CAOINEADH
Ar Phádraig Ó Laoghaire.

Séamus O Séaghdha cct.

Tá ceó ar dhruim Chnuic Uabhartha,
Is buaidhreadh ar linn 's ar thráigh;
Is feochta snaoidhte suaithte
Táid mór-chríocha Innse an áigh;
Ní 'l ceol ná laoithe suaircis
Ná luaimneacht ná grinn 'san áit
Acht brón is díth is duairceas
Is cruadhtan is cíocras cráidh.

Mo thruagh-sa clann Uí Laoghaire
Id' eughmais, a Phádraig fhír!
Mo thruagh-sa gleannta Béarra
Mar ar thréigis do cháirde gaoil!
Mo thruagh-sa an mho'mhail-bhean ghléigeal
le'r thaobhais i lá do ghrinn!
Mo thruagh mar cheann gach sgéil í,
Do chéile go bráth id' dhíth!

Ba bhuan ba mhín ba mhaordha
A Uí Laoghaire, do chroidhe gan chall;
Ba luath ba líomhtha laochda
Do thréithe gan smaoineadh feall;
Ba shuairc ba shlím do dhreuchda
Ba léigheannta do Ghaoidheal 's do Ghall;
Mo chruaidh-chreach chroidhe sa' chré thu,
A shéimh-fhir nár stríoc do namhaid!

Acht gídh gur duairc le' lán tu,
A Phádraig, 'san úir ag dreóghadh,
Lem' chroidh-se is buadhairt thar bárr tu
Do ghrádhuigh thu le dlús thar meadhón.
A mhaoin, níor shuarach fánach
An fháilte dob' fhiú leat rómham,
I ndíocras chruaidh an lá úd
'N-ar fágadh mé ag tnúth le brón.

Ba lághach do sheasais taobh liom
I mbaoghal 's i mbrón mar bhí,
Neamh-spleadhach ar neart an dréim úd
Gan daondacht, ler' spórt mo dhíth.
Dom' námhaid ba lag do ghéilleadh,
Acht thaobhais le cóir go fíor;
Ba bhreágh do ghean, a théagair,
Do chaomhnuuigh geal-trócaire Chríosd.

Mo chrádh! I gcré na húire
Mo dhlúth-chara buan gan fagháil;
Is tláth 's is tréith id' iongnais
Gach dúthaigh 'n-ar luadhadh do thásg.
Gé d'fhágais déarach dubhach me
Gan súil leat ó'n uaigh go bráth,
Tré ghrásaibh Dé tá tnúth 'gam
Lem' stiúradh do'n chuan mar táir.