STORIES FROM THE TÁIN.

BY J. STRACHAN.

VII HOW CUCHULAINN SLEW FROECH.

[LU. 63a1-29 = YBL. 22b48-23a30.]

"Tíagam ass tra in fecht-sa,' ol Ailill.
Roeccat iarom Mag Mucceda. Benaid
Cúchulaind omnai ara ciunn isuidiu, agus
scríbais ogum inna tóib. issed robói and,
arná dechsad nech reccai co ribuilsed
err óen-charpait. Focerdat a puiplea
isuidiu, agus dotíagat dia léimmim inna
cairptib. Dotuit trichae ech oc suidiu agus
bristir trichae carpat and. Belach n-Áne
iarom issed ainm inna maigne-sin co bráth.

Bíit and co arabárach. Congairther Fróech
dóib. 'To-n-fóir, á Fhróich,' ol Medb.
'Diúscart dínn in n-écin fil forn. Éirg
dúnn ar chenn Conculaind, dús in com-
rasta friss.'

Tocumlai ass maitin muich nónbar co
m-bói oc Áth Fúait co n-accai in n-óclaig
occa fhothrucad isind abainn. 'Anaid
sund,' ol Fróech fria muintir, 'con-id-ral
frissin fer n-ucut. Ní maith i n-uisciu,' olse.
Ticra a étac de. Téir issin n-usce
a dochum. 'Ná tair ar mo chenn-sa,' ol
Cúchulaind. 'Atbélae de, agus is tróg limm
do marbad,' 'Rega ámh,' ol Fróech, co
comairsem isind usciu, agus bad chert do
chluiche frimm.' 'Committe són amal
bas maith lat,' ol Cúchulaind. 'Lám cechtar
náthar imm alaile,' ol Fróech. Ata-agat
co céin móir oc imthascrad forsind
usciu agus bátir Fróech. T-an-ócaib súas
afhrithissi. 'In dul-so,' ol Cúchulaind, 'in
n-didmae th-anacol?' 'Nícon-didem'
ol Fróech. Atmaig Cúchulaind fói atherruc
con-id-appad Fróech. D-a-cuirethar, for
tír. Berait a muinter a cholainn co
m-bói issin dúnud. Áth Fróich ainm ind
átha-sin co bráth.

Cóinti a n-dúnad n-ule Fróech. Con-
accatar ban-chuire i n-inaraib úanib for
colainn Fróich maic Idaid. Focessat úadib
issa síd. Síd Fróich ainm in t-shídae sin
iarom.

Lingid Fergus darsin n-omnai inna
charput.