MO MHALLACHT AR CHLOINN
BHAOISGNE.

Goll Mac Morna adubhairt, agus é ar an gcarraig agus
Clann Bhaoisgne ar a thí agus gan dul uatha aige.

Mo mhallacht ar Chloinn Bhaoisgne,
deireadh oidhche sa charraig;
Do fhionnfadaois mo dhiomdha
Dá mbadh iomdha mo charaid.

Mo bheannacht ar Chloinn Mhorna
d'fhulaing doghra mór n-arracht;
anocht gidh deireadh oidhche,
ar Chloinn Bhaoisgne mo mhallacht.

I bhféagmhais Fhinn ina aonar,
re a fhaobhar do thuit arracht,
olc orm deireadh a ghaoise —
ar Chloinn Bhaoisgne mo mhallacht.

Meinic fuaras airc bhruighne,
gé doilghe dhamh sa charraig;
Beathar gom chaoineadh choidhche —
ar Chloinn Bhaoisgne mo mhallacht.

A inghean Chonaill Chruachan
ag a bhfuil uathadh carad,
beir beannacht leat dom chairdibh,
beir go Laighnibh mo mhallacht.

Ní mhair Sgiath-bhreac ma Dathchaoin
gan athmhaoin d'éis mo charad;
Ní mó mhaireas Goth Gaoithe —
ar Chloinn Bhaoisgne mo mhallacht.

Fuaras colpa dóimh allaidh
uadha, is dob' aisgidh charad —
mo sheacht mbeannacht a ar Chaoilte
ar Chloinn Bhaoisgne mo mhallacht.

Diomdhach mé de Chloinn Rónáin:
ní mhair mo mhórán carad:
ag sin deireadh mo laoidhe —
ar Chloinn Bhaoisgne mo mhallacht.

Ar dteacht Phadraig sa Bhanbha
ní bhiaidh na hadhbha arracht:
fágaim fa a chomhair m'fhaoilte —
ar Chloinn Bhaoisgne mo mhallacht.

Mo Mhallacht.