Eoghan Ó Dubhthaigh, cct.

I.

I mbealach cille nó i mbéal póirse
Tar spara amach dá bhfaghainn sibh,
A chléir do ghlac an creideamh fallsa,
Do chaithfinn an ghlac rann so ribh.

II.

Ar phortús Áine 's an diabhail uilc
An riaghail fír crábhaidh,
Do léigis, a mhaoil gan ghluine,
Portús Muire le fánaidh.

III.

Do léigis amudha portús Dé
Is portús Muire, clé an ceart;
Och mo náire, a chroidhe fallsa
Portús Áine is annsa leat.

IV.

Rinnce imirt agus ól,
Is bean óg do fháscadh ribh,
Bruigin, meisce, fíon Spáinneach,
Ní hintsrument crábhaidh sin.

V.

Seanmóir feóla Chorrghais
Do sheanmóir ní me lobhras,
Th'anghlór, cé mór dhearbhas,
Is mó an searbhas iná an domblas.

VI.

Ní thiubhra Tighearna Chaisil,
Gibé fáth fá bhfuil a rún,
Ar chéad marg den ór is áille,
Máighistreacht Áine do Sheón Brún.