ANECDOTA FROM IRISH MSS.
XII.

Leabhar Laighneach, p. 281a.

Cethrur macclérech do fheraibh hÉirenn
dochótar ina n-ailithre do dul do Róim.
Dognít a n-oegidecht la fer n-amra do
Fhrancaib oc dul do Róim. Dobreth sín
ocus cruithnecht dóib. Maith dóib. “Is eo
as maith dún trá ó Róim, co ndarda nach
n-dísert dún sund corrabam inar n-ailithre
and, ar is imda cech torad and etir fhín
ocus cruithnecht ocus cach torud arcena.”
“Fochen dúib!” or in láech. “Robarbia mo
maith-se. Tabraid-se dano for maith dam-
sa .i. guide Dé erom.” Doghníther ón. Tía-
gait co tairchellsatar relic ocus martra
Petuir ocus Phóil. Tecait anair doridisi.
Cuinnegar tra baile co rofalmaigther dúib.
“Atá dísert bec sund. Atá dísert ach
trúag and. Apair fris tuidecht ass,” or in
rí. “Atlochur do Dia,” ol in dísertach.
“Mo rí talmanda dom' brith ass ocus mo
rí nemda do thuidecht ind. Aircid ind, a
chlérchu, i fecht sa.” “Corop solaid!” ol in
clérech. “Cid asberat?” or in rí. “Co-
rop solaid dóib.” “As tír dóib!” or in rí.
“Gentlide atacomnaic. Ná hebat cid usce
in tíre.” Tiagait ass uide ind lái sin,
corráncatar cathraig and. Búi in t-escop
.i. a tóisech-som oc indmut a lám assin
t-sruth arnabárach. Co n-accai comraid
craind frithrosc in t-srotha chucai. Do
cuirethar bedg anís co m-búi i n-ucht in
chlérig. “Beir latt, a gillai, dond ríg
so!” or in clérech. “Nocon fetar-sa cid
fil and.” Berair dó iarum. Oslaigthir
leis, co n-acca sé tinni argait inti ocus
tinne dergóir eturru. Rocurthea leis im-
meid. Nicon rabí méit friged in nach ae
díb sech araile. “Maith,” or sé, “co n-gar-
tar dún na clérig.” Doroichet iarum.
“Maith, a chlérchiu, atá sund ar n-etarghleód.
Na secht tinne se amne .i. na sé tinni
argait it é sé lathe na sechtmaine. In tinne
óir is hé in domnach in sin. Is ed atchíu,
ní trummu ní sech araile díb. Is é a
etargna side didiu. Amail nach trummu
tinni di sund sech araile, is amlaid solaid
lái sech araile don t-sechtmain. Ar is óen
Rí dosrat, ocus ní tharat olc for nach ae sech
araile. Anaid-si, a chlérchiu, ocus itib deg-
dóene, acht chena ná imradid solud céin
bethi i m-bethaid.”

Connach cóir didiu lenmain do sholud nó
shénairecht.