin i Slébh Mis, in ro marbhadh Nia, mac Concongalta.
Iomairecc oile do ridhisi edir Dal nAraidhe ria nEochaidh, mac Fiachna,
agus ria tTomaltach mac Ionnreachtaigh, in ro marbhadh Cionaodh Ciairrge,
mac Cathasaigh, agus Dúngal Ua Fergusa, go ndruing ele cenmotadsomh.
Iomaireacc Atha Dumha etir na hAirthera, agus hUi Eachdhach

Cobha, in ro marbhadh Gormghal, mac Conaill Crái, tighearna Cobha.
Iomaireacc etir Dhonnchadh agus Conghalach, i ttorchair Ferghal, mac
Eladhaigh, tigherna Ua mBreasail Beiri. Ceallach, mac Dúnchadha, rí
Laighen, décc. Tuathal, mac Criomthainn, Domhnall mac
Foghartaigh, toiseach na hAirde, déug. Aodh Finn, tighearna Dál
Riada, deug. Ferdáchrioch, abb Arda Macha, mac sidhe Suibhne, mic
Rónáin, mic Crunnmaoil, do écc.

Aois Criost, seacht cced seachtmoghadh adó. An sechtmhadh bliadhain do
Dhondchadh ós Erind. Ban Badhbhgna, eagnaidh, déug. Iomaireacc occ
Odhraibh temhrach etir dá Cummascaigh, go ro mharbh an dara fear aroile.
Iomaireacc Cala tromina etir da Ua Cernaigh .i. Niall agus
Cumascach, i torchair Eachtgus, mac Baith, agus sochaidhi imaille fris.
Flathroi, mac Domhnaill, ri Connacht, dég. Sloigheadh Laighen do
thabhairt lá Donnchadh for Bhregha. Cogadh edir Donnchadh agus
Conghalach.

Aois Criost, seacht ccéd sectmoghad atrí. An tochtmadh bliadhain do
Dhonnchadh ós Erind. Snédhchest, mac Tuamchon, abb Bennchuir,
déug. Conall, mac an tsaoir, egnaidh, agus abb Bennchuir, dég.
Ainbhcheallach, abb Condere agus Lainne hEala, deug. Fionan, abb
Cluana hEuis, déug. Sithmaith, bannabb Chluana Boirend, dég.
Ethne, inghen Cianadon, déucc. Cluain mic Nóis do losccadh. An cogadh
cédna etir Donnchadh agus Congalach, i torchair Congalach, mac Conaing,
toiseach Breagh, Cuana mac Eccnigh, agus Dunchadh mac Alene, tigherna
Mughdorn, agus Diarmuid, mac Clothnai, co sochaidhibh imaille friu. Ro
sraíneadh an cath ria nDonnchadh. As don cath sin ro raidheadh:

Do chath Forcalaidh foraeradh, domhnach dubhach derach,
Ba iomdha mathair baeidh brónach is ind luan ar na bhárach.

I mBuile in Scáil atá an rannsa:

Biaidh co nimbiud accan an madan hi Forcaladh,
Ria nDonnchadh Midhe memhais cath init apail Conghalach.

Eterscel, mac Aedha, mic Colgan, tigherna Ua Cennsealaigh, dég.
Niall, mac Conaill Graint, toisech descert Bregh, déug. Tuathal,
mac Crumhthainn, toisech Cualann, déug. Flannabhro, tigherna Umhaill,
déug.

Aois Criost, secht ccéd seachtmoghad a cethair. In nómhad bliadhain
do Donnchadh. Fulartach, epscop Cluana hIoraird, déug. Learghal,
eccnaidh, mac Nemhit, abb Biorair, déug. Moenan, mac Corbmaic,
abb Cathrach Fursa isin Frainc, déug. Forbhasach, mac Mailetola, abb
Rosa Comáin, deucc. Sluaigheadh la Donnchadh, mac Domhnaill, isin
Fochla, go ttuc gialla o Dhomhnall, mac Aodha Muindeirg, tigherna in
Tuaisceirt. Iomaireacc Cille Coice, i ttorchair Ferghal, mac Dunghaile,
mic Faolchon, tigherna Forthuath Laighen, las an righ Donnchadh. Cell
dara do losccadh. Cluain mhor Maedhog, agus Ceall Delgi do losgadh.
Aengas, mac Aileni, tigherna Mughdhorn, décc. Flathrae,

rí Connacht, déug. Muiredhach, mac Aonghusa, toiseach Arda Ciannachta,
do mharbhadh.

Aois Criost, seacht ccéd sechtmodha a cúicc. An dechmhadh bliadhain do
Dhonnchadh. Scandal abb, comharba Caindigh, dég. Maicniadh, mac
Ceallaigh, abb Dhúinlethghlaisi, décc. Augustin Bendchuir déug.
Sédrach, mac Sobhairthain, dég. Adharchu eagnaidh dég. Forbflaith,
inghen Chonnlai, banabb Chluana Brónaigh, dég. Iomairecc hUilne
Guaire, i torchair Flann, mac Ceallaigh, agus Scannlán, mac
Fiannachtaigh.

Aois Criost, secht ccéd seachtmodha a sé. An taonmhadh bliadhain dég do
Dhonnchadh. Ailgniadh, epscop Arda Breccáin, Senchan, abb
Imleacha Iubhair, Orach, abb Lismóir, agus abb Insi Doimhle,
Saerghal hUa Dungnae, abb Cluana ferta Molua, Duibhindrecht, mac
Fergusa, abb Ferna, Maenach Ua Maonaigh, abb Lainne Léire, Feachtnach,
abb Fobhair, agus Saerghal Ua Cathail egnaidh, décc. Aelbran hUa
Lagudon, abb Cluana Dolcain, Nuadha Ua Bolcain, abb Tomma Daolann,
Flaithniadh, mac Congaile, abb Cluana fearta Brenainn, ro éccsat
sin uile an bhliadhain si. Colcca, mac Ceallaigh, tigherna Ua
cCremhthainn. Dunghal, mac Flaithniadh, tigherna Umhaill, déug.
Condalach, mac Ailella, do mharbhadh i nArd Macha. Cath Righe ria
feraibh Breagh for

Laighnibh, la Samhna do shonnradh, in ro marbhadh Cucongalt, tigherna
Ratha inbhir, agus Ferghal, mac Ailella, tighearna Ceniuil Uchae.
Asiad badar toisigh dferaibh Bregh ag sraineadh in chatha hisin,
Diarmuid, mac Conaing, Conaing, mac Dunghaile, Maoldúin, mac Fergusa,
agus Foghartach, mac Cumascaigh. As do sin ro raidheadh:

Lodar Laighin ar Samhain, do thigh daighfhir nat carsat,
Nis ragaibh lugha dighe, for brú Righe ro ansat.

Ferghus, mac Eachdach, tighearna Dal Riada, décc.

Aois Criost, seacht cced sechtmodha a secht. An dara bliadhain décc do
Donnchadh. Corbmac, mac Bresail, abb Aird Breacain agus ceall
naile décc. Scandal Ua Taidhg, abb Achaidh bó, décc, iar mbeith trí
bliadhna ar dá fhichit i nabdaine. Hi féil Comhgaill atbath somh.
Banbhan, ab Claonta, dég. Aodhan, abb Rosa Comáin, décc. Daniel
Ua Aithmit, abb Dairinsi décc. Ciarán Tighe Munda décc.
Ferdomhnach Tuama Daghualann dég. Muiredhach, mac Uarghaile, prioir
Ia Coluim Cille, décc. Ultan fertighis Beandchuir, Becan
Lifeachair, Tailefhlaith, inghen Murchadha, banabb Cluana Cuifthin,
décc. Iomaireacc Cuirrigh la taobh Cille dara an ui. Kal. September,
dia Mairt etir Ruadhraich, mac Faolain, agus Bran, mac Muireadhaigh, in
ro marbhadh Mucchron, mac Floinn, tigherna Ua Failghe, agus
Dubhdácríoch, mac Laidhgnein hi frecar. Ria Ruaidhri ro meabhaidh.
Artghal, mac Cathail, rí Connacht, do gabháil bhachla, agus a dhol co
hI dia oilethre an bhliadhain ar ccind.

Aois Criost, seacht ccéd seachtmodha a hecht. An treas bhliadhain décc

do Dhonnchadh. Feargus, epscop doimhliacc, Oengus, mac Crunnmhaoil,
abb Doimhliacc, Suairleach, angcoire Lis móir, Mac Flaithniadh, abb
Cluana ferta, Rechtlaiten Fobhair eccnaidh, Aaron eagnaidh, Faelgus,
mac Tnuthghaile, eaccnaidh Cluana hEraird, Ailill Ua Tiopraitte, agus
Becc, mac Cumascaich, décc. Ciarán o Bhelaigh dúin, do sgribh
beatha Phadraic, décc. Ardmacha agus Magh eo do losccadh do thene
saighnein aidhchi Sathairn do shonnradh, isin cethramhadh noin August. Ba
tóirneach, teinteach, gaothach, ainainfenach, an oidhche hisin, agus is
isidhe adhaidh ro díothláithrighedh mainisdir Cluana Brónaigh. Domhnall,
mac Flaithniadh toiseach Ua fFailge, do mharbhadh hi cCluain Conaire.
Iomaireacc Dumha achidh eitir Dal nAraidhe, hi ttorchair Focharta hUa
Conalta. Forus chana Pátraicc i cCruachain la Dubhdaleithe, agus
lá Tiopraitti, mac Taidhcc.

Aois Criost, seacht cced sechtmodha anaoi. An cethramhadh bliadhain
décc do Dhonnchadh. Flann, epscop, eagnaidh, agus abb Insi Caindegha,
Rechtnia, abb Cluana mic Nois, do Síol Choirpri Cruim, Ciarán, abb
Ratha Maighe Eonaigh agus Tighe Mofhionda, Cearnach, mac Suibhne, prioir
Arda Macha, agus Conall, mac Crunnmhaoil, abb Luscan, décc. Ríoghdhal
ettir Dhonnchadh, mac Domhnaill, agus Fiachna, mac Aodha Róin, ag Insi
na righ i nairthear Bregh. As di ro ráidheadh.

Cisi brigh, an dal oc Insi na righ,
Donnchadh ni dichet for muir, Fiachna ni dichet hi tír.

Iomairecc Cairn Conaill, i nAidhne, ria tTiopraitte, mac Taidhg, rí
Connacht, agus ro sraoineadh for Uibh Fiachrach. Maoldúin, mac
Aongusa, tigherna Ceniuil Laoghaire, Indrechtach, mac Dunchadha,
Aedhghal, tigherna Umhaill, Coisenmhech Ua Predene, tigherna Ua
nEathach Uladh, Maelcaech, mac Cumscraith Mind, Cugamhna, mac
Naoindenaigh, tigherna Cenel cCoirpri, décc.

Aois Criost, secht ccéd ochtmodha. An cúigeadh bliadhain décc do
Dhonnchadh. Maelochtraigh, mac Conaill, abb Chille Cuilinn, agus
scribhneoir Cille na manach. Mochthighern eagnaidh, Mac Ceallaigh,
abb Insi Cealtra, Ioseb Ua Faeláin, abb Biorair, Eochaidh mac
Focartai, abb Fochladha, agus Insi Clothrann, agus Ellbrigh, banabb
Cluana Bronaigh, décc. Senchan, epscop agus ab Imligh Iobhair, décc
xii. December. Ruaidhri, mac Faolain, ri Laighen, Conchubhar mac
Colgan, Dunchadh Ua Daimhine, tigherna Ua Maine, Maeldúin, mac Fergusa,
tigherna Locha Gobhair, Flaithnia, tigherna Coirpri Cruim décc.
Iomairecc Muaidhe ria tTiopraitte, mac Taidhg, rí Connacht, agus ro
meabhaidh roimhe. Raoinedh oile ria tTiopraide for Mhuimhnechaibh.

Aois Criost, secht ccéd ochtmodha a haon. An seiseadh bliadhain décc do
Dhonnchadh. Tiopraitte, mac Ferchair, abb Cluana ferta Brénainn,
Maelcombair, abb Glinne da Locha, Snedriaghail, abb Cluana mic Nóis,
do Calraighibh Aolmhaighe dhó, Faebhardaith, abb Tulain, Maeldúin,
mac Aedha Bennain, tigherna hIrluachra, Scandlán, mac Floinn, toiseach
Ua Fidhgeinte, Tiopraide,

mac Taidhg, rí Connacht décc. Cath Atha Liacc Find eitir
Donnchadh, mac Murchadha, agus siol Aodha Slaine, in ro marbhadh Fiachra,
mac Cathail, toiseach Fear cCúl, agus Fogartach, mac Comasccaigh,
toiseach Locha Gabhar, agus dá Ua Conaing, .i. Conaing agus Diarmuid
Doibil. Ceallach mac Maenaigh, Ceallach, mac Corbmaic, toiseach Arda
Ciannachta, décc. Forbhasach, mac Seachnusaicch, toisech Ceneoil
mBóghaine décc. Iomaireacc etir Ui Eathach agus Conaille, in
ro marbhadh Cathrae, toiseach Mughdorn, agus Rimidh, mac Cearnaigh.
Faelan, mac Forbhasaigh, do Osraighibh, do mharbhadh leo budhdeisin.
Raoineadh ria Maoldúin, mac Aodha Allain, for Dhomhnall, mac Aodha
Muindeircc.

Aois Criost, seacht cced ochtmodha a dó. An seachtmhadh bliadhain décc do
Dhonnchadh. Lomthuile, espucc Chille dara, agus Dubhdábhoireann,
abb Cluana hEraird, dég. Snedhbran, epscop Cille dara, Colga, mac
Crunnmhaoil, abb Lusccan, Robhartach, mac Maenaigh, fertighis Sláine,
agus abb Cille Fóibrigh, Muiredhach, mac Cathail, abb Cille dara,
Rechtabhra, mac Duibhcommair, abb Eachdromma, Learghus Ua Fidhcháin,
eccnaidh Cille Maighnenn, Aladhchu anchoire Ratha Oenbo, agus
Cuan Imleacha Iubhair, decc uile. Conall, mac Fidhghaile, tigherna Ua
Maine, décc. Iomairecc .i. Cath Ircora etir Chenel Conaill, agus
Eoghain ria Maolduin, mac Aodha Allain, in ro meabhaidh for

Dhomhnall, mac Aodha Muindeirg. Ar Ua mBriuin Umhaill la
hUibh Fiachrach Muirisce, agus torchradar sochaidhe ann ima toiseach,
Flathghal, mac Flainnabhrat.

Aois Criost, secht céed ochtmodha atrí. An tochtmadh bliadhain décc do
Dhonnchadh. Colum, mac Faelgusa, epscop Lothra, Dubhdathuath, epscop
agus abb Ratha Aodha, agus Maccócc, abb Saighre décc. Guaire, mac
Dunghalaigh décc. Tigherna Ua mBriuin Cualann esidhe. Maoldúin,
mac Aodha Allain, rí an Fochla, décc. Doire Calgaicch do
losgadh. Lex Chiaráin for Chonnachtaibh.

Aois Criost, secht ccéd ochtmodha acethair. An naoi décc do
Dhonnchadh, Murghal, abb Cluana mic Nois, do Chenel Fiachrach,
mic nEathach Moighmedhoin dó. Feadhach, mac Corbmaic, abb Lughmhaidh,
Slaine, agus Doimhliag, dég. Gormghal, mac Eladhaigh, tigherna
Cnoghbha, décc i cléirchecht. Ferfughaill, epscop Cluana Dolcain,
décc. Sluaighedhach, toiseach Conailli, décc. Suibhne, mac Adhuair,
décc. Ferghil .i. an geometer, abb Achaidh bó, décc san nGermáinne
san 30 bliadhain dia eapscopóid. Iomairecc Claidighe etir Cenel Eoghain
agus Conaill, agus ro meabhaidh for Domhnall. Sarucchadh Bachla Iosa
agus mionn Padraicc la Donnchadh

mac Domhnaill acc Raith Airthir ar an aonach. Cluain Eraird do losccadh
aidhche Chasg do shonnradh. Iomairecc Droma Góisi etir Connachtaibh, agus
ro mheabhaidh for Fogartach, mac Cathail.

Aois Criost, seacht ccéd ochtmodha a cúig. An fichetmhadh bliadhain do
Dhonnchadh. Noe, abb Cinngaradh, Siadhal, abb Duibhlinde,
décc. Dunghal, mac Laeghaire, abb Duinlethglaisi, agus Maelconchubhair,
abb Glinne da Locha, décc. Cinaedh, mac Anmcadha, tigherna Ua
Liatháin, dég. Fiachna, mac Aedha Roin, rí Uladh dég. Iomairecc
Atha Rois ria nUibh Ailella for Luighniu, in ro marbhadh
Dubhdathuath, mac Flaithgiusa, tigherna na tTri Sloinnte. Iomairecc
Cluana Miolain, i ttorchair Maeldúin, mac Cumasccaigh, la Ferghal.

Aois Criost, seacht ccéd ochtmodha asé. An taenmhadh bliadhain fichet do
Dhonnchadh. Caencomhrac, epscop Fionnghlaise Cainnigh, Saerbhercc
abb Cluana mic Nóis, décc. Siornae, abb Bendchair, agus Muireadhach,
mac Aonghusa, abb Lusccan, décc. Dinertach, mac Mogadhaigh, ancoiri,
décc. Ardghal, mac Cathail, rí Connacht, décc i nIae Coluim Cille,
ina oilithre. Amhalgaidh, tigherna Ua Maine, décc. Iomaireacc Aird
Abhla in ro marbhadh Diarmuid, mac Bece, tigherna Teathba la Ferghus,
mac Ailghille.

Aois Criost, seacht ccéd ochtmodha a seacht. An dara bliadhain fichet do
Dhonnchadh. S. Maelruain, epscop Tamlachta Maoilruain, décc an
7 lá Iul. Aedhan hUa Concumba, epscop, agus milidh tocchaidhe do Crist,
décc. Terocc,

abb Corcaighe, Aedhan Raithne, Cronan Liae Fernae, agus Soermugh
Eanaigh duibh dég. Tomaltach, mac Innrechtaigh, ri Uladh, do
mharbhadh la hEochaidh, mac Fiachna. Breasal, mac Flathrai, tigherna
Dáil Araidhe, Maelbresail, mac Aedha, mic Crichain, tigherna Ua
Fiachrach, Fiachan, tigherna Conaille, Donncoirche, tigherna Dail
Riata, agus Cathmugh, tigherna Calraighe, décc. Iomaireacc sruithe
Cluana Arggaid, i ttorchair Cionaedh, mac Artgaile, la Muirghes, mac
Tomaltaigh. Iomaireacc Airdd mic Rime, ria Muirghes, mac Tomaltaigh,
bheós for Uibh nAilella, i ttorchair Conchubhar agus Aireachtach Ua
Cathail, Cathmugh, mac Flaithbhertaigh, tigherna Coirpre, agus Corbmac,
mac Duibhdácríoch, tigherna Breifne.

Aois Criost, seacht ccéd ochtmodha a hocht. An treas bhliadhain fichet do
Dhonnchadh. Crunnmhaol Droma Inescclainn, abb Cluana Ioraird.
Cionaedh, mac Cumasccaigh, abb Dearmhaighe, Doimtheach, Airchindeach
Trefoit móir, Aurthaile, abb Othna, Flaithgheal, mac Taichlich, abb
Droma rátha, Maeltola, abb Lathraich Briuin, Cucathrach Saighre,
Rechtine Eatargabhla, Cuan Atha easccrach, Coirpre, mac Laidhgnen,
tigherna Laighen Desgabhair, décc. Lex Commain lá hAeldobhair .i.
ab Rosa Commain, agus la Muirghes for theóra Connactaibh. Lex
Ailbhe Imligh Iobhair for Mumhain.

Aois Criost, seacht ccéd ochtmodha anaoi. An cethramhadh bliadhain fichet
do Dhonnchadh. Tomas, abb Bendchuir, Cathnia Ua Guaire, abb
Thuamma

Gréine, Ioseph Ua Cernaich, abb Cluana mic Nóis, do Chiannachtaibh
Breacch, Learbhanbhan, airchindeach Cluana Boireann, Colgu Ua
Duineachda, ferleighind Cluana mic Nois, asé do roine an Scuaip
Chrabhaidh. Sloigheadh la Donnchadh dimairdean Laighen ar
Mhuimhneachaibh.

Aois Criost, secht cced nochat. An cúicc fichet do Dhonnchadh.
Tiopraitte, mac Ferchair, abb Cluana ferta Brénainn, Guaire Ua
Tiopraitte, abb Cluana fota, Maonach, abb Cluana ferta Molua, Murchadh,
mac Feradhaigh, décc. Losccadh Rechrainde ó dhibhearccaibh, agus a
Sccríne do chosccradh agus do lomradh. Bran Airdchend, rí Laighen,
agus Eithne, inghen Domhnaill Midhigh, do mharbhadh la Finsnechta
Cethairdhercc, mac Ceallaigh, hi cCill Chúile dumha an seiseadh oidhche
do shamhradh dia Cédaoin do shonnradh. Conid do do ráidheadh:

Aidhes Brain, olc fri taidi, i Cill Chúile dumhai,
Eithne, inghen Domhnaill Midhigh, ba dirsan do suidhiu.

Cond Cetadhach, mac Donnchadha, do mharbhadh hi ttaigh Cumalcaich
hi Crich Ua nOlcan, la Fland, mac Conghalaich. As do bhás
Cuind ro ráidheadh:

Coirm do ronadh la hUa Olcáin issedh dot chath de linn gráin,
Tuctha descaid do ó Flann co ruc a cend o bebail.

Cathasach, mac Toirpthea, tigherna Ua nEathach dég. Cúdínaisc,
mac Conasaigh, abb Arda Macha, décc.

Aois Criost, seacht ccéd nochat a haon. An seiseadh bliadhain fichet do
Dhonnchadh. Clothchu, epscop agus Angcoire Cluana Ioraird, Suibhne,
epscop Atha Truim, décc. Duibhlitir, abb Finghlaise, décc an 15
Maii. Olcobhar, mac Flaind, mic Eirc, scribhnidh, epscop, agus anchoiri,
décc. Colcca egnaidh décc. Senchan, abb Cille Achaidh Drummota
agus Biorair, Maenach, mac Aonghusa, prioir Luscan, agus Eochaidh, mac
Cernaich, ferthigis Arda Macha, décc. Maelcobha, mac Floinn Feorna,
tigherna Ciarraighe Luachra, Fogartach, mac Cathail, tigherna Maighe Aí,
agus Duineachaidh Ua Daire, tigherna Ciarraighe Aí décc.

Aois Criost, secht ccéd nochat a dó. Donnchadh .i. mac Domhnaill, mic
Murchadha, a secht fichet go nerbailt iar mbuaidh aithrighe san lxiu
bliadhain dia aois. Conadh occa eccaoine do ráidhedh an rand:

Donnchadh Fremhann flaith fuata cloithrí Ereann cet céte,
Ní fuil bus liach do mhalairt, uair nar anacht a téte.

Indrechtach, mac Domhnaill, derbhrathair an rígh Donnchadha, décc.
Dubhdalethe, mac Sionaigh, abb Arda Macha, do écc. Condal, inghen
Murchadha,

banabb Cille dara, Conamhail, abb Léith, Olcobhar, mac Flainn,
airchinneach Insi Cathaigh, Aelmidhair feirtighis Cluana mic Nois, do
shiol Maolruanaidh dosidhe, Cumuscach, mac Foghartaigh, tighearna
Déiscert Bregh, décc i ccléircecht. Muireadhach, mac Floinn Garadh,
tighearna Cenel Mic nEarca, dég. Curaoi, mac Aongusa, tigherná Cenel
Laoghaire, décc.

Aois Criost, seacht ccéd nochat atrí. An chéd bhliadhain dAodh
Oirdnidhe, mac Néill Fhrosaigh, hi righe uas Erinn. Eudus hUa
Diocholla, abb Cille dara, Connmhach, mac Buirbotha hua Guaire Aidhne,
scribhneoir Cluana mic Nóis, agus Eochaidh Fhirt Aedha, décc. Cath
Droma rígh ria nAodh nOirdnidhe i ttorcharadar dá mac Domhnaill,
Fínsnechta agus Diarmuid, Fínsneachta mac Follamhain, agus sochaidhe oile
nach airemther imaille friu. As dia foraithmet do raidhedh:

Cia do rochair Aodh la Domhnall coscar cicar,
Frisin Aodh finn fir, i ccath Droma righ ro hicadh.

Aedh Oirdnidhe do fhasucchadh Midhe gur bho riarach dhó. Inis
Pádraicc do losccadh la hAllmuirechaibh, agus sgrín Dochonna do bhreith
dhoibh, agus inredha do dhenamh dhóibh chena etir Erinn agus Albain.
Aiffiath, epscop Arda Macha, agus Airectach Ua Faoláin, abb Arda
Macha, décc i naen oidhche.

Aois Criost, seacht ccéd nochat a cethair. An dara bliadhain dAodh

Oirdnidhe. Feradhach, mac Seigheni, abb Reachrainne, Anaile, abb
Cluana mic Nóis, .i. do Uibh Briuin décc. S. Siadhal Ua Commain,
abb Cinnlacha, décc an 8 Marta. Blathmac, mac Guaire, abb Cluana
Baedáin, Fiannachta Ferna, Suibhne Cille Delgge, agus Breslen
Berre, décc. Cluain Ioraird do losccadh i ttós samhraidh. Ailell, mac
Indreachtaigh, tighearna Ua Maine Connacht, décc. Domhnall, mac
Donnchadha, do mharbhadh la a bhráithribh. Dúnfhlaith, inghen
Flaithbhertaigh, mic Loingsigh, décc. Iomaireacc Dúine Gainbhe eitir
Chonnachtaibh féisin, i ttorchair Coscrach, mac Duinn, agus
Gaisccedhach, agus sochaidhe oile imaille friú. Iomaireacc Finnabhrach
i Tethbha ria Muiredhach, mac Domhnaill, ttorcratar maithe iomdha im
Fergas, mac Ailgile, tighernae Cheneóil Coirpre, im Dhuibhindreacht,
mac Artghaile, agus im Muiredhach, mac Connmaigh, agus im Cosccrach mac
Ceithernaigh. Ind lamhchomairt i féil Michil na bliadhna so, dia
nebhradh an tene do nimh. Faoindealach, mac Maenaigh, abb Arda Macha,
décc iar mbeith dó Dhubhdaleithe i nimresain fris cétus imon abbdaine,
agus do Ghormghal ina dheadhaidh.

Aois Criost, seacht ccéd nochat a cúicc. An tres bhliadhain dAodh
i righe. Airmedhach, abb Bennchuir, Aeldobair, abb Rosa Commáin,
Mimthenach, abb Glinne da Locha, Tairdhelbhach, abb Cille achaidh,
Loingseach, mac

Fiachra, abb Duin Leathglaisi, décc. Maolochtraigh, ab Doire
ednigh, do mharbhadh, Commach, mac Donait, abb Corcaicche móire, agus
Ferghil Ua Taidhg, scribhneoir Luscca do écc. Ailill, mac Fergusa,
tigherna Deiscirt Bregh, do thrasccradh dia eoch, i fél Mic Cuilinn
Lusca, agus a écc fo chedóir. Iomairecc etir Cenel Laeghaire agus Cenel
Ardghail, in ro marbhadh Fianghalach, mac Dunlaing, la Conall, mac
Néill, agus la Conghalach, mac Aonghusa.

Aois Criost, seacht ccéd nochat a sé. An cethramhadh bliadhain dAodh.
Bresal, mac Segeni, abb Iae, décc, iar mbeith bliadhain ar triochat i
nabdaine. Fedhlimidh Ua Lugadon, abb Cluana Dolcáin, Catharnach, mac
Cathail Maenmaighe, agus Nindidh, angcoire, décc. Ruamnus, abb
Domhnaigh Seachnaill, dég. Taisi naomh Ronáin, mic Beraigh, do
chor i náirc baí ar na himdenamh dór agus dargatt. Béfhail, inghen
Cathail, rioghan Donnchadha, mic Domhnaill, décc. Iomairecc etir Ultaibh,
agus Ui Eathach Cobha, i ttorchair Eochaidh, mac Ailella, tigherna
Cobha.

Aois Criost, seacht ccéd nochat a seacht. An cúigeadh bliadhain dAodh.
Ailill, mac Corbmaic, abb Sláine, egnaidh agus breithemh ergna, décc.
Muiredhach, mac Olcobhair, abb Cluana ferta Brénainn, Condachtach,
scribhneoir tocchaidhe, agus abb Iae, Clemens Tíre dá ghlas, Macoige
Aporcrosain, abb Bennchuir, dég. Cosccrach Ua Fraoich, abb
Lughmaidh, décc. Muiredhach, mac

Domhnaill, thigerna Midhe, décc. Aedh Oirdnidhe do dhol i
Mídhe, co ro rann Midhe etir dá mhac Donnchadha .i. Conchubhar agus
Ailill. Ailill do mharbhadh lá Conchabhar an bhliadhain ar ndiaidh
i gcath. Euginia, inghen Donnchadha, mic Domhnaill, rioghain righ
Temhra .i. rígh Bregh> décc. hI Choluimb Chille do losccadh la
hallmurachaibh .i. la Nortmanoibh. Toghail Locha Riach la Muirghius,
mac Tomaltaigh. Fearghal, mac Anmchadha, tigherna Osraighe, dég.
Artri, mac Aililla, tigherna Mughdorn Maighen, décc.

Aois Criost, seacht ccéd nochat a hocht. An seiseadh bliadhain dAodh.
Flann, mac Naergaile, ro fhodaimhsidhe sé bliadhna décc i ttrebhlaid
dichumhaing ar Dhia, co ro écc iaramh. Mac laisre, an suí ó Inis
Muiredhaigh, décc. Airfhindan, abb Tamhlachta Maeileruain, décc.
Iomairecc Rubha Conaill eitir dá mac Donnchadha, in ro marbhadh Ailill
la Conchubhar. Oenghas Ua Mughroin, tigherna Ua Failghe, do
mharbhadh tre ceilcc la a mhuintir féin. Finachta, mac Cellaigh, do
mharbhadh. Dunchadh mac Conghaile, tigherna Locha Cal, do mharbhadh
la a bhráthair.

Aois Criost, seacht ccéd nochat a naoi. An seachtmadh bliadhain dAodh.
Carabran, abb Lis móir, Faelán, mac Cellaigh, abb Cille dara, agus
Corbmac, mac Conaill, feirtíghis Luscan, décc. Duibhindrecht, mac
Cathail, rí Connacht, décc. Laeghairi, mac Ferghaile, tigherna
Desmumhan, décc. Domhnall, mac Aodha Muindeirg, mic Flaithbhertaigh,
mic Loingsigh, mic Aonghasa, mic Domhnaill, mic Aodha, mic Ainmireach,
tighearna an Tuaisceirt, décc. Cinaedh,

mac Duineachda, agus Cernach, mac Duinchadha, tigherna Mughdorn, dég.
Fasughadh Laighen fa dhó i naoin mís la hUibh Néill, conadh dhó do
ráidheadh:

Iarsain soais co lLaighniu, Aedh net nat imcaibh oghru,
Nír an ante trí tadcach, condo farcaibh i mbroghnu.

Aodh Oirdnidhe do thionól slóigh lánmhóir do dhol i Laighnibh, agus
Laighin do fhásucchadh fo dhí a naon mhí. Do ronadh léirthionól
fer nEreann do ridhisi leis cenmothat Laighin>, eitir laochaibh agus
cléircibh, go riacht Dún Cuair, i coiccrioch Midhe agus Laighen.
Táinic ann Connmhach, comharba Pátraicc, co ccléir Leithe Cuinn
imaille fris. Nír bhó maith las na cléirchibh tocht for slóighedh itir.
Agaoinsiot a nimnedh fris an righ. Asbert din an rí .i. Aodh, no
ghébhadh amhail atbéradh Fothadh na Canóine, conidh and ruccsidhe an
mbreith, dia ro shaor cléirigh Ereann for feacht agus sloighedh do
ghrés, co nepert: Book of Leinster, p. 621

Ecclas Dé bhi, léicc di, na snaí,
Bid a cert for leath, febh as deach ro bhaoi.
Gach fior mhanach fil, for a chubhais nglan,
Don ecclais dian dir gnidh amhail gach modh.
Gach dilmhain iar sin, fil gan recht gan réir
Cet cia theis frí baigh Aedha mhair mic Néill.
A si an riaghail chert, sech ní mór ni becc,
Foghnadh cach a modh, gan on gan ecc.
Ecclas.

Do chóidh Aodh Oirdnidhe iaramh co righ Laighen, agus fuair a oighréir ó
Laighnibh, agus do bhert Finsneachta, ri Laighen, geill agus eidire dhó.
Tarla gaeth anbfoill, tóirneach, agus teindteach isin ló ria féil Pádraicc
na bliadhna so, go ro marbhadh deichnebhar ar mhíle hi crích Corca
Baiscind, agus co ro rand an mhuir oilen Fithae i tribh randaibh.

Aois Criost, ocht ccéd. An tochtmhadh bliadhain dAodh Oirdnidhe,
Robhartach, abb Bendchuir, Muiredhach, mac Aimhirgin, abb Leithghlinne,
Cuana, abb Mainistrech Buithe, Maonach, mac Colgan, abb Luscan,
Dubhdabhoirenn Ua Dubhain, abb Cluana Ioraird, Fiangus, abb Ruis Cré,
Corbmac, mac Muirghiusa, abb Baislicce, Fine, banabb Cille dara,
décc. Ceall achaidh do losccadh co na derthaigh nuí. Muirchertach,
mac Donnghaile, tigherna Breifne, Maelbracha, mac Breslén, tigherna
Corca Loighdhe, agus Fionnachta, mac Donnghaile, décc. Cernach,
mac Fergusa, tigherna Locha Gabhair, décc. Finshneachta, mac Ceallaigh,
ri Laighen, do ghabháil cléirceachta. Do dheachaidh Aodh Oirdnidhe co
Dún Cuair, co ro roinn Laighniu eter na dá Mhuireadhach, .i.
Muiredhach, mac Ruadhrach, agus Muireadhach, mac Brain.

Aois Criost, ocht ccétt a haon. An naomhadh bliadhain dAodh Oirdnidhe.
Congal, mac Moenaich, abb Sláine, suí neccna, agus occh iodhan
eisidhe, agus Loitheach, doctor Bendchair, décc. hI Coluim Chille
do ionnradh la hallmhurachoibh, agus sochaidhe mór do laochaibh agus do
cléircibh do mharbhadh leo .i. ochtar ar thríbh

fichtibh. Flaithiusa, mac Cionaedha, tigherna Ua Failghe, do mharbhadh
i Raith Imghain. Tír da ghlas do losccadh. Finnachta, mac Ceallaigh,
rí Laighen, do ghabháil ríghe do rídhisi. Connmhach, bretheamh
Ua mBriúin, dég.

Aois Criost, ocht cced a dó. An dechmhadh bliadhain dhAodh Oirdnidhe.
Cendfaoladh, epscop Cluana ferta, décc. Elarius, angcoire, agus
scribhneóir Locha Créa, décc. Lemnatha Cille manach décc. Ecclas
Choluim Chille hi cCenannus do dhíothláithriucchadh. Inis
Muiredhaigh do losccadh la hallmhurachaibh, agus a ndol istegh for Ros
Commáin. Corbmac mac Donghalaigh, tigherna an Fhochla, décc.
Murchadh Ua Floinn, tigherna Ua Fidhgeinte, décc.

Aois Criost, ocht cced a trí. An taenmhadh bliadhain décc dAodh.
Tomas, epscop scribhneoir, agus abb Linne Dóachaill, Faelghus, abb
Cille hAchaidh, décc. Finsneachta, mac Ceallaigh, rí Laighen, décc
i cCill dara. Cinaedh, mac Conchobhair, do mharbhadh i Maigh Cobha
la Cruithnibh. Slóighedh la Muirgheas,

mac Tomaltaigh go cConnachtaibh imme, do chongnamh la Conchobhar, mac
Donnchadha, mic Domhnaill, do mhilledh fear Midhe, co riachtatar tír
an aenaigh. Táinicc an rí, Aedh, dimdheghail fer Midhe, agus ro chuir
Conchubhar co na shochraide i raon madhma esti, amhail bataís minda agus
cethnata .i. caoiridh. Ro loisc iaramh an ro ba tairisi do Dhonnchadh
do chrich Midhe.

Aois Criost, ocht ccéd a cethair. An dara bliadhain décc dAodh Oirdnidhe.
Aodh, abb Glinne dá Locha, Maolfothartaigh, mac Flainn, abb
Findabhrach abhae, agus Cille monai, dég. Finbil, banabb Cluana
Brónaigh, agus Dunchu, abb Tealcha les, do mharbhadh. Cuchiaran,
prioir Cluana, dég, agus Baetan Cluana tuaisceirt. Iomairecc la
hUltoibh ettir dá mac Fiachna, agus ro sraínedh ria cCairell for
Eochaidh. Iomairecc eitir Ui cCeinnselaigh, i ttorcair Cellach, mac
Donnghaile. Iondradh nUladh la hAodh Oirdnidhe, las in righ, i
ndioghail sáraighthe Scríne Pádraicc for Dunchoin. Tene do thoiniudh
do nimh, las ro marbhadh daoine i nDerthoigh Aedhain.

Aois Criost, ocht ccéd a cúicc. An treas bhliadhain décc dAedh
Oirdnidhe. Caithnia, abb Doimhliacc, Tighernach, las ro fothaighedh
Daire Mele, abb Cille achaidh, Guaire, abb Glinne dá lacha, agus
Maoldúin, mac Donnghaile,

fertíghis Arda Macha, décc. Maolfothartaigh, .i. scríbhnídh, mac
Aedhghaile, abb Aireccail Dachiarog, dég. Anluan, mac Conchobhair,
tigherna Aidhne, dég. Tadhg agus Flaithnia, dá mhac Muirghesa, mic
Tomaltaigh, do mharbhadh la Luighnibh, agus fásughadh Luighne la
Muirghes ina ndioghail. Laoch do Luighnibh adrubairt:

Ro mharbh Muirghes mo mac sa, ba ro mhór ro dom tési,
As meisi imrubairt cailcc for braghaid Taidhg dar éisi.

Cathal, mac Fiachrach, tigherna Ratha airthir agus Fer ccúl, décc.
Gormghal, mac Dindaghaigh, abb Arda Macha agus Cluana heoais, décc.

Aois Criost, ocht ccéd a sé. An cethramhadh bliadhain décc dAodh
Oirdnidhe. Tuathghal, abb sruithe Cluana, Blathmac hUa Muirdheabhair,
abb Dearmaighe, Dimman Aradh, angcoire décc. Terbadh aighae oenaigh
Tailten dia Sathairn, co ná raacht each na carpat la hAedh, mac Neill,
.i. muintir Tamhlachtae do darorba tré sárúghadh tearmaind Tamhlachta
Maelruain do Uibh Néill. Do rat Aedh Oirdnidhe iaromh a noighriar do
mhuintir Tamhlachta, maille ré hascadhoibh ile. Is in mbliadhainsi
táinic an Cele dé don fhairrcce

a ndes cosaibh tiormaibh cen ethar idir, agus do berthea sduagh scriobhtha
do nimh dhó trias a ndénadh proicept do Ghaoidhelaibh, agus do beirthí suas
dorídhisi í an tan tairccedh an procepht. No teighedh an mac eccailsi cech
laoi dars an fhairrge fodhes iar ttairccsin an phroicepta. As innte dna
do righnedh fuil do na bairghenuibh, agus no shiledh an fhuil eistibh occa
tteshccadh. As innte bheos no chantaois na heóin an chantain dhaonda.
Admoer, inghen Aedha Laighen, décc ina sendatai iar ndeighbhethaidh.
Connmach, mac Duibhdaleithe, abb Arda Macha, do écc go hopann.

Aois Criost, ocht ccéd a seacht. An cúicceadh bliadhain décc dAodh
Oirdnidhe. Flann, mac Ceallaigh, abb Fionnghlaisi, scribhneóir,
angcoire, agus epscop, dég. Eochaidh, epscop agus angcoire,
comharba, Maelruain Tamhlachta, Cobhthach, abb Saighre, Cathasach, mac
Aodha, prióir Arda Macha, agus abb ceall niomdha ele, agus
Flaithbhertach, mac Coirpre, abb Cille móire Emhir, décc. Abel
Berchi dég. Eochaidh, mac Fiachna, mic Aedha Róin, rí Uladh, agus
Caireall, a bhrathair, do thabhairt catha diaroile, gur ro meabhaidh for
Eochaidh. Flann, mac Conghalaigh, tigherna Ciannachta, Aodh Róin
tigherna Corca Baiscind, décc. Ar lá fiora Umhaill for allmhurachaibh.
Ar la hallmhurachaibh for Chonmaicnibh. Ar Calraighe Luirg la hUibh
Briúin. Ar la hUibh mic Uais for Corcaroidhe Midhe. Ar la Cobhthach
mac Mailedúin, tighearna Locha Léin, for allmhurachaibh. Cosgrach, mac
Niallghusa, tigherna Garbhruis, agus Cernach,

mac Flaithnia tigherna, Mughdorn mBreacch, dég. Torbach, mac Gormáin,
scríbhnidh, leghthóir, agus abb Arda Macha esidhe décc. Do Chenel
Torbaigh, .i. O Ceallaigh Breagh; agus ro ba dibhsidhe Conn na mbocht
ro baí hi cCluain mic Nóis, agus as aire atbeirthi Conn na mbocht
fris, ar a mhéd do bhochtaibh no biathadh do ghrés.

Aois Criost, ocht ccéd a hocht. An seisedh bliadhain décc dAodh.
Conall, mac Daimhthigh, abb Treoit, Ceallach, mac Eachdach, abb Cille
Toma, Feradhach, mac Scandail, scribhneoir agus abb Achaidh bo Cainnigh,
agus Conghaltach, mac Etguini, prióir Cluana Fearta, décc. Dunlaing,
mac Flannchadha, tighearna Ua nEathach décc. Iomaireacc etir fiora
Umhaill agus allmhuraigh, in ro ládh ár ffer nUmaill, agus i ttorchair
Cosccrach mac Flainnabhrat, agus Dúnadhach, tigherna Umhaill.
Toictheach Ua Tighernaigh .i. ó Thir Iomchlair, abb Arda macha, do
écc.

Aois Criost, ocht cced a naoi. An seachtmadh bliadhain décc dAodh.
Etirscél, mac Ceallaigh, epscop agus abb Glinne dá locha, Fedhilmidh,
abb Cille Moinne, angcoire agus scribhneóir derscaighthe, Foircheallach
Fobhair, abb Cluana mic Nóis, do Ghaileangaibh moraibh dhó,
Orthanach, abb Cille Foibrigh, Cionaodh, mac Ceallaigh, epscop agus
airchindeach Trelecc, Feradhach, abb Saighre, Maoldúin, epscop
agus airchindeach Eachdromma, Blathmac, mac Aolgusa, abb Tíre da ghlas,
Ronan Ua Lochdeirc epscop, Blathmac, dalta Colgan, abb Innsi bó
finne, agus Suibhne, mac Maonaigh, fertighis Sláine, dég. Tuathal,
mac

Dubhtae, scribhneóir, egnaidh, agus doctor Cluana mic Nois, agus
Boelgaile Achaidh úir, décc. Broean, mac Ruadhrach, tréanfher
Laighen, Niall, mac Aedha, tigherna Ua Corbmaic, décc. Bruadar,
tighearna Ua Fidgeinte, dég.

Aois Criost, ocht ccéd a deich. An tochtmhadh bliadhain décc dAodh
Oirdnidhe. Ceallach, mac Conghaile, abb Iae Cholaim Chille,
Concobhar, abb Saighre, Cele íosa, abb Cille Móinne, Maolcanaigh,
angcoire Lughmhaidh, Cathasach, abb Cille Ite, Gormlaith, inghen
Fhlaithnath, banabb Cluana Bronaigh, agus Muirghes, mac Tomaltaigh
athair Thaidhg mhóir, ri Connacht, ri Connacht, décc. Colman,
mac Néill, do mharbhadh la Cenel cConaill. Cath la hAodh iaramh for
Cenel Conaill, i ttorchair Rogheallach mac Flaithghesa. Orgain Cluana
cremha, agus guin daeine indi dfearaibh Breifne, agus do Síol cCathail.
Conall, mac Néill, tighearna desceart Breagh, décc. Focharta, mac
Cearnaigh lethtoiseach deisceirt Bregh, décc. Nuadha, abb Arda Macha
do dhol go Connachtaibh. Sluacchadh la hAedh nOirdnidhe for Cenel
cConaill dia ndorcair Roghallach, mac Flaithiusa.

Aois Criost, ocht ccéd a haondécc. An nomhadh bliadhain décc dAodh.

Suibhne, mac Cuanach, abb Cluana mic Nóis, do hUibh Briúin Seola
dó, agus Ioseph, scribhneoir Rossa Commáin, décc. Ceallach, mac
Muirghiusa, abb Droma caradh décc. Cluain mic Nois do losccadh.
Iar triochaitt laithe iaramh ro sraoineadh ria nDiarmaid, mac Tomaltaigh,
for Uibh Fiachrach Muirisce. Ro loiscceadh agus ro haircceadh Foibhrén
i crich Graicrighe, agus ro marbhait sochaidhe ann. Tuathal, mac
Domhnaill, tigherna Airthir Liffe, Dunghal, mac Cuanach, tigherna Fer
Rois, Iorghalach, mac Maolumha, tigherna Corca Soghain, Nuadha
Locha hUamha, epscop, ancoire, agus abb Arda Macha, dég.

Aois Criost, ocht ccéd a dó décc. An fichetmhadh bliadhain dAodh.
Tiobraite, mac Cethernaigh, abb Cluana fearta Brénainn, Maoltuile, abb
Bennchair, Condmhach, mac Donait, abb Corcaighe, Cumasgach, mac
Cernaigh, fertighis Arda Macha décc. Dertheach Fobhair do losccadh.
Cathal, mac

Artrach, tigherna Mughdhorn, Maoldúin, tigherna Fer Rois, Gormghal,
tigherna Maighe hIotha, Dunghal, tighearna Arda Ciannachta, agus
Cathal, mac Ailella, tighearna Ua fFiachrach, dég. Cath eitir fiora
desceirt Bregh agus Ciannachta, i torcratar ile do Ciannachtaibh.

Aois Criost, ocht ccéd a trí décc. An taonmhadh bliadhain fichet dAodh.
Maoldúin, mac Cinnfaoladh, epscop Ratha bhoth, Cucruithne, comharba
Columain Ela, agus Siadhal, abb agus epscop Rosa Commain, décc.
Ainbhcheallach, mac Daelghusa, tigherna Ua Fothaidh tíre,
décc. Muireadhach, mac Brain, lethri Laighen, décc.

Aois Criost, ocht ccéd a cethair décc. An dara bliadhain fichet dAodh
Oirdnidhe. Indrechtach, epscop Cille mic Duach, Fergus Rátha
Lúiricch, abb Fionnghlaisi, Cilleni, abb Ferna, Duibhinsi
sgribhneóir Cluana mic Nóis, Cumusccach, mac Cernaigh, fertighis Arda
Macha, agus Ailbhe Cinnmara, dég. Cúchoingealta, mac Cathail,
tighearna Laighean Deasgabhair, décc.

Aois Criost, ocht ccéd a cúicc décc. An treas bhliadain fichet dAodh.
Reachtabhra Ua hAndola, abb Daimhinsi, décc. Aodh Oirdnidhe,
rí Ereann, do dhul co sluaiccheadh lán mhór co Dún Cuar doridhisi,
co ro rann Laighniu eidir dá Ua Brain. Aighreadh anaigeanta agus
sneachta mór isin mbliadhain so, ó Nottlaic co hInit.

Aois Criost, ocht ccéd a sé décc. An cethramhadh bliadhain fichet dAodh.
Airbhertach Cille dara, agus Dioma, mac Fianghusa, abb Rossa Cré,
décc. Mac Lachtna, tigherna Ciarraighe Luachra, dég. Iomairecc
Ratha Fearadh ria

ttoiseachaibh Ua mBriúin, Diarmuid, mac Tomaltaigh, agus Maolcothaigh,
mac Fogartaich, for tigherna Ua Maine, Cathal, mac Murchadha, occ
Dealbhna Nuadhat, eitir Suca agus Sionainn, airm a ttorchair Cathal,
agus araile saerchlanna imaille fris. Iomaireacc eitir Ultaibh féisin, in
ro marbhadh Caireall, mac Fiachna, ri Uladh, la Muireadhach mac
Eachdhach. Diarmaid, abb Iae Coluim Cille, do dhul i nAlbain.

Aois Criost, ocht ccéd a seacht décc. Reachtabhra Ua Muichtighern,
eagnaidh agus abb Imleacha Iubhair, Muireadhach, mac Crunnmhaoil, abb
Dísirt Ternócc, Crunnmhael, mac Ailella, comharba Cianáin Doimhliacc,
Laisrén Chille dara, Crundmael Tighe Munda, agus Condmhach Ua Cathail,
egnaidh Cluana ferta Brénainn, dég. Fásucchadh criche Cualann agus
Laighin go Glend dá locha, las in righ, la hAodh Oirdnidhe.
Iomaireacc etir Cenel Conaill agus Cenel nEoghain, in ro marbhadh
Maolbresail, mac Murchadha, tighearna Ceneoil cConaill, la
Murchadh mac Maeldúin. Cathal, mac Dunlaing, tigherna Ua cCeinnsealaigh
décc. Conghalach, mac Ferghaile, tigherna Fer cCúl, dég. Iar mbeith
cúig bliadhna fichet i nairdrighe na hEreann dAodh Oirdnidhe, mac
Néill Frasaigh, atbath ag Ath dá fhearta, i Muigh Conaille, iar
mbuaidh naithrighe. Airtri, mac Conchobhair, co scrín Patraicc do
dhol hi cConnachtaibh. Indreadh Laighen la hAedh nOirdnidhe
.i. tír Chualand go Glend dá lacha.

Aois Criost, ocht ccéd a hocht décc. An chéd bhliadain do Chonchobhar,
mac Donnchadha, mic Domhnaill, ós Erinn hi righe. Maeltuile, abb
Bendchair,

Crundmhael, mac Odhrain, abb Cluana hIoraird; agus Dálach, mac Congusa,
comharba Cianáin Doimhliacc, décc. Sloighedh la Murchadh, mac
Maoiledúin, do Druim Indech go nUibh Néill an tuaisceirt immaille
fris. Táinic Conchobhar, righ Ereann, co nUibh Néill an deisceirt
a ndes, agus co Laighnibh don leith oile, agus iar rochtain co haon
mhaighin dóibh táinic, do mhiorbhailibh Dé, go ro sgarsat fria roile an
tan sin gan fhuiliucchadh gan foirdheargadh ó neach díbh for aroile.

Aois Criost, ocht ccéd a naoi décc. An dara bliadhain do Chonchobhar.
Cennfaoladh, mac Ruamain, scribhneóir, epscop, angcoire, agus abb
Atha Truim, agus Flann Dairinsi décc. Orgain Edair la Gallaibh,
agus broid mhór do mhnáibh do bhreith leo. Orgain Becc-Ereann, agus
Dairinsi Caomháin leo doridhisi. Slóigheadh la Conchubhar, mac
Donnchadha, co hArdachaidh Sleibhe Fuait, go ro fásaighedh na
hAirthera uile lais go riacht Eamhain Macha.

Aois Criost, ocht ccéd a fiche. An treas bhliadhain do Chonchobhar.
Mac Riaghail Ua Maglena, scribhneóir, epscop, agus abb Biorair,
Laithbheartach, mac Aenghasa, epscop, Cluana ferta Brenainn, Eocha Ua
Tuathail, angcoire, epscop, agus abb Lughmhaidh, Olcobhar, mac
Cummusccaigh, abb Cluana fearta Brénoinn, Forbhasach, abb Achaidh bó
Cainnigh, agus Aildeabhair Cille manach, décc. Slóighedh la Murchadh,
mac Maoiledúin, co bfhearaibh ind Fochla imme, co ráinic Ard mBreacáin.
Ro elaidhseat iaramh fir Bregh agus Síol Aodha Sláine cuige, co ro
ghiallsat dó acc Druim Ferghasa. Cumasccach, mac

Tuathail, tighearna Airde Ciannachta, do mharbhadh la Murchadh.
Raoinedh for fhiora Airde Ciannachta, hi cath Cairn Conáin, ria
cComasccach, mac Conghalaigh, in ro marbhadh Eodhos, mac Tighearnaigh,
agus sochaidhe oile ar aon ris. Raoinedh ria nAoibh Garbhan agus Cuircne
for Delbhnae. Orgain Insi Doimhle, agus Corcaighe la Gallaibh.

Aois Criost, ocht ccéd fiche a haon. An cethramhadh bliadhain do
Chonchobhar. Diarmait, mac Donnchadha, abb Roiss each, Dubhdáchrioch
mac Maoiletuile, abb Chille achaidh, Muiredhach, mac Ceallaigh, abb
Chille dara, Seachnusach Locha Cendin, epscop agus ancoiri, Cucaech,
abb Cluana hUamha, Forbhasach, comharba Bairre Corcaighe, Sealbhach
Insi Pích, agus Conghal, mac Iorghalaigh, prioir Cluana mic Nois, dég.
Fineachta, mac Badhbhchadha, tighearna na nDéisi, dég. Fearghal, mac
Catharnaicch, tigherna Locha Riach, décc. Conaing, mac Congail,
tighearna, Teathbha, dég. Aithrigheadh Murchadha, mic Maoiledúin, la
Niall Caille, mac Aedha Oirdnidhe, la Cenel nEoghain.

Aois Criost, ocht ccéd fiche a dó. An cúicceadh bliadhain do Chonchubhar
san righe. Muireadhach, mac Ceallaigh, abb Conlaedh décc. Orgain
Beannchair la Gallaibh, agus cosccradh a derthaighe, agus relcci
Comhghaill do chrothadh as an sgrín ina rabhsat, amhail ro thairngir
Comghall féisin, dia nebairt:

Bidh fír, fír, do dheoin áirdrigh na rígh,
Berthor mo cnámha gan crón, ó Bheandchuir bagha do Eantrobh.

Niall, mac Feargusa, tighearna Ua Forannáin, décc. Iomaireacc
Fionnabhrach eitir fhiora Tethbha féisin, in ro marbhadh Aodh, mac
Foghartaigh, agus aroile sochaidhe. Eochaidh, mac Bresail, tigherna Dail
Araidhe an tuaisceirt, do mharbhadh la a mhuintir féisin. Spealán, mac
Sloighedhaigh, tigherna Conailli Muirtheimhne, décc. Tighearnach, mac
Cathmogha, tigherna Aidhne, agus Fionnaccán, mac Cosccraigh, tigherna
Breaghmhaine, dég. Lex Pátraicc for Mumhain la Felim, mac
Criomhthainn, agus la hAirtri, mac Conchobhair, .i. epscop Arda Macha.

Aois Criost, ocht ccéd fiche a trí. An seiseadh bliadhain do Chonchubhar.
Cuana Lughmhaidh, eagnaidh agus epscop, Diarmuid Ua Aodha Róin,
angcoire agus dochtuir derscaighthe esidhe, Cuimnech, abb Fionnghlaisi,
Aodhan, abb Tamhlachta Maeleruain, Suibhne, mac Fergasa, abb Dúin
Lethglaisi, angcoiri, agus epscop, Flannabhra, abb Maighe bile, Colman
mac Ailealla, abb Slaine agus ecclas oile ar chena isin fFrainc agus
i nErinn, Maelrubha, angcoire, epscop agus

abb Aird Breacáin, Flann, mac Foircheallaigh, abb Lis móir, décc.
Fearghal, mac Cathrandaigh, tighearna Locha Riach dég. Aengus mac
Maoiledúin, tigherna Locha Gabhar, décc. Blathmac, mac Flainn, do
ghabháil coróna mairtir, uair do marbhadh somh la Galloibh in hI Coluim
Cille. Dún da lethghlais dorgain la Galloibh. Losccadh Maighe bile
co na dearthaigibh leo bheós, agus orgain Insi Doimhle. Roinedh i
Muighinis ria n sic Ultoibh for Ghallaibh, du in ro marbhadh sochaidhe,
Raoineadh ria nGallaibh for Osraighibh. Maelbresail, mac Oilella Cobha,
tighearna Dail Araidhe, décc.

Aois Criost, ocht ccéd fiche a cethair. An seachtmhadh bliadhain do
Chonchobhar. Clemens epscop, abb Cluana hIoraird, Ruthmael, epscop
agus abb Cluana ferta Brénainn, décc. Condmhach, mac Saerghusa, abb
Ruis ailithir, Baethlocha, abb Biorair, décc. Maoldúin, mac
Gormghaili, tigherna Ua Méth, décc i ccléircheacht. Diarmuid, mac
Néill, tigherna deisceirt Bregh, Niall, mac Diarmada, tigherna Midhe,
décc. Art, mac Diarmada, tigherna Teathbha do mharbhadh. Losccadh
Dealbhna Bethra la Feidhlimidh, mac Criomhthainn. Lex Pattraicc
for teoraibh Connachtaibh la hAirtri, mac Concobhair, .i. epscop Arda
Macha.

Aois Criost, ocht ccéd fiche a cúig. An tochtmhadh bliadhain do
Chonchobhar. Echtgus, comharba Maeileruain Tamhlachta, décc.
Abnier, abb Cille hachaidh, décc. Maonach, mac Crunnmhaoil, prióir
Fer Rois, décc. Sárughadh Eoghain Mainistreach im phriomhaidhecht
Arda Macha, dia rochuir Cumusccach, mac Cathail, tigherna Airghiall
este cco haimhdheonach é, agus ro chuir Airtrí, mac Conchobhair mac
máthar esidhe do Cumusccach ina ionadh. Eoghan imorro, ferleighinn
Mainistreach, do righne an rann so, dia ro chuir a psailmchettlaigh
daccalaimh Néill Chaille, ar ba heisiumh ro banmchara do

Niall, im chomharbus Pádraicc do chosnamh dhó, óir ro ba nertmhar somh
.i. Niall ind Ultoibh:

Abair ré Niall ni madha, guth Eoghain, mic Anmchadha,
Ni biodh san righe i rabha, munab abb a anmchara.

Isé tra a chomair, tionóilidh Niall a shlógha .i. Conaill agus
Eoghain. Tionóilidh Cumusccach, tigherna Airghiall, agus
Muireadhach, mac Eathach, tigherna Ua Eathach Uladh, Airghialla agus
Ulaidh, agus fearthair cath crodha etorra, .i. cath Leithe caim, hi
Maigh Enir. As do thairngire in catha sin ro thiorchan Dachiarócc .i.
naomh a hAiriccul:

Lethi cam, do faethsat mór ngerat ann,
Tarrustar occ leith luin cidh cian, cidh cuin is cidh mall.

As do thairngire an chatha cédna adbert Becc, mac Dé:

Leithe cam, conricfad dias amhnus ann,
Bidh ri Eoghan ar Eoghan, ard an gleóghal bhias and.

Ro comhailleadh samhlaidh, ar do mheabhaidh for bhuidhnibh Ailigh ria
nAirghiallaibh isin dá lá toisigh, an treas lá imorro, dia ttáinic
Niall féisin is in cath oc Leithi Luin hi ccomhfoccus leithi caim ro
meabhaidh for Airgiallaibh, agus ro díóthaighit, agus ro lenta co Craibh
caille, ós Callainn, fri hArd Macha aniar, agus ro mheabhaidh an cath
for Ulltoibh agus Airghiallaibh, agus ro ladh a nár. Ro marbhadh ann
Cumusccach agus Conghalach, dá mac Cathail, agus araile saorchlanna do
Airghiallaibh. Ro ghabh iaromh Eoghan Mainisttreach ardcomharbus
Pádraicc fri ré naoi mbliadhan iar sin tré neart Neill chaille, etc.
Senoir do mhuintir Arda Macha atbert iar nár Airghiall hi ccath
Léithi caim:

Ní ma ruccsam ar mbáire, ní má lodmar sech léire,
Ní marggabhsam Eoghan sech cech ndeoraidh ind Ere.

Ríoghdhál occ Biorrae etir Conchubhar, mac Donnchadha, rí Ereann, agus
Fedhlimidh, .i. mac Criomhthainn, rí Mumhan. Flaithemh, mac
Donnghalaigh, tigherna an Fhochla, do mharbhadh. Corbmac, mac
Domhnaill, tigherna na nDéisi, décc. Luscca do orgain la Gallaibh.
Flannghas, mac Loingsigh, abb Arda Macha, décc. Coscradh aonaigh
Taillten for Gailengaibh, la Conchobhar, mac Donnchadha, dia ro
marbhadh sochaidhe. Coscradh aonaigh Colmain la Muiredhach for
Laighnibh Deasgabhair dú in ro marbhadh íle. Coscradh Dunaidh Laighean i
nDruim la Geintibh, du in ro marbhadh Conaing, mac Concongelt, tigherna
na fForthuath, co sochaidhibh ile.

Aois Criost, ocht ccéd fiche asé. An nomhadh bliadhain do
Chonchobhar. Aodh, mac Ceallaigh, abb Cille dara, Robhartach, mac
Cathusaigh, airchindeach Cluana móir arda, Condmhach Ua Lochéne, abb
Saighre, Muirchiu, abb Droma inesclainn, Ciarán, eccnaidh ó Ros Cré,
agus Clemens, abb Linne Duachaill, décc. Martra Themhnen angcoire
la Gallaibh. Cathshraoineadh for Gallaibh ria cCoirpri, mac Cathail,
tighearna Ua cCeinnsealaigh. Cathraoinedh ria

Lethlobhar, mac Loingsich, rí Uladh, for Ghallaibh. Muiredhach, mac
Ruadhrach, rí Laighean, décc. Cionaedh, mac Moghróin, tigherna
Ua fFailghe, décc. Huada, mac Diarmada, tigherna Teabhtha, do
mharbhadh.

Aois Criost, ocht ccéd fiche a seacht. An deachmhadh bliadhain do
Chonchobhar. Maoldobharchon, abb Cille Uasaille, Corbmac, mac
Muirghesa, abb Sentruibh, Maolumha, mac Cethernaigh, prioir
Fionnabhrach, Aedhan Ua Condumhai, sccribhneoir Dermhaighi, Cerbhall,
mac Fionnachta, tigherna Delbhna Beathra, décc. Drugan, mac
Taidhg, tigherna Ua Méith, décc.

Aois Criost, ocht ccéd fiche a hocht. An taonmhadh bliadhain décc, do
Chonchobhar. Corbmac, mac Suibhne, abb Cluano hIorraird, scribhneoir
agus epscop, Tipraite mac Rechtabhrat, abb Cluana Dolcáin, Ioseph, mac
Nechtain, abb Rois Commáin, Siadhal, mac Feradhaigh, abb
Cille dari, Cailti, mac Eirc, abb Fedha dúin, Ceallach,
mac Condhmhaigh, angcoire Disirt Ceallaigh, Muiriuccán Cille dara,
Aongus, mac Donnchadha, tigherna Tealcha Midhe, décc.
Fionnsneachta, mac Bodhbhchadha, tighearna Ceneoil mic Earca,
décc. Dunchadh, mac Conaing, tigherna Ciannachta, dég.
Follumhain, mac Donnchadha, do mharbhadh la Muimhneachaibh.

Aois Criost, ocht ccéd fiche anaoi. An dara bliadhain décc do
Chonchobhar. Airmedhach, comharba Findein Maighe bile, do
bháthadh. Muirend banab Cille dara, décc. Ceithernach,
mac Dunchon, scribhneóir, saccart, agus

eccnaidh Arda Macha, dég. Ionnradh Conaille la Gallaibh co ra gabhabh
Maolbrigdhe an rí, agus Canannan a bhrathair, agus ruccsat leo iad
dochum a long. Suibhne mac Fairnigh, abb Arda Macha fri ré dá
mhís, do écc. Feidhlimidh, mac Criomhthainn, co slogh Mumhan agus
Laighen, do thocht co Fionnabhair Bregh, do iondradh fhear mBreagh,
agus indreadh Life la Concobhar, mac Donnchadha, lá rí Ereann.

Aois Criost, ocht ccéd triocha. An treas bhliadhain décc do Chonchobhar.
Cédna orgain Arda Macha. Ard Macha do orgain fo thrí i naoin mhí la
Gallaibh, agus ní ro hoirgedh la heachtarchenela riamh go sin. Orgain
Daimhliacc Chianáin, agus fine Chiannachta, co na cceallaibh uile,
la Gallaibh. Oilill, mac Colgan, do erghabhail leo dna. Orgain Lughmhaidh,
agus Mucshnamha, agus Ua Meith, agus Droma mic hUa Blae, agus aroile
cealla archena leó beos. Tuathal, mac Feradhaigh, do bhreith do
Ghallaibh leo, agus scrín Adhamhnáin ó Domhnach maighen.

Aois Criost, ocht ccéd triocha a haen. An cethramhadh bliadhain décc do
Chonchobhar. Reachtghal, mac Suibhne, saccart Arda Macha,
décc. Orgain Rátha Lúirigh, agus Condire ó Ghallaibh. Orgain
Lis móir Mochuda. Losccadh

termainn Ciaráin lá Féidhlimidh, mac Criomhthainn. Indredh
Dealbhna Bethra fo trí lais bheós. Indredh Cille dara la
Cellach mac Brain. Cionaedh, mac Eathach, tigherna
Dail Araidhe an Tuaisceirt do mharbhadh. Cionaedh, mac
Arthrach, tigherna Cualann, agus Diarmuid, mac Ruadhrach,
tigherna Airthir Life, décc. Iar mbeith ceithri bliadhna décc i
nairdrighe na hEireand do Chonchobhar, mac Donnchadha, mic
Domhnaill, adbáth iar mbuaidh naithricche.

Aois Criost, ocht ccéd triocha a dó. An chéd bhliadhain do
Niall Chaille, mac Aedha Oirdnidhe, hi ricche
ós Eirinn. Reachtabhra, abb Chille achaidh, agus Iorghalach,
abb Saighre, décc. Raeineadh ria Niall cCaille agus ria Murchadh
for Ghalluibh, hi nDoire Chalgaigh, co ro ládh a nár.
Orgain Cluana Dolcain do Ghallaibh. Drong mór do mhuinntir
Cluana mic Nóis do mharbhadh lá Feidhlimidh, mac Criomhthainn, ri
Caisil, agus ro loiscceadh a ttermonn uile lais go doras a cille.
Fa énchuma muintire Dermaighe lais dna, fon ccuma cettna co doras a cille.
Diarmait, mac Tomaltaigh, rí Connacht, décc. Cobhthach, mac
Maeledúin, tigherna Iarmumhan, do mharbhadh. Orgain Locha Bricrenn

for Conghalach, mac Eachdach, agus a erghabhail, agus a mharbhadh occá
longaibh iaramh. Airtri, mac Conchobhair, abb Arda Macha, do
écc. Bráthair do rígh Oirghiall esidhén. Ruaidhri, mac
Maoilefothartaigh, lethtaoiseach Ua cCriomhthainn, décc.

Aois Criost, ocht ccéd triocha a trí. An dara bliadhain do
Niall Caille. Tuathchar, espucc agus scribhneoir Cille dara,
Affraic, banabb Cille dara, Dunlaing, abb Corcaighe, agus
Ceallach, mac Finnachta, abb Cille Ite, décc. Ceallach,
mac Brain, rí Laighen, décc. Cionaedh, mac Conaing, tigherna
Bregh, agus Diarmait, mac Conaing, tigherna Tethbha, décc. Cath for
Gallaibh ria nDunadhach, mac Scannláin, tigherna Ua Fidhgeinte, du i
ttorchrattar ile. Orgain Glinne dá locha, Sláine, agus Fionnabhrach
abhae la Gallaibh. Dunadhach, mac Scannláin, tigherna Gabhra,
décc. Suibhne, mac Artrach, tigherna Mughdhorn, do
mharbhadh la a chenél féisin. Conghalach, mac Aenghusa, tigherna
Cheneoil Laoghaire, décc. Eoghan Mainistreach, abb
Arda Macha agus Cluana hEraird, do écc.

Aois Criost, ocht ccéd tricha a cethair. An treas bhliadhain do Niall.
Breasal, mac Corbmaic, airchindech, .i. abb Cille Dumha agus ceall
naile, décc. Aodhagan, mac Torbaigh, abb
Lucchmhaidh, décc ina ailethre hi cCluain mic Nóis. Eoghan,
mac Aedhagáin, ro ansidhe hi cCluain mic Nóis, conadh
uadha ro chinset Meic Cuinn na mbocht innte. Cumusgach, mac
Aengusa, prióir Cluana mic Nóis, décc. Caoncomhrach, mac
Siadhail fertighis Cille dara, décc.

Slóighedh la Niall Caille, lá righ Ereann, co Laighniu, co ro ordaigh
rí forro .i. Bran mac Faeláin, agus do bert a réir. Indredh Midhe la
Niall Caille, co ro loisceadh lais co tegh Maelconoc, tigherna
Dealbhna Bethra i mBodhammair. Orgain Fearna, agus
Cluana móir Maedhócc, agus Droma hIng la
Gallaibh. Losccadh Mungairdi agus araile ceallu i nUrmhumhain leo din.
Fearghus, mac Badhbhcadha, tigherna Cairrge Brachaidhe, do mharbhadh la
Muimhneachaibh. Dúnadhach, mac Scannláin, tigherna Ua Fidhgeinte, décc.
Eochaidh, mac Concongalta, tigherna Ua Tuirtre, décc. Ergabháil
Cairpre, mic Cathail, tigherna Laighen Desgabhair. Sárucchadh
Cluana mic Nóis do Cathal, mac Ailella, tigherna Ua Maine, for Fhlann,
mac Flaithbhertaigh, dUíbh Forggo, prioir a Mumhain, con do tard isin
Sionainn, co ndorchair. Dlighedh vii. ceall do Chiarán agus mainchine
mór. Maidhm ria cCathal, mac Ailealla, for Fedhlimidh, mac
Criomhthainn, ri Caisil, hi Maigh ní, bhail in ro marbhait sochaidhe,
conadh dó ro ráidheadh:

Roptar trén Connachta, hi Maigh ní niptar fanna,
Abradh nech re Feidhlimidh, cid dia ttá Loch na calla.

Caemhclúdh abbadh i nArd Macha .i. Forandán ó Raith mic Malais i
nionadh Diarmatta Uí Tighernaigh.

Aois Criost, ocht ccéd triocha a cúicc. An cethramhadh bliadhain do
Niall. Forbhasach, epscop agus angcoire Lusca, Suibhne,
mac Ioseph, abb Glinne da locha décc. Ceallach,
mac Forbhasaigh, airchinneach Rosa Commáin, do
mharbhadh. Saorghas Ua Cionaedha, abb Dearmhaighe, Fiachra, mac
Duibhdáchríoch, abb Cluana foda Liobrain, agus Robhartach,
mac Maeluidhir, abb Achaidh bó Cainnigh, décc. Dunlang,
mac Cathusaigh, comharba Barra Corcaighe, décc. Gabhail dertaicche
Cille dara for Forannán, abbadh Arda Macha, co samhadh Padraicc
archena, la Fedhlimidh, mac Criomhthainn, co cath agus iodhna, agus ro
gabhadh na cléirigh leis co na numhalóit. Cluain mhór Maedhocc
do losccadh oidhche Nodlacc la Gallaibh, agus sochaidhe mór do
mharbhadh leo, amaille lé braighdibh iomdhaibh do bhreith leo. Derthech
Glinne da locha do losccadh leó dna. Crioch Connacht uile do
diothláithriughadh leó mar an ccédna. Meas mór etir chnó mheas agus
dair mhes, agus ro iadh glaisi co ro ansat do riuth. Ceall dara do orgain
do Ghallaibh Inbhir Deaa, agus do loisccedh leth na cille leo. Cairbre,
mac Maoiledúin, tigherna Locha gabhar, do mharbhadh la Maolcernaigh.
Diarmaitt do dol go Connachtaibh le lex Pattraicc. Gofraidh,
mac Ferghusa, toiseach Oirghiall do imthecht go hAlbain do nertughadh
Dhail Riada, tré fhorchongradh Chionathe mic Ailpin.

Aois Criost, ocht ccéd triocha asé. An cúigeadh bliadhain do
Niall Chaille. Flaithri, abb Mainisdrech Buithe,
epscop agus angcoire, Fedach, abb Cille Delcce, agus
Martain, epscop Cluana caoin, décc. Raoinedh for
Muimhneachaibh ria Cathal, mac Muirghiusa. Cathal, mac Muirgheasa, mic
Tomaltaigh, rí Connacht, décc iaromh. Riagan, mac Finnachta, lethrí
Laighen, décc. Maeldúin, mac Sechnusaigh, tigherna Fer cCúl, décc.
Duibhlitir Odhar ó Temhraigh do ergabhail do Gallaibh, agus
bás cuimhrigh do imbirt fair ina longaibh iaromh, co ndorchair leó.
Cobhlach trí fichit long do Nortmannibh for Bóinn. Lucht trí fichit
long oile for abhainn Liphthe. Ro airgset agus ro ionnraisset an dá
mhór chobhlach sin Magh Liphthe, agus Magh Bregh, eitir cealla agus
congbhala, daoine agus deighthrebha, crodh agus cethra. Raeinedh ria
bfearaibh Bregh for Ghallaibh i Mugdhornaibh Bregh, co ttorchrattar
sé fichitt do Ghallaibh isin ngleo sin. Cathshraoinedh ria nGallaibh
oc Inbhear na mbarc for Uibh Néill ó Sionainn

co muir, dú in ro ládh ár nat rairmhedh riamh, acht nama ternaiset na riogha
agus na ruirigh, na triatha agus na toisecha gan airleach gan athchuma.
Cealla Locha hEirne do dhílgent la Gallaibh im Cluain Eoais, agus im
Daimhinis, etc. Cealla Laichteine, Inis Cealtra, agus Cill Finnche,
do losccadh la Gallaibh. Indredh Ceniuil Coirpre Cruim la Feidhlimidh,
mac Criomhthainn. Saxolbh, toiseach na nGall, do mharbhadh la
Ciannachtaibh. Ar for Ghallaibh occ Eas Ruaidh. Ar forra ag Carn
Feradhaigh. Maidhm na bFearta ria nGallaibh. Céd ghabháil Atha
cliath lá Gallaibh.

Aois Criost, ocht ccéd triocha a seacht. An seiseadh bliadhain do
Niall. S. Dochata, naomh epscop agus angcoire, do fhorbadh a
dheighbhetha isin cenntur cco ro fhaoidh a spiorat do chum nimhe.
Corbmac, epscop agus scribhnidh Cille Foibhrich, dég. Tighernach, mac
Aedha, ab Fionnabhrach abha agus ceall naile, décc. Egnech Cille
Delcce, epscop, abb, agus scribhneóir, do mharbhadh co na mhuintir la
Gailengaibh. Bran Fionnghlaisi, epscop agus scribhnidh, dég.
Ceallach, mac Coirpre, abb Atha Truim, décc. Ruaidhri, mac
Donnchadha, prioir Cluana hIoraird, agus abb cheall noile archena
décc. Domhnall, mac Aedha, abb Droma Urchaille, décc. Ceallach,
mac Cosgraigh, abb Aireccail Ciarócc. Rioghdhál mhór hi cCluain
Conaire Tomáin, eitir Niall Caille, agus Feidhlimidh, mac

Criomhthainn. Maelcrón, mac Cobhthaigh, tigherna Locha Léin, décc.
Sraoinedh ria ngeintibh for Connachtaibh, in ro marbhadh Maoldúin, mac
Muirghesa, mic Tomaltaigh, co sochaidhibh amaille fris. Bran,
mac Faeláin, ó ráiter Uí Faoláin, rí Laighen, décc. Conghalach,
mac Maonaigh, tigherna Ua Mic Uais Bregh, décc.

Aois Criost, ocht ccéd triocha a hocht. An seachtmhadh bliadhain do
Niall. Maolgaimhridh, sgribhneóir toghaidhe, angcoire, agus abb
Bennchair, Aiden, prióir Cluana mic Nóis, agus abb Rosa Cré, Colmán,
mac Robhartaigh, abb Sláine, Maolruanaidh, mac
Cathail, secnabb Luscan, Corbmac, mac Conaill, abb
Treoit, agus Reachtabhra, abb Léith Mochaomhócc, décc. Muiredhach,
mac Eathach, mic Fiachach, rí coiccidh Conchobhair, do mharbhadh la a
bhráithribh, Aedh agus Aenghas, co sochaidhibh oile cenmothasomh.
Aodh, mac Eathach, do mharbhadh la Madadhan, mac Muireadhaigh. Ro
ghabhsat murchobhlach do Ghallaibh for Loch Eathach. Ro hurtha agus
ro hairgthe tuatha agus cealla tuaisceirt Ereann leó. Losccadh Fearna
agus Corcaighe móire lá Gallaibh. Commusgach, mac Conghalaigh,
tigherna Ciannachta, décc. Cinnéididh, mac Conghalaigh, tighearna
Ua Mic Uais, do mharbhadh la a bhráthairibh. Caemhchlúdh abbadh i
nArd Macha, .i. Diarmaitt Ua Tighernaigh i nionadh Fhorandáin ó
Ráith mic Maluis.

Aois Criost, ocht ccéd triocha anaoi. An tochtmhadh bliadhain do
Niall. Ioseph Rois móir, epscop agus scribhneóir dearscaighte, abb
Cluana heoais agus

ceall naile, décc. Orthanach, epscop Cille dara, Airmedhach, abb
Rossa hailithir, Crunnmhaol, prióir Dermhaighe, Maeltuile
Leithghlinne, Airechtach Chille manach, agus Berichtir Tulcha
léis décc 6 December. Innredh Fer cceall, agus Dealbhna Eathra la
Niall Caille. Orgain Lughmhaidh la Gallaibh Locha hEathach, agus ro
ghabhsat braighde iomdha despuccoibh agus do dhaoinibh eaccnaidhe
foghlamtha, agus ruccsat iatt do chom a longphort iar marbhadh sochaidhe oile
leó bheós. Murchadh, mac Aedha, rí Connacht, décc. Dubhdábharc,
tigherna Desmhumhan, décc. Cionaedh, mac Cosccraigh, tigherna
Breghmhaine i Tethbha décc. Losccadh Arda Macha co na derthaighibh,
agus co na daimhliacc, las na Gallaibh reimhráite. Fedhlimidh, mac
Criomhthainn, rí Mumhan, do indreadh Midhe agus Bregh, co ndeisidh
i Temhraigh, iar ngabháil giall Connacht i naon ló, conadh do
sin ro ráidh Ceallach, mac Cumasgaigh:

As é Fedhlimidh an rí, dianidh obair aon láithi,
Etrighi Connacht gan cath, acus Midhe do mhandradh.

Aois Criost, ocht ccéd cethracha. An nomhadh bliadhain do Niall.
Maoldiothraibh, angcoire agus egnaidh Tire dá ghlas, dég. Longphort acc
Linn Duachaill la Gallaibh, as ro hurtha agus ro hairgthe tuatha agus
cealla Teathbha. Longport oile ag Duibhlinn, as ro hurtha Laighin
agus hUí Néill, etir tuatha agus cealla, co Sliabh Bladhma. Slóighedh
la Feidhlimidh co Carmain. Slóighedh la Niall ar a chenn co Magh
nochtair.

Bachall Fedhlimidh fighligh forragbaidh is na droighnigh,
Dus fucc Niall co neart uatha, a ceart an catha cloidhmhigh.

Orgain Cluana heidhnech, agus dilgend Cluana hIoraird agus
Cille hachaidh Drumatai, la Gallaibh. Sraoineadh for Maolruanaidh, mac
Donnchadha, .i. athair Mhaoilechloinn an righ, la Diarmuid, mac
Conchobhair, agus Diarmaitt do mharbhadh la Maelseachlainn isin ló
chédna.

Aois Criost, ocht ccéd cethracha a haen. An dechmhadh bliadhain do
Niall. Caomhán, abb Linne Duachaill, do mharbhadh,
agus do losccadh la Gallaibh. Ceallach, mac Caithgheinn,
abb Droma móir lá hUibh Eachdach, décc. Suibhne Ua Teimnén,
abb Glinne dá locha, décc. Fineachta, mac Bresail, abb Chille
dumha, Comsudh, mac Ruamlusa, abb Domhnaigh Seachnaill, Morán, mac
Indrechtaigh, abb Clochair mic nDaimeni, agus Muiredhach, mac
Cernaigh, fertighis Arda macha, décc. Orgain Cluana mic Nois la
Gallaibh Linne Duachaille. Orgain Dísirt Diarmada la Gallaibh
Chaoil uiscce. Orgain Biorra agus Saighre la Gallaibh Bóinne.
Longas Nortmaoinorum for Bóinn occ Linn Rois. Longus oile
díobh occ Linn Saileach la hUlta. Longus oile díobh occ
Linn Duachaill. Dunghal, mac Fearghaile, tighearna Osraighe,
décc. Mughróin,

mac Aenghusa, tighearna Ua fFailghe, décc. Maoldúin, mac Conaill,
tigherna Calatroma, do erghabhail do Gallaibh.

Aois Criost, ocht ccéd cethracha a dó. An taonmhadh bliadhain décc do
Niall. Dodiu, epscop Biorra, décc. Cumsudh, mac Derero, agus
Moenach, mac Sadchadaigh, dá epscop agus dá angcoire iadsomh, agus
ro éccsat i naon oidhche hi nDísirt Diarmada. Suibhne, mac
Forannáin, abb Imlecha Fio, décc. Ronán, abb Cluana mic Nóis, do
Luaighnibh Ruis temhrach a chenél, agus Bricine, abb Lothra, décc.
Donnacán, mac Maoiltuile, sccribhneóir, agus angcóire, décc isin Etáil.
Colggu, mac Fedaigh, angcoiri, décc. Maolruanaidh, mac Donnchadha,
rí Midhe, athair Maoilseachlaind eisidhe décc. Fergus, mac
Fothaidh, rí Connacht, dég. Cionaedh, mac Conrai, tigherna Chenél
Laoghaire, do mharbhadh la Dealbhnaibh. Coirpre, mac Cathail,
rí Laighen Deasgabhair, décc. Tolorg, mac Allailedh, flaith
Fealla, do mharbhadh la Gallaibh Locha Ribh, agus Findacán, mac
Allailedh, do thérnadh uadhaibh. Losccadh Cluana fearta Brénainn las
na Gallaibh cédna.

Aois Criost, ocht ccéd cethracha atrí. An dara bliadhain décc do
Niall. Gormghal, mac Muiredhaigh, epscop agus angcoire
Lainde Lére, Fiachna, mac Maoilbresail, abb Findabhrach abhae,
Labhraidh, mac Ailella, abb Sláine, Robhartach, mac Bresail, abb
Achaidh bó Cainnigh, Robhartach, mac Flainn, abb Domhnaigh móir,
Breasal, mac Caingne, abb Cillemanach, Cethernach, mac
Fogartaigh, prioir Tíre dá ghlas, agus Aodhan Glinne hUisean, décc.
Sloighedh la Gallaibh Atha cliath a cCluanaibh an dobhair, agus
argain leiss Chille hachaidh, agus martradh Nuadhat mic
Seigeni leo. Orgain Dúin Mascc la Gallaibh, dú in

ro gabhadh Aodh, mac Duibhdhachríoch, abb Tíre dá ghlas, agus
Cluana heidhneach, agus ruccsat leó é i Mumhain, agus ro
fodaimh martra ar Dia, agus ro marbhadh Ceithernach, mac
Condinaisg, prióir Chille dara, co sochaidhibh oile amaille
friu, isin orccain cédna. Forannán, primhaidh Arda Macha, do
erghabháil do Ghallaibh i cCluain Chomharda, co na mhionnaibh agus
co na mhuinntir, agus a mbreth leo dia longaibh go
Luimneach. Slóighedh la Tuirgheis, tigherna Gall for Loch Ribh,
co ro airccseat Connachta agus Midhe, agus ro loiscseat
Cluain mic Nóis co na derthaighibh, agus Cluain fearta Brénainn,
Tir dá ghlas, Lothra, agus cealla iomdha archena. Cathraoineadh
for Ghallaibh rias an righ, Niall, mac Aedha, hi Maigh Iotha,
agus drong dirímhe do thuitim lais. Tuirgheis do ghabháil la
Maolseachlainn, mac Maolruanaidh, agus a bhádhadh hi Loch Uair
iaramh, tré mhiorbhaile Dé agus

Ciaráin, agus na naemh archena. Fearghal, mac Brain, mic
Maeiletuile, mic Tuathail, tighearna Muscraighe, do mharbhadh,
agus Caicher, tigherna Fear maighe. Orgain Donnchadha, mic
Follamhain, agus Flainn, mic Maelruanaidh, la Maelsechlainn, mac
Maoilruanaidh.

Aois Criost, ocht ccéd ceathracha a ceathair. Muireadhach, mac
Flaind, abb Mainistreach Buithi, Coirpre, mac Colmáin, abb Atha Truim,
agus Conaing, mac Ferdomhnaigh, abb Domhnaigh Pádraicc, décc.
Feardomhnach, eagnaidh agus scribhnidh toghaidhe Arda Macha, décc,
agus Robhartach, mac Suibhne, prioir Chille achaidh, scribhnidh agus
eccnaidh do mharbhadh. Donnchadh, mac Amhalgadha, tighearna Ua
nEathach, Clothnia, tighearna Corca Laoighdhe, Cathal, mac Ailella
tighearna Ua Maine, Connmhach Mór, mac Cosccraigh, agus
Niall, mac Cindfhaolaidh, tighearna Ua Fidhgeinte, décc. Maoldúin,
mac Conaill, tigherna Calatroma, do mharbhadh la Laighnibh. Sraoineadh
for Connachtaibh ria nGallaibh, in ro marbhadh Riagán, mac Feargusa, agus
Mughron, mac Diarmada, agus Aodh mac Catharnaigh, co sochaidhe
oile. Cúil Caissine do orgain agus do losccadh la Gallaibh. Orgain
Cúile moine do loinges na cCaillech, agus forbaisi coicthighisi
la Cearbhall, mac nDunlaing, forru, agus a ndeargár do chur iar
sin. Orgain termainn Ciaráin lá Feidhlimidh, mac Criomhthainn,
agus Ciarán dna do theacht ina dheadhaidh, andar lais, agus forgamh dia
bhachaill do thabhairt ind, go ros gabh guin medhoin, co nar bo slán go
a écc. Iar mbeith trí bliadhna décc i righe nEreann do Niall Caille,
mac Aedha Oirdnidhe, ro báidhedh i cCallainn, isin cúicceadh bliadhain
caoccat a aoisi. As dforaithmet a bháis ro raidhedh:

Mallacht ort, a Challainn chruaidh, a shruaim amhail ceó do shlébh,
Do riomart écc dá gach leith, for dreich nithaigh niamhguirm Néill,

Acus bheós:

Ni charaim ind uiscce nduabhais, imthéit seach thaobh Márais,
A Challann cé no mhaoidhe, mac mná baidhe ro bháidhis.

Maonghal alithir ro raidh:

Beir lat leir imcomort Néll, na badh brithem condal céill,
Do righ nimhe taibhredh réir, condibh reidh do cech naimhreidh.
Niall do baa, Niall fo bá,
Niall i mmuir, Niall i tein, Niall cen naidhidh.

Aois Criost, ocht ccéd cethracha a cúig.
An chéd bhliadhain do Mhaolsechlainn, mac Maoilruanaidh, ós Eirinn.
Ceallach, mac Maoilpádraicc, prióir fer Rois, décc. Fedhlimidh, mac
Criomhthainn, ri Mumhan, angcoire agus scribhneóir ba deach
dErennchaibh ina aimsir, décc 18 August, dia ghuin mhedhoin, tria
mhiorbhaile Dé agus Ciaráin. Ba do bhás Feidhlimidh ro ráidheadh:

Dursan a Dhe dFeidhlimidh, tonnbáis bá romh rod báidhe,
Fo deara brón dEirionnchaibh, nad mair mac Criomhthainn Cláire.
As suaithnidh do Ghaoidhealaibh tan do anic an dedenbhaidh,
Ro scaich ár a nErind uaigh on uair atbath Fedhlimidh.
Ni deachaidh irredh righi marbhan bad innigretar,
Flaith fial fo righ nailbine cobrath nochon gignethair.

Eoghan .i. angcoire, mac Aedhagáin, mic Torbaigh, ó Cluain mic Nóis,
décc. Toghail insi Locha Muinreamhair lá Maolsechlainn, mac
Maelruanaidh, for

Fiallach mór do mhacaibh báis Luicchne agus Gaileng ro bhádar occ
innredh na ttuath a hucht Gall, go ro mallartnaighit lais. Maolgoan,
mac Eathach, tigherna Ceneoil mBóghaine, décc. Artuir, mac
Muiredhaigh, tigherna Airthir Life, décc. Cathal, mac Cosccraigh,
tigherna Fotharta, do mharbhadh la hUi Néill. Condmhach, mac
Cethernaigh, lethtoísech Ciarraighe, décc. Niall,
mac Cindfaolaidh, tigherna Ua fFidhgente, décc. Ar for Gallaibh
Atha cliath, oc Carn mBrammit, la Cearbhall, mac nDungaile,
tigherna Osraighe, dú in ro marbhadh da chéd décc
díobh. Cédna horgain Imligh Iubhair la Gallaibh.

Aois Criost, ocht ccéd ceathracha a sé. An dara bliadhain do
Mhaoilseachlainn. Finsneachta Luibnighe, mac Tomaltaigh, rí
Connacht, agus ba hangcoire iaramh, décc. Robhartach, mac
Maoilefothartaigh, abb Cille moinne, décc. Anluan, abb Saighre,
décc. Colmán, mac Duinncothaigh, comharba Colmain Cille mic Duach,
décc. Diarmaid Cille Caisi décc. Cathsraoinedh
ria Maolsechlainn, mac Maolruanaidh, for Gallaibh, i Foraigh
dú in ro marbhadh vii. céd lais díobh. Cath oile ria nOlchobhar, rí
Mumhan, agus ria Lorcán, mac Ceallaigh, rí Laighen co Laighnibh agus
Muimhneachaibh iompa for Ghallaibh, acc Scéith Nechtain, in ro marbhadh
Tomhrair Erla, tanaisi righ Lochlainne, agus dá céd décc uime.

Raoinedh ria ttighernach, tigherna Locha gabhar, for allmhurachaibh i
nDaire Disirt Dachonna, in ro marbhadh dá fhichit décc díbh lais. Raoinedh
ria nEoghanacht Caisil for Ghallaibh, occ Dún-Maeletuile, airm in ro
marbhadh cúig céd díobh. Slóighedh la hOlchobhar do thoghail
Dúin Corcaighe for Ghallaibh. Tuathchar, mac Cobhthaigh,
tigherna Luighne, décc. Maidhm ria nEchthighern co Laighnibh
for Osraighibh, a hUachtar Garadha. Maidhm ria nDunadhach, mac
Dunghaile co nOsraighibh, fors na Déisibh.

Aois Criost, ocht ccéd cethracha a seacht. An tres bhliadhain do
Mhaoilsechlainn. Onchu, epscop agus angcoire Sláine, Robhartach, mac
Colgan, abb Sláine, Oenghas, mac Ailgile, abb Domhnaigh Phatraicc,
Finsneachta, mac Diarmada, abb Doimhliacc, Maelfuadaigh, abb Aird
Breacáin, Fland, mac Cuanach, abb Mainistreach, agus Arannán, abb
Bendchair, décc. Maelmedha, inghen Aedha, banabb Cluana Cuifthin,
décc. Conaing, mac Flainn, tighearna Bregh, Niall, mac Cionaedha,
tigherna Ua fFailghe, Coirpre, mac Cionaedha, tigherna Ua Máil, agus
Ailill, mac Cumusccaigh, tigherna Locha Cál, décc. Tuathal, mac
Ceallaigh, tighearna Ele, décc. Flannaccán, mac Eatach, tigherna
Dal Araidhe an Tuaisceirt, do mharbhadh la Cenel Eoghain. Indreadh
Duibhlinne la Maelsechlainn, mac Maelruanaidh, agus la Tigernach,
tigherna Locha Gabhar. Muirfhecht secht fichit long do mhuinntir rí Gall
do thocht do thabhairt ghrema fors na Galla ro bhádar ar a ccinn i
nErinn, gur mhesgbhuaidhirset Ere etorra. Maelbresail, mac Cernaigh,
tigherna Mughdhorn, do mharbhadh la

Gallaibh iar na bheith i ccléircecht iar ccor in tsaoghail dé. An cros
boi ar faithche Sláine do thurccbháil isin aer. A comhbhrúdh agus a
fodhail co ttorracht ní dia barr taillte, agus fionnabhair abhae.
Forbais Maoilsechlainn i Crúfait, amhail ro ráidh Maolfechini:

Mithid dul dar Boind mbáin, i ndail maighe Midhe mín,
As ann bithid fri gaith ngluair, isin uair i Crufait chrín.

Niall, mac Aedha Alainn, tigherna Ua Máil, décc.

Aois Criost, ocht ccéd cethracha a hocht. An cethramhadh bliadhain do
Maoileachlainn. Cetadach, abb Cluana mic Nóis, décc. Do
Uibh Corbmaic Maenmaighe a chenél. As occa eccaíne atrubradh an rann:

At cluin cach, etir inggnath agus gnath,
Abb hi cCluain mar Cedadach nochan etfathar co brath.

Tuathal, mac Feradhaigh, abb Rechrainne agus Dermaighe, Fearchair, mac
Muiredhaigh, abb Lainne Lére, Ruaidhri, abb Luscca, agus Rechtabhra,
abb Cluana ferta Brénainn, décc. Aonghus, mac Suibhne, tigherna
Mughdhorn, do mharbhadh la Gairbheth, mac Maoilbrighide. Maelán, mac
Cathmogha, tigherna Ua mBriuin deisceirt Connacht, do mharbhadh la
Gallaibh. Cobhthach, mac Maolcobha, tigherna Ciarraighe Luachra,
décc. Cionaodh, mac Conaing, tigherna Ciannachta Bregh, do
fhrithtoidhecht fri Maoilsechnaill, mac Maolruanaidh, agus tocht co
nert gall lais, co ro indir Uí Néill ó Shionainn co muir, etir cealla
agus tuatha, agus ro oircc insi Locha gabhor, agus ro loiscc iaramh, gur
bho comhard frí lár. Ro loisccedh din leo derthech treoit, agus tri
fichit ar da

chéd do daoinibh ann. Loch Laoigh hi ccrich nUmhaill la
Connachtaibh do élúdh. Braon, mac Ruadhrach, tigherna Ua Crumthainn,
agus a dhá bhrathair, Fogartach agus Bruatar, do mharbhadh la a
nderbhfine buddhéin.

Aois Críost, ocht ccéd cethracha anaoi. An cúicceadh bliadhain do
Maoilsechlainn. Tiopraide Ua Baoithenaigh, ab Lis móir, Colcca, mac
Ceallaigh, abb Chille Tóma, Uarghas, abb Lethghlinne, agus Scandal,
mac Tiopraite, abb Domhnaigh Sechnaill, agus Connagán Cluana ferta
Brénainn, décc. Olchobhar, mac Cionaedha, rí Caisil, décc.
Cionaeth, mac Conaing, tigherna Ciannachta Bregh, do bhádhadh i
nAinge la muinntir an righ, Maoileachlainn, agus tigherna Locha Gabhor,
ag aithe fair ina nderna dulc fri tuaith agus ecclais. Conidh dó
asrubradh,

Monuar, a dhaoine maithe, ba fearr a laithe cluithe,
Mór liach Cionaedh, mac Conaing, hi lomaind do cum cuithe.
Iar na cuimrech isin rian, mór liach ro cecht ar an tsluaigh,
Acc aiccsin a airrbhi bháin fors an tráig ós Aingi uair.

Guaire Dall atbert so,

A Themhair, a telbuidhe, ardat chesi mo chuire,
Baí lat, mani derbade, damhna righ Ereann uile.
A Thailltin, ate menglan, a thír mbuadha ina mban,
Ba cain dirimm ciandan immo treidhedh in cach tan.

Dubhghoill do techt do Ath cliath, co ro lasat ár mór for Fionnghallaibh,
co ro indirset an longport etir daoine agus maoine. Slatt oile do
Dubhgallaibh

for Fionnghallaibh occ Linn Duachaill, agus ro chuirset ár mór forra.
Ríghdhál ind Ardmacha etir Maolseachlainn, mac Maolruanaidh, co maithibh
Leithe Cuinn, agus Madudhan co maithibh choigidh Conchubhair.
Diarmaid agus Fethghna, co samhaibh Pattraig mar aen riu, agus
Suairlech .i. Indednen co cleirchibh Midhe. Caireall, mac
Ruadhrach, tigherna Locha hUaithne, do mharbhadh lá Conaillibh.
Eochaidh, mac Cearnaigh, tighearna Fear Rois, do mharbhadh la
Gallaibh. Flannchadh, mac Aongusa, tigherna Ua Fothadh tíre, décc.

Aois Criost, ocht ccéd caecca. An seiseadh bliadhain do
Mhaoilseachlainn. Maonghal, abb Arda sratha, Colam, mac
Airechtaigh, abb Corcaighe, Ceallach, mac Crunnmhaoil, abb Cind
Eitigh, Condath, abb Ruis ailithir, Fionán, abb Imbleacha Iobhair,
Fingin, mac Laidhginn, abb Cluana ferta Molua, hUarghus Ua Raithnén,
abb Leithghlinne, Lerghal, abb Othna, Forbhasach, mac Maoluidhir, abb
Cille móire Cindech, Cendfaeladh, mac Ultáin, eccnaidh Boithe Chonais,
agus Airtri, mac Faoláin, airchinneach Cille dara, décc. Cathal mac

Dubháin, tigherna Ua nDuach Argadrois, Fogartach, mac Maoilbresail,
tigherna Oirghiall, décc. Flannagan, tigherna Leithe Chathail, do
mharbhadh la Flann, mac Conaing. Lucht ocht fichit long do Findghallaibh
do rochtadar do chath fri Dubhghallaibh co Snamh Eidhneach, trí la agus
teora hoidhche dóibh acc cathucchadh re roile, co ro mebhaidh ria
nDubhghallaibh, go ffargaibhsiot Fiondghoill a longa leó. Ard Macha do
fhásughadh lá Gallaibh Linne Duachaille an domhnach iar cCaiscc. Ar for
Gallaibh i nairthear Bregh, ar oile oc Raith Aldain la Ciannachtaibh
in aoin mhí.

Aois Criost, ocht ccéd caecca a haon. An seachtmhadh bliadhain do
Maoileachlainn. Flaithniadh, mac Conghaile, epscop agus abb
Biorair, Carthach, abb Tíre dá ghlais, Ailill, mac Robhartaigh,
abb Luscca, Fland, mac Reachtabhrat, abb Leith Mancháin, Andlidh,
eccnaidh Tire da ghlais, Ailghenan, .i. mac Donnghaile, ri Caisil,
décc. Cathmal, mac Tomaltaigh, leithri Uladh, do mharbhadh la
Gallaibh. Eachtighern, mac Guaire, tigherna Laighen Desgabhair, do
mharbhadh la Bruadar, mac Aedha agus la Cerbhall, mac Dunghaili, i
meabhail. Bruadar, mac Aedha féisin do mharbhadh i cend ocht lá
iaramh la muintir Echtighern a ndíoghail a ttighearna. Maolcaurarda,
mac Maoilbreasail, tigherna Ua Mic Uais Airghiall, do écc. Cathal,
mac Dubháin, tigherna Argatt rois décc. Cearnach, mac Maelebresail,
tigherna Cobha, décc. Oengus, mac Néill, tighearna Ua mBerchon,
décc. Dá comhorba Pátraicc .i. Forannán scribhnidh, espucc,

agus angcoire, agus Diarmaitt an tí ba fhoircthi agus ba heccnaidhe isin
Eoraip go huilidhi, décc. Amhlaoibh, mac righ Lochlainne, do theacht
i nErinn, gur ro ghiallsatt i mbáttar do eachtairchenélaibh i nErinn
dó, agus do bert cíos ó Ghaoidhelaibh. Gofraidh, mac Feargusa, toisech
Innsi Gall, décc.

Aois Criost, ocht ccéd caoga a dó. An tochtmhadh bliadhain do
Maoileachlainn. Indreachtach Ua Fínachtáin, comharbba Colaim Cille,
eaccnaidh tocchaidhe ro fhodhaim martra la Saxaibh an dara lá décc do
Mhárta. Maoilsechlainn, rí Ereann do dhul a Mumhain, co ráinicc
Indeoin na nDéisi, agus do bert a ngialla agus a oighréir uatha, ar
ro thriallsat frithbhert fris a hucht echtaircheinel. Muirgheal, ben
righ Laighen, décc. Crunnmhaol, mac Maoiledúin, tighearna Ua
fFidhgeinte, do écc. Tuathal, mac Maoilbrighde, rí Laighen, do
mhartradh. Bruadar, mac Cindfaolaidh, tigherna Musgraighe, dég.

Aois Criost, ocht ccéd caoga a trí. An nomhadh bliadhain do
Mhaoilseachlainn. Ailill, abb Achaidh bó, agus Robhartach, abb
Innsi Caindegha, scribhnidh, décc. Rudgus, mac Maicniadha, abb
Mainistrech Buithe, do bháthadh isin mBóinn. Catan, banabb
Cille dara, décc. Slóiccheadh la hAodh, mac Néill co hUltaibh, co
ffarccaibh Conneccan, mac Colmáin, agus Flaithbheartach, mac Néill,
agus sochaidhe ele archeana. Muiredhach, tigherna Arda Ciannachta,
décc. Orgain Locha Cend la Gallaibh iar ndol fair for lécc oighredh,
agus torcratar fiche ar chéd do dhaoinibh leo im Gormán.

Aois Criost, ocht ccéd caoga, a cethair. An deachmhadh bliadhain do
Mhaoilechlainn. Sodhomna, epscop Sláine, do fhulang martra ó
Nortmannaibh. Corbmac Laithrigh Briúin, scribhneóir, angcoire, agus
epscop, décc. Suibhne Ua Roichligh,

scribhneóir, angcoire, agus abb Lis móir, Cathasach, mac Tighernaigh,
ferthíghis Arda Macha, agus eccnaidh foircthe eside, décc. Laisren
Tighe Munna décc. Maolseachlainn, mac Maolruanaidh, do dhul co
Caisiol Mumhan, go ttucc gialla fear Mumhan dorídhisi. Coisne mór agus
secc, comttar soirsi priomh locha, agus priomh aibhne Ereann do
thraighthechaibh agus mharcachaibh ón nomhadh Callainn do December gus an
ochtmhadh Id Enair. Duirtheach Luscca do losccadh la Nortmannaibh.
Roinedh mór ria nAodh, mac Néill, for Gallgaoidhealla hi nGliond
Fhoichle, co ro ladh a nár leis. Dunlang, mac Duibhdúin, tighearna
Fotharta tíre, décc. Faolchadh, mac Forbhasaigh, tigherna Ua
mBairrche maighe décc. Niall, mac Gillain, iar mbeith triocha
bliadhain gan digh gan bhiadh, décc.

Aois Criost, ocht ccéd caoga a cúicc. An taenmhadh bliadhain décc do
Mhaoileachlainn. Maenghal, abb Fobhair, Siadhal, Disirt Ciaráin,
agus Maoloena, mac Olbraind, do Luicchnibh Connacht, fear leighinn
Cluana mic Nóis, décc. Matudan, mac Muiredhaigh, ri Uladh, agus
a clércecht atbáth. Bran, mac Scannláin, tigherna Gabhra, décc. Triar
do losccadh i tTailltin la saighnen.

Aois Criost, ocht ccéd caecca asé. An dara bliadhain décc do
Mhaoilechlainn. Comsadh epscoip agus abb Cluana hEraird,
décc. Tiopraide Banbhan, abb Tíre da ghlas, Maeltuile, abb
Imleacha Iubhair, Ceallach, mac Guaire, tigherna Ua cCeinnselaigh,
décc. Cernach, mac Cionaotha, tigherna Ua mBairrche Tíre, décc.
Maolseachlainn, mac Maolruanaidh, co fferaibh

Ereann, cen mo tad Muimhnigh, do dhol i ttíribh Mumhan co ndeisidh
deich noidhche oc nEmlidh. Ro loiscc agus ro indir Mumha co muir ind
aen ló, iar madhmaim for a rioghaibh acc Carn Lucchdhach, co ffarccbadh
ann lais Maolcrón, mac Muiredhaigh, tanaisi na nDéisi, co sochaidhe ele.
Tucc iaramh Maolsechlainn gialla Mumhan ó Chumar na trí nuisce co
hInsi Tarbhnai iar nErinn, agus ó Dún Cearmna co hArainn nAirthir,
don turas sin. Maidhm ria cCearbhall, tighearna Osraighe, agus ria
nIomhar hi ccrich Aradh tíre, for Cenel Fiachach, co
nGallgaoidhealaibh Leithe Cuinn. Ceithri chéd ar sé mhílibh an líon
táinicc Cearbhall agus Iomhar. Innreadh Laighen la Cerbhall, mac
nDunlaing, agus a ngeill do ghabháil im Coirpre, mac nDunlaing, agus
im Suithenen, mac Artúir.

Aois Criost, ocht ccéd caocca a seacht. An treas bhliadhain décc do
Mhaoilseachlainn. Suairleach, abb Achaidh bó Caindigh, Ailill
Banbhan, abb Biorair, Maolcobha Ua Faolain, abb Cluana hUamha, agus
Faolghas, abb Ruis Cré, décc. Sloicchedh mór la hAmhlaoibh agus la
hIomhar, agus la Cerbhall, tighearna Osraighe hi Midhe. Ro
tionóileadh ríoghdál mhaithe Ereann las in righ Maoilseachlainn, go
Raith Aodha mic Bric, im Fethghna, comharba Patraicc, agus im
Suairleach comharba Finnia, do dhénamh síodha agus caonchomhraic fear
nEreann, conidh ann do rad Cerbhall, tighearna Osraighe, oighréir
comharba Phádraic, agus Finnia do righ Ereann, iar mbeith do
Cearbhall ceathrachat oidhche i nEreros, agus mac righ Lochland
immaille fris i ttosuch oc indreadh Midhe. Conadh iar