ANECDOTA FROM IRISH MSS.

XV.

Leabhar Breac, p. 261a.

Incipit regula Mochuta Rathin do fhorcetul
deich timmna cech óen duine.

1. It é ascnam na Flatha
Isu úasal-bríg:
serc Dé ón uli anmain,
ó chride, ó gním.

2. A sherc ó uilib nertaib
ní ba líach, cid léir,
serc do choimnesaim la sein
amail do sherc féin.

3. Ní adrai do hídlachtaib,
dáig in Choimded móir,
ní aile do Dúilemain
imm úabar nát cóir.

4. Airmitiu do thustide
timarna in rí,
ocus cech óen is sruthiu
as siniu ol m-bí.

5. Tabair anoir don Abbaid
Maic Muire cen meth:
ní gata, ní fuiligther,
is ní oirce nech.

6. Nír bat santach forsin bith
nach for in nem clóen,
ní tóis i forgiull for nech,
ní chráide nach óen.

7. A n-adcobrai-siu ó chách
deit féin da cech maith,
déna-su sin da cech óen
ar cu róis in Flaith.

8. Ní ná dúthairser deit féin
do erchoit bís olc,
do duine ní accobra
céin not-bé i corp.

Kuno Meyer