A MIDDLE IRISH LYRIC.

Cumthach labras in lon sa.
Int olc do fhúair d'fhetus-sa:
Cidbé do shélaig a theag,
Is fa énaib do háirgead.

Int olc fhúair-sean anossa,
Ní cían úaidh ó fhúarus-sa:
Maith m'aithne er dha labhra, a luin,
A haithle h'adba d'argain.

Do chridhe-si, a luin, do loisc
A n-derna in duine díchoisc:
Do nead gan én is gan uig,
Scél is beag ar an m-búachail.

Ticdís fad' gothaib glana
Do mhuinter núa anallana:
Én nocha tig as da thaig,
Tar bél do nid ba nenaid.

Do marbsat búachaille bó
Do chlann-sa uli a n-aenló:
Inand sod dam-sa acus duit,
Mo chlann-sa ní mó marait.

Do bi ac ingeilt co h'agaid,
Lethén in eóin allmaraig:
Do chúaid eri sás ar sin,
Co fúair bás lesin m-búachaill.

A fhir do chumm in cruinde
Doilig lind do lettruimme:
Na carait atá rer táib,
Marait a mná 's a macáim.

Tánic slúagh síd 'na side
Do marbadh ar muintire:
Gad cin co gabat ón guin,
Noca mó a n-ár ó armaib.

Cuma ar mná, cuma ar clainde,
Trén a immshním orainde:
Can a slige amuig 's amach,
Da fhuil mo chride cumthach.